ដោយ៖ឈាង បុប្ផា/RFI
បារាំងទាត់ចោលការចោទប្រកាន់ដែលថា មានទាហានស៊ីឈ្នួលបារាំង នៅក្នុងសមរភូមិអ៊ុយក្រែន។ តាមសេចក្តីប្រកាសព័ត៌មានរបស់ក្រសួងការពារជាតិបារាំង នៅថ្ងៃសុក្រទី ២៦មករា បារាំងកំណត់បានអត្តសញ្ញាណខ្សែបណ្តាញរុស្ស៊ីដែលចុះផ្សាយព័ត៌មានក្លែងក្លាយ ក្នុងគោលដៅបង្ខូចកេរ្តិ៍ឈ្មោះបារាំង។ ក្រសួងការពារជាតិបារាំង ចេញមុខបកស្រាយ យ៉ាងដូច្នេះ នៅ ពីរថ្ងៃក្រោយសភាឌូម៉ារបស់រុស្ស៊ី បោះឆ្នោតលើសេចក្តីសម្រេច ទាមទារឲ្យភាគីបារាំងបរិហាររិះគន់វត្តមានទាហានស៊ីឈ្នួលបារាំងនៅក្នុងសង្រ្គាមអ៊ុយក្រែន។
ចាប់តាំងពីផ្ទុះសង្រ្គាមរុស្ស៊ីឈ្លានពានអ៊ុយក្រែន បារាំងបានក្លាយជាផ្ទាំងស៊ីបវាយប្រហាររបស់ក្រុមផ្សព្វផ្សាយព័ត៌មានមិនពិតរុស្ស៊ី។ ប៉ុន្តែ ក្រសួងការពារជាតិបារាំងសង្កេតឃើញ និន្នាការចុះផ្សាយព័ត៌មានក្លែងក្លាយ ដើម្បីបង្ខូចកេរ្តិ៍ឈ្មោះ បារាំង កើនឡើងចំនួនកាន់តែច្រើន និងមានប្រភពពីរុស្ស៊ី នៅបន្ទាប់ពី ប្រមុខរដ្ឋបារាំង លោកម៉ាក្រុងប្រកាសគាំទ្រអ៊ុយក្រែន។
“យើងមិនអាចបណ្តោយឲ្យរុស្ស៊ីឈ្នះសង្រ្គាមបានទេ” នេះជាប្រសាសន៍របស់ប្រធានាធិបតីបារាំង នៅក្នុងសន្និសីទកាសែតកាលពីថ្ងៃទី ១៦មករា មុននឹងសន្យាបញ្ជូនមីស៊ីលបាញ់រយៈចម្ងាយឆ្ងាយទៅអ៊ុយក្រែន។
មួយថ្ងៃក្រោយ ការប្រកាសរបស់ប្រធានាធិបតីបារាំង ក្រសួងការពារជាតិរុស្ស៊ីអះអាងថា ខ្លួនបាញ់បំផ្លាញ អគារស្នាក់នៅមួយកន្លែងក្នុងទីក្រុងខាកៀវ ដែលជាកន្លែងប្រមូលផ្តុំទាហានស៊ីឈ្នួលបរទេស ក្នុងនោះមានទាហានស៊ីឈ្នួលបារាំង។ បើតាមម៉ូស្គូ ការវាយប្រហារបានសម្លាប់ទាហានស៊ីឈ្នួលបារាំង ៦០នាក់។
ព័ត៌មាននេះត្រូវកាសែតក្នុងស្រុករុស្ស៊ីចុះផ្សាយយ៉ាងព្រោងព្រាត រហូតដល់ថ្ងៃពុធ សភាឌូម៉ារុស្ស៊ីបានបោះឆ្នោត អនុម័តសេចក្តីសម្រេចទាមទារឲ្យសភាបារាំងបរិហារសកម្មភាពរបស់ទាហានស៊ីឈ្នួលបារាំង នៅអ៊ុយក្រែន។
