មេដឹកនាំសហភាពអឺរ៉ុប (EU) បានយល់ព្រមជាឯកច្ឆ័ន្ទ នៅថ្ងៃទី១ ខែកុម្ភៈ ដើម្បីបន្តផ្តល់ជំនួយថ្មីក្នុងទំហំ ៥៤ ពាន់លានដុល្លារដល់អ៊ុយក្រែន ក្រោយហុងគ្រីវេតូកាលពីខែធ្នូកន្លងទៅ។ ការអនុម័តនេះ ធ្វើឡើងមុនខួបរុស្ស៊ីឈ្លានពានអ៊ុយក្រែនរយៈពេល ២ឆ្នាំ។
ជាដំណឹងដ៏ល្អមួយ អ៊ុយក្រែន បានទទួលកញ្ចប់ជំនួយថ្មី ក្នុងទំហំជាច្រើនពាន់លានដុល្លារពីសហភាពអឺរ៉ុប ស្របពេលជំនួយសន្តិសុខ និងសេដ្ឋកិច្ចសម្រាប់ប្រទេសនៅតំបន់អឺរ៉ុបខាងកើតមួយនេះ កំពុងតែរីងស្ងួត។
«ពួកយើងមានកិច្ចព្រមព្រៀងមួយ។»។ ប្រធានក្រុមប្រឹក្សាអ៊ឺរ៉ុប លោក Charles Michel បានប្រកាសលើបណ្ដាញសង្គមX បែបនេះនៅថ្ងៃទី១ ខែកុម្ភៈ ដើម្បីបញ្ជាក់ពីការអនុម័តកញ្ចប់ជំនួយបន្ថែម ៥៤ពាន់លានដុល្លារ។
បន្ទាប់ពីការអនុម័តខាងលើ មេដឹកនាំអ៊ុយក្រែន បានបង្ហាញការពេញចិត្តជាខ្លាំង និងអរគុណអឺរ៉ុប សម្រាប់ការជួយរក្សាស្ថិរភាពហិរញ្ញវត្ថុ និងសេដ្ឋកិច្ចរបស់ប្រទេសខ្លួន ដែលមានសង្គ្រាមជិតឈានចូលឆ្នាំទីបី។
«វាពិតជាសំខាន់ណាស់ ដែលមេដឹកនាំទាំង ២៧ប្រទេសបានអនុម័ត ហើយជាថ្មីម្តងទៀតបានបង្ហាញពីការរួបរួមដ៏រឹងមាំរបស់អឺរ៉ុប»។ ប្រធានាធិបតីអ៊ុយក្រែន លោក វ៉ូឡូឌីមៀ ហ្សេលេនស្គី បានបង្ហោះសំណេរមួយលើបណ្តាញសង្គម X នៅក្នុងថ្ងៃដដែលនោះ។
រដ្ឋាភិបាលក្រុងកៀវ ដែលពឹងផ្អែកយ៉ាងខ្លាំងលើជំនួយលោកខាងលិចដើម្បីប្រយុទ្ធទល់នឹងក្រុងមូស្គូ រំពឹងនឹងទទួលបានជំនួយដំបូងប្រមាណ ៤,៨ ពាន់លានដុល្លារ នៅខែមីនាក្នុងទំហំជំនួយ ៥៤ពាន់លានដុល្លារ។ ការទទួលបានជំនួយនេះ ធ្វើឡើងស្របពេលសភាអាម៉េរិកមិនទាន់ផ្តល់ភ្លើងបៃតងសម្រាប់កញ្ចប់ជំនួយថ្មីឡើយ។
នៅក្នុងខែធ្នូ ឆ្នាំ២០២៣ កញ្ចប់ជំនួយនេះ ក៏រងការបដិសេធពីហុងគ្រីផងដែរ។ ចុងក្រោយ ហុងគ្រី បានចូលរួមឯកភាពលើជំនួយខាងលើ ដោយសាររដ្ឋាភិបាលក្រុងប៊ុយដាប៉េស ទទួលបានការធានាថា ជំនួយនឹងត្រូវបានប្រើប្រាស់យ៉ាងត្រឹមត្រូវ និងមិនប៉ះពាល់ថវិកាពីមូលនិធិសហភាពអឺរ៉ុបឡើយ។ នេះបើតាមការចុះផ្សាយរបស់ទីភ្នាក់ងារ Reuters។
កន្លងមក សហភាពអឺរ៉ុប បានរឹតត្បិតហុងគ្រី ដែលជាសមាជិកមួយរបស់ខ្លួន មិនឱ្យទទួលបានកញ្ចប់ជំនួយពីមូលនិធិសហភាពអឺរ៉ុប ក្រោមហេតុផលបង្កឱ្យមានផលប៉ះពាល់ដល់ប្រជាធិបតេយ្យ។ ហុងគ្រី ជាប្រទេសមួយស្និទ្ធនឹងរុស្ស៊ីផង។
ត្រង់ចំណុចនេះ មន្រ្តីទូតមួយរូបបានបញ្ជាក់ថា ដើម្បីទទួលបានការឯកភាពពីហុងគ្រី សហភាពអឺរ៉ុប ត្រូវសម្រេចមិនប៉ះពាល់កញ្ចប់មូលនិធិសហភាពអឺរ៉ុបជាច្រើនពាន់លានដុល្លារ និងរង់ចាំរហូតដល់រដ្ឋាភិបាលក្រុងប៊ុយដាប៉េសគោរពបានគ្រប់លក្ខខណ្ឌ៕