ក្រសួងស្រាយបំភ្លឺបែបនេះ ដើម្បីឆ្លើយតបនឹងសេចក្ដីថ្លែងការណ៍បក្សកម្លាំងជាតិ ដែលបានអំពាវនាវឱ្យរដ្ឋាភិបាល ចេញមុខដោះស្រាយលើរឿងរ៉ាវតវ៉ារបស់ពលរដ្ឋរុនតាឯក។ បក្សកម្លាំងជាតិថា ពលរដ្ឋផ្ទុះការតវ៉ាឡើង ដោយសារភាពមិនច្បាស់លាស់ នៃការអនុវត្តគោលនយោបាយជាតិរបស់រដ្ឋាភិបាល លើគោលការណ៍ផ្ដល់ប័ណ្ណក្រីក្រដល់ពលរដ្ឋ ពិសេសការកាត់បន្ថយចំនួនទឹកប្រាក់ចេញពីប័ណ្ណក្រីក្រ។ 

លោក តូច ចាន់នី អ្នកនាំពាក្យក្រសួងសង្គមកិច្ច ចាត់ទុកការលើកឡើងរបស់ បក្សកម្លាំជាតិ ជាការកេងចំណេញផ្នែកនយោបាយ។ ក្នុងកិច្ចសម្ភាសជាមួយសារព័ត៌មានថ្មីៗតាមទូរស័ព្ទនៅថ្ងៃទី២ កុម្ភៈ លោកពន្យល់ថា ការកាត់បន្ថយថវិកាពីប័ណ្ណក្រីក្ររបស់ពលរដ្ឋ នៅតំបន់រុនតាឯក រួមទាំងតំបន់មួយចំនួនទៀត គឺដោយសារស្ថានភាពពលរដ្ឋមានភាពប្រសើរឡើងវិញ។ លោក អះអាងថា រដ្ឋមិនឱ្យពលរដ្ឋនៅតំបន់រុនតាឯកបាត់អត្ថប្រយោជន៍ឡើយ។ 

«យើងត្រូវដឹងថា ការផ្ដល់ថវិកាតាមរយៈប័ណ្ណក្រីក្រ គឺជាការផ្ដល់ជំនួយបណ្ដោះអាសន្ន ក្នុងស្ថានភាពប្រឈមណាមួយ។ ជាក់ស្ដែង អំឡុងពេលកូវីដ-១៩ រដ្ឋាភិបាលបានអនុវត្តគោលនយោបាយនេះ ហើយបច្ចុប្បន្ន ស្ថានភាពកូវីដ-១៩ បានធូរស្រាល ពលរដ្ឋអាចចេញចូល ប្រកបមុខរបរបាន។ ដូច្នេះ កម្រិតក្រីក្ររបស់ពួកគាត់ ឬចំនួនថវិការបានថយចុះ។ យ៉ាងណា! រដ្ឋកំពុងដោះស្រាយ ហើយយើងនឹងគុណបំពេញបន្ថែមវិញ តែតំបន់រុនតាឯកទេ!»។ លោក តូច ចាន់នី ពន្យល់បែបនេះ ។

កាលពីថ្ងៃទី២៧ មករា អាជ្ញាធរខេត្តសៀមរាប ក៏បានចុះទៅជួបពិភាក្សា និងប្រមូលសំណូមពររបស់ប្រជាពលរដ្ឋ ដែលស្ម័គ្រចិត្តចាកចេញពីតំបន់រមណីយដ្ឋានអង្គរ ទៅរស់នៅក្នុងតំបន់រុនតាឯក ជុំវិញបញ្ហាសាច់ប្រាក់ឧបត្ថម្ភនេះដែរ។ ក្រោយជួបពិភាក្សាគ្នាហើយ រដ្ឋបាលខេត្តសៀមរាប សន្យាយកសំណូមពរ និងព័ត៌មានទាំងនោះ រាយការណ៍មកកាន់រដ្ឋាភិបាល៕