វិបត្តិអចលនទ្រព្យនៅចិន បានបន្តអូសបន្លាយជាង២ឆ្នាំមកហើយ ដែលមិនមានសញ្ញាណនៃការធូរស្រាល។ ក្រុមហ៊ុនអចលនទ្រព្យចិន និងរដ្ឋាភិបាលក្នុងតំបន់កំពុងស្វែងរកមធ្យោបាយទាក់ទាញអ្នកទិញផ្ទះ។ អ្នកខ្លះថែមទាំងប្រើយុទ្ធសាស្ត្រទីផ្សារចម្លែកៗដូចជា ទិញផ្ទះថែមជូនប្រពន្ធ មាសជាដើម ដើម្បីប្រមូលចំណាប់អារម្មណ៍អតិថិជនឱ្យទិញផ្ទះ។
វិបត្តិអចលនទ្រព្យ កំពុងទាញទម្លាក់កំណើនសេដ្ឋកិច្ចចិនឱ្យធ្លាក់ចុះ។ ការណ៍នេះបណ្តាលឱ្យមានរលកនៃការបញ្ឈប់ការងារ ព្រមទាំងមានក្រុមហ៊ុនអចលនទ្រព្យតម្លៃរាប់ពាន់លានដុល្លារបានដួលរលំ។ អ្នកសេដ្ឋកិច្ចជាច្រើនព្យាករថា ស្ថានភាពនេះនឹងបន្តកាន់តែអាក្រក់ទៅៗ។
តាមទិន្នន័យពីអគ្គនាយដ្ឋានស្ថិតិចិន ការលក់ផ្ទះដែលទើបសាងសង់ថ្មីនៅក្នុងឆ្នាំ ២០២៣ បានថយចុះចំនួន ៦ភាគរយបើធៀបឆ្នាំ២០២២ ដែលវាជាការធ្លាក់ចុះមួយមិនធ្លាប់មានចាប់តាំងពីឆ្នាំ ២០១៦។ យោងតាមទិន្នន័យពីក្រុមហ៊ុនឈ្មួញកណ្តាលអចលនទ្រព្យ Centaline Property តម្លៃផ្ទះដែលត្រូវបានលក់ក្នុងទីក្រុងចំនួន៤ មានប៉េកាំង សៀងហៃ ក្វាងចូវ និងសិនជិនបានថយចុះចន្លោះ ១១-១៤ភាគរយនៅក្នុងខែធ្នូធៀបគ្រាដូចគ្នាកាលពីឆ្នាំ២០២២។
ទន្ទឹមនេះ ចំនួនគម្រោងថ្មីរបស់ក្រុមហ៊ុនអភិវឌ្ឍន៍អចលនទ្រព្យក៏មានការថយចុះយ៉ាងខ្លាំងដែរ។ ម្ចាស់ផ្ទះស្វែងរកវិធីដើម្បីសងប្រាក់កម្ចីទិញផ្ទះមុនកាលកំណត់ និងខ្ចីប្រាក់តិចជាងមុន។
តាមទិន្នន័យពីក្រុមហ៊ុនហិរញ្ញវត្ថុ S&P Global Ratings បានឱ្យដឹងថា វិស័យអចលនទ្រព្យ ដែលធ្លាប់តែមានការរីកចម្រើនយ៉ាងឆាប់រហ័ស ពេលនេះអាជីវកម្មអចលនទ្រព្យចិនបានជាប់គាំងដែលអូសបន្លាយពេល ជាពិសេសជាមួយវិនិយោគិនបរទេសក្រោយពីបានឃើញចំនួនសញ្ញាបណ្ណបរទេសមានដល់ ១២៥ពាន់លានដុល្លារក្នុងកំឡុងឆ្នាំ ២០២០-២០២៣។
កាសែត Wall Street Journal (WSJ) នៅថ្ងៃទី២៣ ខែមករា បានកត់សម្គាល់ថា អ្នកអភិវឌ្ឍន៍អចលនទ្រព្យ និងរដ្ឋាភិបាលតំបន់នៅក្នុងប្រទេសចិនកំពុងស្វែងរកវិធីដើម្បីទាក់ទាញអ្នកទិញផ្ទះ។ អ្នកខ្លះថែមទាំងប្រើយុទ្ធសាស្រ្តទីផ្សារចម្លែកៗទៀតផង។
កាលពីឆ្នាំ២០២៣ ក្រុមហ៊ុនអចលនទ្រព្យមួយក្នុងទីក្រុង Tianjin បានបញ្ចេញវីដេអូផ្សព្វផ្សាយបែបកំប្លែងមួយដែលមានខ្លឹមសារថា«ទិញផ្ទះថែមជូនប្រពន្ធដោយឥតគិតថ្លៃ»។ ការពិតខ្លឹមសារបែបនេ មានន័យថា ទិញផ្ទះជូនប្រពន្ធនោះទេ។ ប៉ុន្តែដោយសារការផ្សាយពាណិជ្ជកម្មបែបនេះ ក្រុមហ៊ុនត្រូវបានផាកពិន័យជាង ៤០០០ដុល្លារ។
បន្ថែមពីនេះ អគារអាផាតមិនមួយក្នុងខេត្ត Zhejiang ក៏បានផ្សាយពាណិជ្ជកម្មផ្តល់ដុំមាស ១០ក្រាមដល់អ្នកទិញផ្ទះនៅទីនេះ។
