Maguire ជាកីឡាករខ្សែការពារមួយរូបប្រចាំក្រុមដោយចាប់តាំងពីរដូវកាលមុន រហូតមកដល់ដើមរដូវកាលថ្មីនេះ គេតែងតែត្រូវបានអ្នកគាំទ្ររិះគន់ខ្លាំងអំពីទម្រង់លេងដ៏អាក្រក់របស់គេ ហើយតែងតែរបូតឱកាសដល់ក្រុមក្នុងការយកឈ្នះការប្រកួតនានា។ Maguire បានជួយរកគ្រាប់បាល់ ១គ្រាប់សម្រាប់ក្រុមបិសាចក្រហម​តែតបាល់បញ្ចូលទី ១គ្រាប់នៅនាទី៧២ ខណៈដែលអ្នកចាំទី Onana បានជួយសង្គ្រោះបាល់ពិន័យ ១១ម៉ែត្រនៅចុងម៉ោងហៀបនឹងបញ្ចប់ការប្រកួត ជួយឱ្យក្រុមរកបាន ៣ពិន្ទុលើកដំបូងក្នុងវគ្គចែកពូលពានរង្វាន់ UCL រដូវកាលនេះ។
 

អ្នកចាត់សញ្ជាតិហូឡង់ ថាខ្សែការពារ Maguire ដែលធ្លាប់បានបង្ហាញខ្លួនយ៉ាងល្អនៅការប្រកួតក្របខណ្ឌ Premier League យកឈ្នះលើក្រុម Sheffield United លទ្ធផល ២-១ កំពុងតែមានទម្រង់លេងយ៉ាងសកម្មជាមុន សម្រាប់តួនាទីរបស់គេ។

«គេបានបោះជំហានបានយ៉ាងល្អ ក្នុងនាមជាខ្សែការពារជួរមុខ។ Maguire មានទំនុកចិត្តខ្លាំងក្នុងការវាយលុក រូបគេពិតជាធ្វើបានល្អខ្លាំងក្នុងការប្រកួត ក៏ដូចជាគ្រប់គ្រងការប្រកួតលើដៃគូប្រកួតប្រជែង។ ហើយបន្ទាប់មកអ្នកបានឃើញនូវជំនាញដ៏ល្អរបស់គេក្នុងការតែតបាល់យ៉ាងល្អ ពីការប៉ះបាល់ដ៏ល្អពីសំណាក់ខ្សែបម្រើ Christian Eriksen។»។ លោក Ten Hag សរសើរពីការប្រឹងប្រែងកែទម្រង់លេងប្រសើរឡើងវិញរបស់ខ្សែការពារ Maguire ដែលរកបានគ្រាប់បាល់ក្នុងការប្រកួត។
 

អ្នកចាំទី Onana ក៏ជាកីឡាករមួយរូប រងការរិះគន់ខ្លាំងចាប់តាំងពីបានមកដល់ក្រុម Man United ក្រោយផ្ទេរមកពីក្រុម Inter Milan។ អ្នកចាំទីសញ្ជាតិកាមេរ៉ូន តែងតែរបូតគ្រាប់បាល់ជាបន្តបន្ទាប់ ប៉ុន្តែក្នុងជំនួបទល់ Copenhagen រូបគេបានជួយសង្គ្រោះក្តីសង្ឃឹមរបស់ក្រុម ដោយការសង្គ្រោះបាល់ពីការស៊ុតបាល់ពិន័យ ១១ម៉ែត្រពីសំណាក់កីឡាករ Jordan Larsson។
 

លោក Ten Hag បានលើកឡើងអំពីអ្នកចាំទី Onana ដូច្នេះ ៖ « គេបានបង្ហាញពីបុគ្គលិកលក្ខណៈល្អ ហើយគេដឹងថាពីមុនមិនមែនជាកម្រិតដែលរូបគេមាននោះទេ គេមិនអាចរកឃើញនូវជំនាញពិតប្រាកដរបស់គេ ហើយគេក៏អាចធ្វើបានល្អជាងនេះ។ ខ្ញុំគិតថាការប្រកួតកាលពីថ្ងៃទី២១ ទល់ Sheffield គេក៏ធ្វើបានល្អ ហើយថែមទាំងថ្ងៃនេះដែរ។»៕