ចំណុចពិសេសនៃកិច្ចសហការមួយនេះគឺ​ ការបូកបញ្ចូលនូវចំណុចខ្លាំងនៃទូរគមនាគមន៍ បច្ចេកវិទ្យាហិរញ្ញវត្ថុ ធនាគារ និងបច្ចេកវិទ្យាឌីជីថល ក្នុងការសម្រួលឲ្យអតិថិជនទទួលបាន និងអាចប្រើប្រាស់ឥណទាន។ សេវាកម្ម BNPL បានបង្ហាញនូវភាពដ៏អស្ចារ្យក្នុងការបង្កើនសេរីភាពហិរញ្ញវត្ថុ និងបទពិសោធន៍ទិញទំនិញ​របស់អតិថិជន។ អ្វីដែលសេវាកម្មនេះខុសប្លែកពីសេវាកម្ម BNPL ដទៃនោះគឺវត្តមានរបស់ Mora ដែលជាវេទិកា​ឌីជីថល។ Mora ជាវេទិកាប្រកបដោយភាពច្នៃប្រឌិតមួយនេះ អាចឲ្យអតិថិជនស្នើសុំឥណទានតាមបែបឌីជីថល​ពេញលេញ តាំងពីពេលចាប់ផ្តើម ការអនុម័តឥណទាន ការទិញទំនិញ រហូតដល់ការទូទាត់ចេញ។ ជាមួយនឹងបទពិសោធន៍​ដែលងាយស្រួល និងគ្មានភាពរអាក់រអួល អតិថិជនអាចទទួលបាននូវឥណទាន និងអាចទិញផលិតផល​យ៉ាង​ងាយស្រួល ពីជម្រើសពាណិជ្ជករជាច្រើន ដែលក្នុងនោះរួមមាន Smart ផងដែរ។
 

អតិថិជនដែលមានចំណាប់អារម្មណ៍ក្នុងការប្រើប្រាស់សេវាកម្មនេះ អាចទាញយកកម្មវិធី Mora BNPL ដោយគ្រាន់តែផ្តល់ព័ត៌មានចាំបាច់ ដើម្បីស្នើសុំឥណទាន។ បន្ទាប់ពីបំពេញនូវព័ត៌មានដែលចាំបាច់ អតិថិជន​អាចបញ្ជាក់​ពីការយល់ព្រមឲ្យក្រុមហ៊ុនប្រើប្រាស់​ព័ត៌មានរបស់ពួកគេ និងរង់ចាំ រយៈពេលត្រឹមតែ ៣ ថ្ងៃ (ថ្ងៃធ្វើការ)​ ​សម្រាប់ការអនុម័តឥណទាន​​របស់ពួកគេជាការស្រេច​។ នៅពេលទទួលបានការបញ្ជាក់ពីការអនុម័ត​ឥណទាន​ អតិថិជនអាច​ប្រើប្រាស់​ឥណទាននោះ​ដោយសេរីដើម្បីទិញទំនិញ ឬសេវានានា ពីពាណិជ្ជករដៃគូជាច្រើនរបស់ Mora តាមចំណង់ចំណូលចិត្តរបស់ពួកគេ។

 

ក្រុមហ៊ុន Smart ក្នុងនាមជាពាណិជ្ជករមួយនៅលើកម្មវិធី Mora ផ្តល់ជូននូវផលិតផលជាច្រើនប្រភេទ ដើម្បីបំពេញ​តម្រូវការ​ចម្រុះរបស់អតិថិជន។ ជាមួយឥណទានដែលបានអនុម័តរបស់ពួកគេ អតិថិជនអាចចូលទិញទំនិញជាច្រើនពី Smart​ រួមមាន ឧបករណ៍ថ្មីៗដែលភ្ជាប់ឬមិនភ្ជាប់ជាមួយគម្រោងកញ្ចប់ប្រចាំឆ្នាំ គ្រឿង​បន្លាស់ ឧបករណ៍ IoT និងជម្រើសក្នុងការជាវគម្រោង Fiber+ រយៈពេលវែង។ សេវាកម្មនេះ​ផ្តល់​ឱ្យ​អតិថិជន​ Smart នូវភាពបត់បែន និងងាយស្រួលជាងគេ ក្នុងការគ្រប់គ្រង​ហិរញ្ញវត្ថុរបស់ពួកគេខណៈ​ពេលដែលអាចទទួលបានអត្ថប្រយោជន៍ និងការសន្សំសំចៃដែលទាក់ទងនឹងការទិញរបស់ពួកគេពីហាង Smart ។ នេះគ្រាន់តែជាការចាប់ផ្តើមប៉ុណ្ណោះ ដោយសារគំរូនៃកិច្ចសហការនេះ ត្រូវបានរចនាឡើងដើម្បីអនុញ្ញាតឱ្យដៃគូកាន់តែច្រើនពីប្រព័ន្ធអេកូហិរញ្ញវត្ថុចូលរួម ដើម្បីបម្រើអតិថិជនបានកាន់តែប្រសើរ។
 