កាលពីដើមខែនេះ នៅក្នុងសន្និសីទមួយ លោក Sheng Song Cheng អតីតប្រធាននាយកដ្ឋានស្ថិតិនៃធនាគារកណ្តាលចិន (PBOC) បាននិយាយថា ការធ្លាក់ចុះនៃទីផ្សារអចលនទ្រព្យនឹងត្រូវប្រើរយៈពេល ២ឆ្នាំទៀត។ លោកព្យាករថា ការលក់ផ្ទះថ្មីនឹងធ្លាក់ចុះជាង ៥ភាគរយជារៀងរាល់ឆ្នាំនៅឆ្នាំ២០២៤ និង២០២៥។
លើសពីនេះ ក៏មានអ្នកជំនាញជាច្រើនបានព្រមានថា ទីផ្សារអចលនទ្រព្យរបស់ចិននឹងស្ថិតក្នុងវិបត្តិជាបន្តបន្ទាប់ ហើយនឹងមិនងើបឡើងវិញក្នុងពេលដ៏ខ្លីខាងមុខនេះទេ។
លោក Raymond Yeung ប្រធានសេដ្ឋវិទូចិននៅធនាគារ ANZ បានប្រាប់ WSJ ថា មានមនុស្សតិចពេកដែលទិញផ្ទះ អាចទិញផ្ទះ ឬចង់ទិញផ្ទះ។ មានការផ្លាស់ប្តូរជាមូលដ្ឋាននៅក្នុងទស្សនៈរបស់ប្រជាជនចិនលើអចលនទ្រព្យ ដែលអចលនទ្រព្យមិនត្រូវបានចាត់ទុកថាជាបណ្តាញវិនិយោគដែលមានសុវត្ថិភាពទៀតទេ។
វិស័យអចលនទ្រព្យ និងឧស្សាហកម្មពាក់ព័ន្ធធ្លាប់បានរួមចំណែកប្រហែល ២៥ភាគរយនៃផលិតផលក្នុងស្រុកសរុប (GDP) របស់ចិន។ ជាង២ឆ្នាំកន្លងមកនេះ វិបត្តិអចលនទ្រព្យបានអូសទាញកំណើនសេដ្ឋកិច្ចធំទីពីររបស់ពិភពលោកឱ្យធ្លាក់ចុះ។ អ្នកជំនាញ និងអង្គការនានាបានអំពាវនាវឱ្យទីក្រុងប៉េកាំងធ្វើសកម្មភាពកាន់តែម៉ឺងម៉ាត់ក្នុងការធ្វើឱ្យវិស័យនេះរស់ឡើងវិញ ប៉ុន្តែរហូតមកដល់ពេលនេះអាជ្ញាធរចិនបានត្រឹមតែដាក់ចេញនូវគោលនយោបាយតូចតាចប៉ុណ្ណោះ ជំនួសឱ្យកញ្ចប់ថវិកាជំរុញទឹកចិត្តដ៏ធំមួយ។
អ្នកសេដ្ឋកិច្ចមួយចំនួនបានប្រៀបធៀបចិនទៅនឹងជប៉ុន ដែលជាប្រទេសមួយដែលបានចំណាយពេលជាច្រើនទសវត្សរ៍ដើម្បីប្រឹងងើបឡើងវិញ បន្ទាប់ពីភាគហ៊ុន និងអចលនទ្រព្យរបស់ខ្លួនបានធ្លាក់ចូលក្នុងវិបត្តិ។ មិនត្រឹមតែវិស័យអចលនទ្រព្យទេ ផ្សារហ៊ុនចិនក៏ទើបតែឆ្លងកាត់ឆ្នាំដ៏អាក្រក់ផងដែរ។
វិបត្តិអចលនទ្រព្យនៅចិនបានធ្វើឱ្យក្រុមហ៊ុនអភិវឌ្ឍន៍អចលនទ្រព្យជាង ៥០ (ភាគច្រើនជាក្រុមហ៊ុនឯកជន) ធ្លាក់ក្នុងអន្ទាក់បំណុល។ ក្រុមហ៊ុនទាំងនេះនៅមានផ្ទះរាប់លានខ្នងកំពុងសាងសង់ដើម្បីលក់ ប៉ុន្តែមិនទាន់ប្រគល់ឱ្យអតិថិជននៅឡើយទេ។ ថ្វីត្បិតតែអាជ្ញាធរកំពុងជួយឧបត្ថម្ភប្រាក់រាប់ពាន់លានដុល្លារដើម្បីបញ្ចប់ការសាងសង់ក៏ដោយ ទំហំនៃការខាតបង់មិនទាន់ធូរស្រាលនៅឡើយទេ។
យ៉ាងណាមិញ អ្នកសេដ្ឋកិច្ចមួយចំនួននៅតែមានសុទិដ្ឋិនិយម។ យោងតាមលោកស្រី Helen Qiao ប្រធានសេដ្ឋវិទូចិននៅធនាគារ Bank of America អ្នកទិញនឹងត្រឡប់ទៅទីផ្សារផ្ទះថ្មីជាបណ្តើរៗ ដែលនឹងជំរុញការងើបឡើងវិញនៃវិស័យនេះទាំងមូល។ អ្នកស្រី Qiao បាននិយាយថា ៖« ពីទីនេះ អ្វីៗនឹងប្រសើរឡើងបន្តិចម្តងៗ»៕