ក្រោយរដ្ឋប្រហារឆ្នាំ២០២១ គ្មានឡើយតំណាងមីយ៉ាន់ម៉ានៅកិច្ចប្រជុំអាស៊ានកម្រិតរដ្ឋមន្រ្តីការបរទេស និងជំនួបកំពូល។ រដ្ឋសមាជិកអាស៊ាន កំហិតឱ្យមីយ៉ាន់ម៉ាបញ្ជូនតំណាងមិនមែននយោបាយជំនួសវិញ។

 

ដោយមិនពេញចិត្តការសម្រេចរបស់អាស៊ាន របបយោធាមីយ៉ាន់ម៉ា ក៏ធ្វើពហិការមិនបញ្ជូនតំណាងណាមួយចូលរួមប្រជុំសំខាន់ៗទាំង២ ឡើយ តែបន្តបញ្ជូនរដ្ឋមន្រ្តីចូលរួមកិច្ចប្រជុំក្នុងវិស័យផ្សេង។ យ៉ាងណាមិញ សម្រាប់កិច្ចប្រជុំនៅឡាវពីថ្ងៃទី២៨ ដល់ទី២៩​ ខែមករា​ គេនឹងឃើញវត្តមានតំណាងមីយ៉ាន់ម៉ាជាថ្មី។

 

សារព័ត៌មានជប៉ុន Kyodo ស្រង់ប្រភពអ្នកការទូតថា មីយ៉ាន់ម៉ាមានបំណងបញ្ជូនមន្រ្តីក្រសួងការបរទេសម្នាក់ជាតំណាងមិនមែននយោបាយ ប៉ុន្តែមិនបានបញ្ជាក់អត្តសញ្ញាណឡើយ។ បើដូច្នោះមែន តំណាងមិនមែននយោបាយរូបនេះ អាចជាលេខាអចិន្រ្តៃយ៍ក្រសួងការបរទេសរបបយោធាតែម្ដង ព្រោះកន្លងមក អាស៊ានក៏ធ្លាប់បានអញ្ជើញមន្រ្តីកាន់តំណែងនេះជាតំណាងមីយ៉ាន់ម៉ាដែរ។

 

គេមិនទាន់ដឹងច្បាស់ពីមូលហេតុដែលរបបសឹកងាករកអាស៊ាននៅឡើយទេ។ យ៉ាងណាមិញ ស្ថានភាពក្នុងប្រទេសកាន់តែអាក្រក់ដោយសារការងើបប្រឆាំងរបស់ក្រុមប្រដាប់អាវុធជនជាតិភាគតិច និងភាពឯកោលើឆាកអន្តរជាតិ ទំនងជាបង្ខំឱ្យរដ្ឋាភិបាលយោធាងាកទៅចាប់ដៃអាស៊ានដើម្បីសម្រួលស្ថានការណ៍។

 

ឡាវដែលជាប្រធានប្ដូរវេនរបស់អាស៊ាននៅឆ្នាំ២០២៤ ក៏បង្ហាញឆន្ទៈធ្វើការជាមួយមីយ៉ាន់ម៉ាដើម្បីរកច្រកចេញពីវិបត្តិមួយនេះ ដែលនឹងគ្របដណ្ដប់របៀបវារៈដូចឆ្នាំមុនៗមិនខាន។ ប្រេសិតប្រធានអាស៊ានសម្រាប់វិបត្តិមីយ៉ាន់ម៉ា Alounkeo Kittikhoun ទៅជួបមេដឹកនាំយោធាមីយ៉ាន់ម៉ា មីន អ៊ុងឡាំង នៅថ្ងៃទី១០ ខែមករាផងដែរ៕