បន្ទាប់ពីការឈ្លានពានរបស់រុស្ស៊ីលើអ៊ុយក្រែន បណ្តាប្រទេសជាច្រើនក្នុងនោះមានកូរ៉េខាងត្បូងផង បានប្រកាសដាក់ទណ្ឌកម្ម ដោយផ្អាកការទូទាត់ប្រាក់, វិនិយោគលើមូលបត្របំណុលរបស់រដ្ឋាភិបាល, ការដកចេញពីប្រព័ន្ធផ្ទេរប្រាក់សកល SWIFT និងទណ្ឌកម្មផ្សេងទៀត ដើម្បីដាក់សម្ពាធលើរដ្ឋាភិបាលក្រុងមូស្គូឱ្យបញ្ឈប់សកម្មភាពឈ្លានពានរបស់ខ្លួន។ 

 

ទាក់ទិននឹងបញ្ហានេះ ក្រុមហ៊ុនរថយន្តកូរ៉េខាងត្បូង Hyundai គ្រោងលក់រោងចក្ររបស់ខ្លួននៅរុស្ស៊ីក្នុងតម្លៃត្រឹម ៧៧ដុល្លារប៉ុណ្ណោះ។ តាមរយៈលិខិតដាក់លក់រោងច្រក ក្រុមហ៊ុន នឹងខាតបង់ប្រមាណ ២១៩,១៩លានដុល្លារ។ រោងចក្ររបស់ក្រុមហ៊ុន Hyundai បានផ្អាកដំណើរការនៅរុស្ស៊ីចាប់តាំងពីខែមីនា ឆ្នាំ២០២២ មក។ 

 

ពេលនេះ ក្រុមហ៊ុនរថយន្តកូរ៉េខាងត្បូង កំពុងរៀបចំកិច្ចព្រមព្រៀងលក់រោងចក្រជាមួយក្រុមហ៊ុនរុស្ស៊ី Art-Finance។ 

 

កន្លងមក ក្រុមហ៊ុនធំៗជាច្រើន បានសម្រេចលក់ជំនួញ ឬរោងចក្ររបស់ខ្លួននៅរុស្ស៊ីក្នុងតម្លៃថោកៗ ក្រោយក្រុងមូស្គូរងទណ្ឌកម្មជុំទិសពីសហគមន៍អន្តរជាតិ និងឈ្លានពានលើអ៊ុយក្រែន។ នៅក្នុងឆ្នាំ២០២២ ក្រុមហ៊ុន Nissan បានសម្រេចលក់ជំនួញរបស់ខ្លួន ក្នុងតម្លៃប្រមាណ ១ដុល្លារប៉ុណ្ណោះ ទៅឱ្យ ក្រុមហ៊ុនរដ្ឋ NAMI ដោយខាតបង់ប្រមាណ ៦៨៧លានដុល្លារ។ 

 

មិនតែប៉ុណ្ណោះ ក្រុមហ៊ុនស្រាបៀ Heineken បានសម្រេចលក់ប្រតិបត្តិការជំនួញរបស់ខ្លួនក្នុងសីហា ឆ្នាំ២០២៣ ក្នុងតម្លៃប្រមាណ ១ដុល្លារដែរ ដោយខាតបង់ប្រមាណ ៣២៥លានដុល្លារ។ ក្រុមហ៊ុនស្រាបៀមួយនេះ បានលក់ការរកស៊ីរបស់ខ្លួនឱ្យក្រុមហ៊ុនរុស្ស៊ី Arnest Group ៕