សម្រាប់ក្រុមហ៊ុន Boost ដែលជាអ្នកដឹកនាំផ្នែកឧបករណ៍បច្ចេកវិទ្យាហិរញ្ញវត្ថុប្រចាំតំបន់ មានមោទកភាព​យ៉ាងខ្លាំង ក្នុងការជំរុញការដាក់បញ្ចូលហិរញ្ញវត្ថុ តាមរយៈប្រព័ន្ធបច្ចេកវិទ្យាអេកូឡូស៊ីហិរញ្ញវត្ថុដែលមិនធ្លាប់​មាន។ តាមរយៈភាពជាដៃគូនេះ ក្រុមហ៊ុនបច្ចេកវិទ្យាហិរញ្ញវត្ថុនឹងអាចផ្តល់នូវពិន្ទុឥណទានដែលអាច​ទុកចិត្ត​បាន​ ដំណើរការដោយ​អាល់ហ្គោរីឌិម ជារូបមន្តសម្រួលដល់ការផ្តល់ហិរញ្ញប្បទាន ​ប្រកបដោយការ​ទទួលខុសត្រូវ ជូនដល់អតិថិជនរបស់ក្រុមហ៊ុន Smart។ តាមរយៈការគាំទ្រផ្នែកហិរញ្ញវត្ថុដ៏រឹងមាំ​ របស់​គ្រឹះស្ថាន​មីក្រូហិរញ្ញវត្ថុ អេ អឹម ខេ អតិថិជនអាចស្វែងរកប្រភពឥណទានដែលមានសុវត្ថិភាព និងអាច​ទុកចិត្ត​បាន ​សម្រាប់តម្រូវការទិញទំនិញរបស់ពួកគេ។
 

Mila KUSHEVA, CMO នៅក្រុមហ៊ុន Smart បានមានប្រសាសន៍ថា៖ "យើងមានសេចក្តីរំ​ភើប​​រីករាយណាស់ ក្នុង​ការ​ប្រកាស​ពី​ការចាប់ផ្តើមសម្ពោធនូវសេវាកម្ម BNPL ដែលប្រកបដោយភាព​ច្នៃ​ប្រឌិត និងតំណាងឱ្យអនាគតនៃហិរញ្ញវត្ថុឌីជីថល។ តាមរយៈកិច្ចសហការ ​ជាមួយគ្រឹះ​ស្ថាន​មីក្រូ​ហិរញ្ញវត្ថុ​ អេ អឹម ខេ ក្រុមហ៊ុន Boost និងក្រុមហ៊ុន Mora បានបង្កើតដោយ​ជោគជ័យ​នូវ​ដំណោះ​ស្រាយ BNPL ដែលគ្មានភាពរអាក់រអួល ចាប់ពីពេលចាប់ផ្តើមដល់ចុងបញ្ចប់ ដែលបង្កើនភាពងាយស្រួល និងផ្តល់លទ្ធភាពកាន់តែប្រសើរឡើង និងទូលំទូលាយជាងមុនដល់អតិថិជន ក្នុង​ការទទួលបានហិរញ្ញវត្ថុសម្រាប់ការប្រើប្រាស់ និងគាំទ្រដល់កំណើនសេដ្ឋកិច្ច។ "។
 

គួរបញ្ជាក់ផងដែលថា ចាប់ពីថ្ងៃទី ០៦ ខែវិច្ឆិកាឆ្នាំ ២០២៣នេះ តទៅ អតិថិជន​ អាចចូលប្រើ BNPL តាមរយៈវេទិកា Mora BNPL។ កិច្ចខិតខំប្រឹងប្រែងរួមគ្នារវាងក្រុមហ៊ុនដែលនាំមុខគេទាំង៤នេះ បង្ហាញពីសក្តានុពលដ៏ធំធេងនៃការបង្កើតថ្មី និងភាពជាដៃគូយុទ្ធសាស្ត្រ​ក្នុងការរៀបចំ​អនាគត​នៃសេវាកម្មហិរញ្ញវត្ថុនៅកម្ពុជា៕