រដ្ឋមន្ត្រីមហាផ្ទៃ និង រដ្ឋមន្ត្រីនគរបាលវៀតណាម បានចុះហត្ថលេខាលើផែនការសហប្រតិបត្តិការឆ្នាំ២០២៤ ដើម្បីបន្តអនុវត្តយន្តការនានា ក៏ដូចជាវិធានការច្បាប់ឱ្យកាន់តែសកម្ម។ ប្រទេសទាំងពីរ បានព្រមព្រៀងគ្នា បង្កើនការបង្រ្កាបបទល្មើសឆ្លងដែន ក្នុងក្របខណ្ឌទ្វេភាគី និងតំបន់។ 

 

កម្ពុជា-វៀតណាម ក៏ឯកភាពគ្នា ផ្លាស់ប្តូរបទពិសោធន៍ការងារ និងការអភិវឌ្ឍធនធានមនុស្ស ដើម្បីឆ្លើយតបបានសមស្របទៅនឹងការវិវត្តស្មុគស្មាញនៃបទល្មើស ជាពិសេសបទល្មើសមិនប្រពៃណី ដែលកំពុងកើនឡើងយ៉ាងឆាប់រហ័ស។

 

ជាមួយគ្នាដែរ រដ្ឋមន្ត្រីទាំងពីរ យល់ព្រមសហការជំរុញការបើកដំណើរការបណ្តាច្រកទ្វារព្រំដែនអន្តរជាតិ ដើម្បីឱ្យសមស្របតាមបរិបទរីកចម្រើននៃសេដ្ឋកិច្ចសង្គម ព្រមទាំងកំណើននៃការផ្លាស់ប្តូរពាណិជ្ជកម្ម ,ការផ្លាស់ប្តូររវាងប្រជាជន និងប្រជាជន និងការលើកកម្ពស់ជីវភាពរស់នៅប្រជាពលរដ្ឋ ឱ្យកាន់តែប្រសើរឡើង៕