ជាផ្លូវការ លោក ចូ បៃឌិន ប្រធានាធិបតីអាម៉េរិកបានចុះហត្ថលេខាលើសេចក្តីព្រាងច្បាប់គោលនយោបាយការពារជាតិអាម៉េរិក ដោយផ្តោតលើតៃវ៉ាន់ សន្តិសុខជាតិ ចិន និងការដំឡើងប្រាក់បៀវត្សជាដើម។ 

 

ទន្ទឹមនេះ ច្បាប់គោលនយោបាយការពារជាតិនេះ អនុញ្ញាតឱ្យអាម៉េរិក បង្កើនការចំណាយលើយោធា ៨៨៦ពាន់លានដុល្លារ ដោយកើនឡើង ៣ភាគរយ បើធៀបនឹងឆ្នាំមុន។ ទំហំនេះ ធ្វើឱ្យអាម៉េរិកបន្តជាប្រទេសចំណាយលើយោធា ក្នុងទំហំដ៏ច្រើនបំផុត ដោយនាំមុខចិនប្រមាណ ៤ដង នៃការចំណាយលើយោធា។ ចិនជាប្រទេសចំណាយលើយោធាដ៏ច្រើនបំផុតលើពិភពលោក លំដាប់ទី២ ហើយនៅក្នុងឆ្នាំ២០២២ យក្សអាស៊ីមួយនេះ បានចំណាយប្រមាណ ២២៤លានដុល្លារ។

 

ក្រោមច្បាប់នេះផងដែរ អាម៉េរិក បានហាមឃាត់ការទិញថ្មផ្ទុកថាមពលពីក្រុមហ៊ុនចិនជាច្រើនផងដែរ ដើម្បីការពារសន្តិសុខថាមពលក្នុងយោធាខ្លួន។ មិនតែប៉ុណ្ណោះ អាម៉េរិក បានអំពាវនាវឱ្យពង្រឹងភាពជាដៃគូជាមួយតៃវ៉ាន់ រួមទាំងកែលម្អសមត្ថភាពការពារជាតិប្រទេសមួយនេះ និងអភិវឌ្ឍទំនាក់ទំនងប្រកបដោយមិត្តភាពជាមួយចិន។ 

 

ចំណែកជំនួយទៅអ៊ុយក្រែនវិញ ច្បាប់គោលនយោបាយការពារជាតិ បានបន្តគំនិតផ្តួចផ្តើមជំនួយសន្តិសុខអ៊ុយក្រែន ដែលមានទំហំត្រឹម ៣០០លានដុល្លារប៉ុណ្ណោះ។ ក្រោមជំនួយនេះ អាម៉េរិកនឹងបន្តជួយអ៊ុយក្រែនរហូតដល់ ឆ្នាំ២០២៦។ 

 

យ៉ាងណាមិញ ទំហំនេះ គឺទាបខ្លាំង បើធៀបនឹងជំនួយសន្តិសុខ ដែលប្រធានាធិបតីអាម៉េរិកស្វះស្វែងសម្រាប់អ៊ុយក្រែនកន្លងមក ដែលមានទំហំប្រមាណ ៨១ពាន់លានដុល្លារ៕