លោក ហ៊ុន ម៉ានី ដែលជំរុញឱ្យមានការរៀបចំការប្រឡងនេះបានញឹកញាប់ជាងនេះ បានអធិប្បាយប្រាប់សារព័ត៌មានថ្មីៗយ៉ាងដូច្នេះ៖«ការបំផុសឱ្យមានការថែរក្សាអក្សរសាស្ត្រខ្មែរពិតជាពិសេសមែនទែន។ ការចូលរួមរបស់ព្រះសង្ឃ និងពលរដ្ឋគ្រប់វ័យ គ្រប់មជ្ឈដ្ឋានបានបញ្ជាក់ថា ប្រជាជនខ្មែរពិតជាទុកអត្តសញ្ញាណ និងអក្សរសាស្ត្រខ្មែរនៅក្នុងបេះដូងរបស់ពួកគាត់។»។

 

ទន្ទឹមគ្នានេះ លោក ហ៊ុន ម៉ានី ក៏បានបង្ហាញការសាទរនេះ នៅលើទំព័រហ្វេសប៊ុករបស់លោកផងដែរ។ 

 

ប្រជាជនខ្មែរគ្រប់វ័យ ចាប់ពីអាយុក្រោម១០ឆ្នាំ រហូតដល់ជាង៦០ឆ្នាំ រួមទាំងមានវត្តមានព្រះសង្ឃផង បានចុះឈ្មោះចូលរួមប្រឡងសរសេរតាមអានជាសាធារណៈថ្នាក់ជាតិនៅមុខប្រាសាទអង្គរ។ កម្មវិធីនេះត្រូវបានគាំទ្រដោយក្រសួងអប់រំ យុវជន និងកីឡា, ក្រសួងវប្បធម៌ និងវិចិត្រសិល្បៈ, ក្រសួងទេសចរណ៍ សារព័ត៌មាន និងវិស័យឯកជនជាច្រើន។

 

លោក ហ៊ុន ម៉ានី បានសរសេរថា គំនិតផ្តួចផ្ដើមរៀបចំព្រឹត្តិការណ៍ សំណេរអង្គរ បានបង្ហាញអំពីការចូលរួមអភិរក្ស ថែរក្សា និងលើកស្ទួយអក្សរសាស្ត្រខ្មែរដែលជាអត្តសញ្ញាណមួយរបស់ជាតិ។ 
 

លោករដ្ឋមន្ត្រីក្រសួងមុខងារសាធារណៈបានបន្តយ៉ាងដូច្នេះទៀតថា៖«ជាពិសេស ការរៀបចំកម្មវិធីនៅក្នុងទីតាំងដែលជា សម្បត្តិបេតកភណ្ឌរបស់ជាតិ គឺជាការផ្សារភ្ជាប់កុលបុត្រ ខ្មែរទៅនឹងព្រលឹងបុព្វបុរស ដូនតារបស់យើង។ អក្សរសាស្រ្ត និងភាសាខ្មែរគឺជាមូលដ្ឋាននៃខឿនប្រជាជាតិ និងអត្តសញ្ញាណជាតិ ដែលបានកកើតលើទឹកដីខ្មែរអស់កាលដ៏យូរលង់ ដែលឆ្លុះបញ្ចាំងពីអារ្យធម៌ និងប្រវត្តិសាស្ត្រដ៏រុងរឿងរបស់ខ្មែរ។»។


 

លើសពីការសាទរដល់ការរៀបចំព្រឹត្តិការណ៍សរសេរតាមអានជាសាធារណៈ លោក ហ៊ុន ម៉ានី ក៏បានអំពាវនាវដល់ប្រជាជនខ្មែរទាំងអស់ចូលរួមប្រើប្រាស់អក្សរសាស្រ្តឱ្យបានត្រឹមត្រូវ និងឱ្យបានច្រើន ខណៈដែលលទ្ធភាព និងភាពសម្បូរបែបនៃ ការប្រើប្រាស់អក្សរខ្មែរក្នុងពេលបច្ចុប្បន្ន មានកាន់តែទូលំទូលាយក្នុងយុគសម័យឌីជីថល។ «ខ្ញុំពិតជាមានមោទនភាព ដែលកម្មវិធីទទួលការចូលរួមពីប្រជាពលរដ្ឋគ្រប់ទិសទី ដែលរួមមានទាំង ព្រះតេជគុណព្រះសង្ឃ កុមារាកុមារី ក៏ដូចជាយុវជនយ៉ាងច្រើនកុះករ ដែលនេះសរបញ្ជាក់ឱ្យឃើញថា កូនខ្មែរមានស្មារតី និងឆន្ទៈក្នុងការការពារថែរក្សាអ្វីដែលជាអត្តសញ្ញាណជាតិរបស់យើង។»។ នេះជាការអត្ថាធិប្បាយរបស់លោក ម៉ានី មុននឹងលោកបញ្ជាក់ថា អក្សរសាស្រ្តខ្មែរ ជាដួងព្រលឹងជាតិ ហើយនេះជាភារកិច្ចរបស់ប្រជាជនម្នាក់ៗស្មើៗគ្នា៕