អន្តរជាតិ
នយោបាយអន្តរជាតិ
ផ្តាច់ទូតជាមួយតៃវ៉ាន់មិនដល់កន្លះខែ ណូរូ បានបង្កើតទំនាក់ទំនងឡើងវិញជាមួយចិន 24, Jan 2024 , 8:19 pm
លោក វ៉ាង យី រដ្ឋមន្រ្តីការបរទេសចិន (ស្តាំ) និងសមភាគីណូរូ លោក Lionel Aingimea ក្នុងពិធីចុះហត្ថលេខាទំនាក់ទំនងការទូតឡើងវិញ។ រូបភាព ៖ Xinhua
× ចិន និងកោះណូរូបានបង្កើតទំនាក់ទំនងទូតឡើងវិញជាផ្លូវការ នៅថ្ងៃទី២៤ ខែមករា បន្ទាប់ពីប្រទេសកោះប៉ាស៊ីហ្វិកដ៏តូចមួយនេះ បានផ្តាច់ទំនាក់ទំនងដោយមិននឹកស្មានជាមួយតៃវ៉ាន់ កាលពីពេលថ្មីៗនេះ។
ក្នុងពិធីមួយនៅទីក្រុងប៉េកាំង រដ្ឋមន្ត្រីការបរទេសចិន លោក វ៉ាង យី និងសមភាគីណូរូលោក Lionel Aingimea បានចុះហត្ថលេខាជាផ្លូវការនូវឯកសារមួយក្នុងគោលបំណងស្តារទំនាក់ទំនងទ្វេភាគីឡើងវិញ ដោយចំណងមិត្តភាពនៅថ្នាក់ឯកអគ្គរដ្ឋទូតនឹងចាប់ផ្តើមឡើងវិញភ្លាមៗ។ នេះបើយោងតាមសារព័ត៌មាន Reuters ។
ក្នុងទំនាក់ទំនងការទូត ណូរូ បានទទួលស្គាល់ចិនដីគោក នៅក្នុងខែសីហា ឆ្នាំ២០០២ មុនពេលទទួលស្គាល់តៃវ៉ាន់ជាផ្លូវការនៅក្នុងខែឧសភា ឆ្នាំ២០០៥។ រដ្ឋាភិបាលក្រុងយ៉ាវែន និងក្រុងតៃប៉ិ មានទំនាក់ទំនងការទូត ២២ឆ្នាំ បន្ទាប់ពីទទួលស្គាល់ចិនឡើងវិញ។
លោក វ៉ាង យី បានសង្កត់ធ្ងន់ថា ៖« ទោះបីចិន និងណូរូមានភូមិសាស្ត្រឆ្ងាយពីគ្នា និងបំបែកដោយមហាសមុទ្រដ៏ធំក៏ដោយ មិត្តភាពរវាងប្រជាជនទាំងពីរមានប្រវត្តិយូរអង្វែង»។
ជាការឆ្លើយតប លោក Aingimea បានអះអាងថា ណូរូទន្ទឹងរង់ចាំទំនាក់ទំនងថ្មីជាមួយចិន ហើយទំនាក់ទំនងនេះនឹងត្រូវបានកសាងឡើងដោយភាពរឹងមាំ និងផ្អែកលើយុទ្ធសាស្ត្រអភិវឌ្ឍន៍។
ណូរូបានផ្តាច់ទំនាក់ទំនងការទូតជាមួយតៃវ៉ាន់ នៅថ្ងៃទី១៥ ខែមករា ត្រឹមតែពីរថ្ងៃបន្ទាប់ពីលោក William Lai ប្រធានគណបក្សប្រជាធិបតេយ្យជឿនលឿនដែលកំពុងកាន់អំណាចនៅតៃវ៉ាន់ បានឈ្នះការបោះឆ្នោតប្រធានាធិបតី។
ទន្ទឹមនេះ អាម៉េរិកកាលពីសប្តាហ៍មុនបានលើកឡើងថា ការសម្រេចចិត្តរបស់ណូរូក្នុងការកាត់ទំនាក់ទំនងជាមួយតៃវ៉ាន់គឺជាទង្វើគួរឱ្យសោកស្តាយ និងខកចិត្តយ៉ាងខ្លាំង។ ទីក្រុងវ៉ាស៊ីនបានព្រមានថា ការសន្យារបស់ទីក្រុងប៉េកាំងជាញឹកញាប់មិនដែលបានសម្រេចនោះទេ។
ក្នុងពេលបច្ចុប្បន្ន តៃវ៉ាន់ នៅសល់រដ្ឋទទួលស្គាល់ផ្នែកការទូតត្រឹម ១២ប៉ុណ្ណោះ ដោយក្នុងនោះ មិនមានអាម៉េរិក និងប្រទេសលោកខាងលិចឡើយ។
ការងាកទៅចាប់ដៃចិនពីបណ្តាប្រទេសមួយចំនួន ដែលធ្លាប់មានទំនាក់ទំនងតៃវ៉ាន់ អាចដោយសារការអភិវឌ្ឍ និងការវិនិយោគនៅក្នុងប្រទេស, គោលនយោបាយចិនតែមួយ និងបញ្ហាផ្សេងទៀតជាដើម៕
© រក្សាសិទ្ធិដោយ thmeythmey.com