អន្តរជាតិ
លោក Trump ទំនងជានឹងទទួលបានការតែងតាំងជាបេក្ខជនប្រធានាធិបតីបក្សសាធារណរដ្ឋជាថ្មី
23, Jan 2024 , 6:59 pm
លោក Donald Trump ថ្លែងនៅក្នុងកម្មវិធីយុទ្ធនាការឃោសនាបោះឆ្នោតមួយ នៅទីក្រុង Manchester នៃរដ្ឋ New Hampshire សហរដ្ឋអាមេរិក កាលពីថ្ងៃទី២០ ខែមករា ឆ្នាំ២០២៤។
×![]()
ដោយ: VOA
អតីតប្រធានាធិបតីសហរដ្ឋអាមេរិកលោក Donald Trump ទំនងហាក់ដូចជានឹងទទួលបានជ័យជម្នះដ៏សំខាន់ជាថ្មីម្តងទៀត ក្នុងការប្រកួតប្រជែងស្វែងរកការតែងតាំងជាបេក្ខជនប្រធានាធិបតីឆ្នាំ២០២៤ សម្រាប់គណបក្សសាធារណរដ្ឋ ដោយការស្ទង់មតិបង្ហាញថា លោកមានសំឡេងគាំទ្រនាំមុខខ្ពស់ខ្លាំង នៅក្នុងការបោះឆ្នោតបឋម ដែលនឹងប្រព្រឹត្តធ្វើនៅថ្ងៃអង្គារ នៅក្នុងរដ្ឋ New Hampshire ដែលស្ថិតនៅភាគឦសាន្តប្រទេសអាមេរិក។
លោក Trump ក៏ទទួលបានការជំរុញលើកទឹកចិត្តខ្លាំង ទាំងនៅក្នុងរដ្ឋ New Hampshire និងការប្រកួតប្រជែងជាទូទៅ ដោយកាលពីថ្ងៃអាទិត្យ អភិបាលរដ្ឋ Florida លោក Ron DeSantis បានប្រកាសបញ្ចប់យុទ្ធនាការឃោសនាបោះឆ្នោតរបស់លោក។
លោក DeSantis បានបរាជ័យដោយមិនទទួលបានតាមការរំពឹងទុករបស់លោកដែលថា លោកនឹងក្លាយជាអ្នកប្រជែងដ៏សំខាន់មួយតទល់ជាមួយលោក Trump ហើយការចាកចេញពីការប្រកួតប្រជែងនេះបានទុកឱ្យលោក Trump និងអតីតអភិបាលរដ្ឋ South Carolina អ្នកស្រី Nikki Haley ជាគូប្រជែងដ៏សំខាន់តែពីរនាក់ប៉ុណ្ណោះ ក្នុងការប្រជែងយកតំណែងជាបេក្ខជនប្រធានាធិបតីរបស់គណបក្សសាធារណរដ្ឋ។
ក្នុងការស្ទង់មតិថ្មីមួយកាលពីថ្ងៃទី២១ របស់ទូរទស្សន៍ CNN បានបង្ហាញថា លោក Trump មានសំឡេងគាំទ្រចំនួន ៥០ភាគរយ នៅក្នុងការបោះឆ្នោតបឋមក្នុងរដ្ឋ New Hampshire ដែលជាចំនួនខ្ពស់ដាច់មួយលើអ្នកស្រី Haley ដែលមានសំឡេងគាំទ្រចំនួន ៣៩ភាគរយ ហើយលោក DeSantis មានសំឡេងគាំទ្រ ៦ភាគរយ។ អ្នកស្រី Haley ធ្លាប់បម្រើការងារជាឯកអគ្គរដ្ឋទូតសហរដ្ឋអាមេរិកប្រចាំអង្គការសហប្រជាជាតិ នៅក្រោមរដ្ឋបាលរបស់លោក Trump។
លោក Trump បានឈ្នះការបោះឆ្នោតបឋមក្នុងរដ្ឋ Iowa ភាគកណ្តាលខាងលិចសហរដ្ឋអាមេរិកដែលសម្បូរដោយកសិដ្ឋានកាលពីសប្តាហ៍មុន ដោយទទួលបានសំឡេងឆ្នោតគាំទ្រជាង ៥០ភាគរយ ដែលលើស ២ខ្ទង់ លើលោក DeSantis និងអ្នកស្រី Haley។
លោក Trump និងអ្នកស្រី Haley បានរិះគន់គ្នាទៅវិញទៅមកកាលពីចុងសប្តាហ៍នេះ ខណៈពេលដែលលោក DeSantis បានទៅកាន់រដ្ឋ South Carolina និងវិលត្រឡប់មកកាន់រដ្ឋ New Hampshire វិញ មុនពេលលោកប្រកាសបញ្ចប់ការប្រកួតប្រជែងយកតំណែងគ្រប់គ្រងសេតវិមាននេះ៕
© រក្សាសិទ្ធិដោយ thmeythmey.com
