ក្រុមប្រឹក្សាគ្រប់គ្រងក្រមសីលធម៌ និងវិន័យរបស់ UEFA បានដាក់ពិន័យជាប្រាក់ចំនួន ២១,០០០ដុល្លារ ទៅលើសហព័ន្ធបាល់ទាត់បូស្នី និងបញ្ជាឱ្យបិទផ្នែកខ្លះនៃកីឡដ្ឋានរបស់ពួកគេ សម្រាប់ការប្រកួតបន្ទាប់ក្នុងទឹកដី បន្ទាប់ពីអ្នកគាំទ្រប្រទេសមួយនេះ បានបង្កការអុកឡុក និងអាកប្បកិរិយារើសអើង អំឡុងពេលការប្រកួតជាមួយនឹងក្រុមព័រទុយហ្កាល់ កាលពីថ្ងៃទី១៧ ខែតុលា។ ជំនួបនោះ ព័រទុយហ្កាល់យកឈ្នះ ៥-០។
 

NFSBIH ក៏ត្រូវរងពិន័យជាប្រាក់បន្ថែម ២៦,០០០អឺរ៉ុ (២៩,០០០ដុល្លារ) សម្រាប់ការបិទច្រកចេញចូលសាធារណៈ ចេញចូលកីឡដ្ឋាន និងបានចោលរបស់របរវត្ថុផ្សេងៗចូលក្នុងទីលានប្រកួតផងដែរ។
 

UEFA ក៏បានដាក់ទណ្ឌកម្មបន្ថែមទៀតទៅលើប្រទេសបូស្នី ដោយហាមឃាត់ការលក់សំបុត្រចូលទស្សនាសម្រាប់អ្នកគាំទ្រ នៅការប្រកួតបន្ទាប់ក្រៅទឹកដីរបស់ពួកគេ សម្រាប់ការចោលកាំជ្រូចភ្លើង និងកាំជ្រូចផ្ទុះក្នុងកីឡដ្ឋានអំឡុងក្រុមពួកគេនឹងត្រូវជួបក្រុមលិចស្តង់ស្តាញ កាលពីថ្ងៃទី១៣ ខែតុលា។ UEFA បន្ថែមការពិន័យទឹកប្រាក់ចំនួន ២១,០០០ដុល្លារបន្ថែមសម្រាប់រឿងនេះ៕