អ្នកចាំទីវ័យ ៣៧ឆ្នាំ បានចេញពី Spurs មុនពេលកិច្ចសន្យារបស់គេត្រូវបានផុតកំណត់នៅខែមិថុនា ឆ្នាំ ២០២៤ ដោយគេបានចុះកិច្ចសន្យា ១រដូវកាលប៉ុណ្ណោះជាមួយនឹង LAFC ដោយមានជម្រើសបន្តបន្ថែម ២ឆ្នាំ ពោលនៅក្នុងឆ្នាំ ២០២៥ និង ២០២៦ បន្ទាប់ចំណាយពេល ១១ឆ្នាំនៅក្នុងទីក្រុងឡុងដ៍។
 

«ពិតជាអរគុណដល់ការគាំទ្រចាប់តាំងពីថ្ងៃទីមួយ វាពិតជាមហាកិត្តិយសខ្លាំងណាស់ដែលបានក្លាយជាផ្នែកមួយនៃក្រុមរបស់អ្នក ក៏ដូចជាប្រធានក្រុមផងដែរ។ វាជាពេលវេលាបិទបញ្ចប់ទំព័រត្រឹមនេះ ប៉ុន្តែអ្នកនឹងនៅតែស្ថិតក្នុងបេះដូងខ្ញុំ ក្លិប Spurs នឹងនៅតែទីកន្លែងដ៏ពិសេសបំផុតសម្រាប់ខ្ញុំ និងគ្រួសារខ្ញុំ អរគុណសម្រាប់ការចងចាំដ៏ល្អដែលយើងបានចែករំលែកគ្នា ជូនពរអ្នករាល់គ្នាសំណាងល្អ។»។ Lloris បានបង្ហោះវីដេអូផ្ញើសារនៅលើបណ្តាញសង្គម Instagram បែបនេះទៅកាន់ក្លិប Spurs។
 

បង្ហាញខ្លួន ៤៤៧ប្រកួត ឱ្យ Spurs អ្នកចាំទីសញ្ជាតិបារាំងបានការងារសំណាញ់ទីមិនឱ្យរបូតគ្រាប់បាល់ចំនួន ១៥១លើក ចាប់តាំងពីចូលរួមជាមួយ Spurs ក្នុងឆ្នាំ ២០១២ មក ហើយគេក៏បានជួយក្រុមឈានជើងឡើងដល់វគ្គផ្តាច់ព្រ័ត្រ UEFA Champions League នៅក្នុងឆ្នាំ ២០១៩។
 

អតីតអ្នកគាំទ្រក្រុមជម្រើសជាតិរូបនេះ បានឈ្នះ World Cup នៅក្នុងឆ្នាំ ២០១៨ ដែលប្រទេសរុស្ស៊ីធ្វើជាម្ចាស់ផ្ទះ ហើយឈានចូលខែមករា ឆ្នាំ ២០២៣ រូបគេបានប្រកាសចូលនិវត្តន៍ពីក្រុមជម្រើសជាតិបារាំង ក្នុងនាមជាកីឡាករបង្ហាញខ្លួនច្រើនជាងគេ នៅជម្រើសជាតិថែមទៀតផង៕