លទ្ធផលបណ្ដោះអាសន្ននៃការបោះឆ្នោតសភាទូវ៉ាលូដែលផ្សាយនៅថ្ងៃទី២៧ ខែមករា បង្ហាញថា លោក Kausea Natano ប្រមុខរដ្ឋាភិបាលដែលមាននិន្នាការទៅរកតៃវ៉ាន់ មិនបានជាប់ឆ្នោតឡើយ ខណៈលោក Seve Paeniu ដែលសម្លឹងឃើញកៅអីនាយករដ្ឋមន្រ្តីដែរនោះ ជាប់ឆ្នោតជាសមាជិកសភាទូវ៉ាលូ។

 

មុនការបោះឆ្នោត លោក Natano សន្យាបន្តទំនាក់ទំនងជាមួយតៃវ៉ាន់ ដែលចំណងការទូតត្រូវតភ្ជាប់តាំងពីឆ្នាំ១៩៧៩មក។ ទូវ៉ាលូដែលមានប្រជាជនមិនដល់១២០០០នាក់ផង ស្ថិតក្នុងចំណោមដែនកោះប៉ាស៊ីហ្វិកចំនួន៣ ដែលនៅតែក្រសោបតៃវ៉ាន់។ ចំណែកលោក Paeniu ប្ដេជ្ញាសើរើទំនាក់ទំនងនេះឡើងវិញ ហើយរដ្ឋាភិបាលថ្មីនឹងសម្រេចថា ងាកទៅចិន ឬបន្តទទួលស្គាល់តៃវ៉ាន់ ដែលនឹងផ្ដល់ប្រយោជន៍ដល់ប្រជាជន។

 

បេក្ខជនជាប់ឆ្នោតម្នាក់ទៀតដែលមានភាគរយច្រើនក្នុងការដឹកនាំរដ្ឋាភិបាល Enele Sopoaga មានជំហររក្សាទំនាក់ទំនងជាមួយតៃវ៉ាន់ដែរ តែលោកចង់លុបចោលសន្ធិសញ្ញាសន្តិសុខជាមួយអូស្ត្រាលី។ លោក Paeniu កំពុងកៀរគរការគាំទ្រពីបេក្ខជនជាប់ឆ្នោតផ្សេងទៀត ដើម្បីអាចអង្គុយកៅអីនាយករដ្ឋមន្រ្តីបាន។ 

 

តៃវ៉ាន់វិញ អះអាងថា បេក្ខជនដែលជាប់ឆ្នោតភាគច្រើន សុទ្ធតែចង់បន្តចំណងការទូតជាមួយខ្លួន។

 

បច្ចុប្បន្ន តៃវ៉ាន់នៅសល់ប្រទេស១២ប៉ុណ្ណោះដែលទទួលស្គាល់ឯករាជ្យ។ ប្រទេសទាំងនោះ សុទ្ធសឹងជារដ្ឋក្រីក្រ និងជាដែនកោះតូចៗនៅប៉ាស៊ីហ្វិក ការ៉ាអ៊ីប និងអាហ្វ្រិក៕