សភារុស្ស៊ីអះអាងថា ខ្លួនមានព័ត៌មានគួរឲ្យជឿទុកចិត្ត ដែលថា ទាហានស៊ីឈ្នួលបារាំងចូលរួមកៀកស្មាទាហានអ៊ុយក្រែននៅក្នុងសមរភូមិប្រយុទ្ធតទល់រុស្ស៊ី ប៉ុន្តែ ទាំងវិមានក្រេមឡាំង និងសភាឌូម៉ាមិនបានផ្តល់ភស្តុតាង ដើម្បីបញ្ជាក់ចោទប្រកាន់របស់ខ្លួន។
នៅសប្តាហ៍មុន ក្រសួងការបរទេសរុស្ស៊ីបានកោះហៅឯកអគ្គរដ្ឋទូតបារាំងប្រចាំម៉ូស្គូ ឲ្យចូលឆ្លើយបំភ្លឺការចូលរួម លូកដៃកាន់តែជ្រៅរបស់បារាំងក្នុងសមរភូមិអ៊ុយក្រែន។
នៅថ្ងៃសុក្រ ក្រសួងការពារជាតិបារាំងចេញមុខទាត់ចោលការចោទប្រកាន់ ដោយថា បារាំងគ្មានទាហានស៊ីឈ្នួល ដូចប្រទេសដទៃ។ ដោយមិននិយាយចំឈ្មោះរុស្ស៊ីដែលមានទាហានស៊ីឈ្នួលវ៉ាក់ណែរ លូកដៃសកម្មខ្លាំងក្នុងសង្រ្គាមអ៊ុយក្រែន ក្រសួងការពារជាតិបារាំងពន្យល់ថា ច្បាប់បារាំងហាមឃាត់មិនឲ្យមានការរើសទាហានស៊ីឈ្នួល ឬស៊ីឈ្នួលធ្វើសង្រ្គាមនៅទឹកដីបរទេស។
អ្នកដែលល្មើសច្បាប់ត្រូវប្រឈមនឹងការដាក់ទោសជាប់ពន្ធនាគារ ៥ឆ្នាំ និងបង់ប្រាក់ពិន័យ ៧៥០០០អឺរ៉ូ។
សម្រាប់ក្រសួងការបរទេសបារាំង ការចុះផ្សាយដែលថា មានជនជាតិបារាំងជាទាហានស៊ីឈ្នួលក្នុងសង្រ្គាមអ៊ុយក្រែន ជាផ្នែកមួយនៃយុទ្ធនាការផ្សព្វផ្សាយព័ត៌មានក្លែងក្លាយរបស់បណ្តាញរុស្ស៊ី នៅក្នុងគោលដៅ សំអុយ បង្ខូចឈ្មោះបារាំង។ សូម្បី កាសែតក្នុងស្រុករុស្ស៊ី ដែលមានតាំងពីកាសែតSputnik News RT RIA Novosti ក៏បានចូលរួមផ្សាយបំប៉ោងព័ត៌មានក្លែងក្លាយ យ៉ាងព្រោងព្រាត ដើម្បីបំភាន់មតិមហាជនឲ្យស្អប់ខឹងរដ្ឋាភិបាលបារាំង។
ជាការពិត នៅពេលចាប់ផ្ទុះសង្រ្គាមរុស្ស៊ីឈ្លានពានអ៊ុយក្រែន នៅដើមឆ្នាំ ២០២២ មានជនបរទេស ជាច្រើនដែលមានសមានចិត្តជាមួយពលរដ្ឋអ៊ុយក្រែន ស្ម័គ្រចិត្តទៅប្រយុទ្ធជួយអ៊ុយក្រែន។ បើតាមមន្រ្តីទូតបារាំងដកស្រង់សំដីដោយទីភ្នាក់ងារព័ត៌មានបារាំង AFP ក្នុងចំណោមឈ្មោះបារាំង ដែលព័ត៌មានរុស្ស៊ីចុះផ្សាយ មួយចំនួនអាចជាទាហានដែលអ៊ុយក្រែនដាក់បញ្ចូលក្នុងកងពលទាហានបរទេសរបស់ខ្លួន ប៉ុន្តែ មានឈ្មោះច្រើនទៀតនៅក្នុងបញ្ជីរបស់រុស្ស៊ី ដែលជាឈ្មោះក្លែងក្លាយ៕