នាយកដ្ឋានជំរឿន និងស្ថិតិ បានលើកឡើងក្នុងសេចក្ដីថ្លែងការណ៍មួយថា តម្លៃអាហារបានកើនឡើងដល់ ១,៦ ភាគរយក្នុងខែធ្នូ ក្រោយធ្លាក់ចុះ ២,២ភាគរយកាលពីខែវិច្ឆិកា។ យ៉ាងណាមិញតម្លៃទំនិញក្រៅពីអាហារបានធ្លាក់ចុះ ៦,៣ ភាគរយក្នុងខែវិច្ឆិកា ប្រៀបនឹង ៧,១ភាគរយក្នុងឆ្នាំ ២០២២។

 

សន្ទស្សន៍តម្លៃទំនិញប្រើប្រាស់ជាតិ (NCPI) បង្ហាញអំពីអតិផរណានៃតម្លៃទំនិញលក់រាយ យ៉ាងទូលំទូលាយដែលបានកើនឡើងពី ២,៨ ភាគរយក្នុងខែវិច្ឆិកាកន្លងទៅ។

 

ជុំវិញបញ្ហានេះ អ្នកវិភាគបានលើកឡើងថា គោលដៅកែលម្អហិរញ្ញវត្ថុសាធារណៈ ដែលរួម បញ្ចូលការបង្កើនតម្លៃថាមពល ១៨ភាគរយ នៅក្នុងខែតុលា ក៏បានប៉ះពាល់ដល់អតិផរណាផងដែរ។

 

«ពួកយើងរំពឹងថាអតិផរណានឹងទាបជាង ៥ ភាគរយនៅចុងខែមករា... ទោះបីជាមានការបង្កើនពន្ធក៏ដោយ»។ ប្រធានផ្នែកស្រាវជ្រាវនៅក្រុមហ៊ុន First Capital Research លោក Dimantha Mathew លើកឡើងបែបនេះ ដោយបន្ថែមថា ការកើនឡើងអតិផរណានឹងមានរយៈពេលខ្លី ដោយសារតែឥទ្ធិពលមូលដ្ឋានខ្ពស់ពីឆ្នាំមុន។

 

ធនាគារកណ្តាលរបស់ស្រីលង្កា (CBSL) ត្រូវបានរំពឹងថានឹងទុកអត្រាគោលនយោបាយ សំខាន់ៗរបស់ខ្លួនដោយមិនផ្លាស់ប្តូររហូតដល់ថ្ងៃទី២៣ ខែមករា ដើម្បីគ្រប់គ្រងអតិផរណា។

 

គួរបញ្ជាក់ថា ស្រីលង្កាធ្លាប់ឆ្លងកាត់អតិផរណាខ្ពស់បំផុតដែលឈានដល់កម្រិត ៧០ ភាគរយក្នុងខែកញ្ញា ឆ្នាំ ២០២២ បន្ទាប់ពីសេដ្ឋកិច្ចត្រូវបានជាប់គាំង ដោយសារវិបត្តិហិរញ្ញវត្ថុដ៏​អាក្រក់បំផុតក្នុងរយៈពេលជាច្រើនទស្សវត្សដែលបង្កឡើងដោយការធ្លាក់ចុះនៃទុនបម្រុងរូបិយប័ណ្ណបរទេស។ 

 

ក្រោយទទួលបានការគាំទ្រដោយថវិកាសង្គ្រោះចំនួន ២,៩ពាន់លាន​ ដុល្លារពីមូលនិធិរូបិយវត្ថុអន្តរជាតិ (IMF) អតិផរណាបានចាប់ផ្តើមធ្លាក់ចុះកាលពីខែមិថុនា ឆ្នាំមុន ប៉ុន្តែទំនងជាកើនឡើងចាប់ពីខែមករាដោយសារស្រីលង្កាដំឡើងពន្ធលើតម្លៃបន្ថែម ដល់ ១៨ ភាគរយពី ១៥ ភាគរយ ដើម្បីបំពេញតាមគោលដៅចំណូលដែលកំណត់ដោយ IMF៕