ពៅ បញ្ចពណ៌៖ វិន័យល្អនៅសាលាភូមិន្ទរដ្ឋបាល ធ្វើឱ្យសិស្សក្លាយជាមន្រ្តីពេញលក្ខណៈ និងមានសមត្ថភាព

ជាតិ

វីដេអូ

ពៅ បញ្ចពណ៌៖ វិន័យល្អនៅសាលាភូមិន្ទរដ្ឋបាល ធ្វើឱ្យសិស្សក្លាយជាមន្រ្តីពេញលក្ខណៈ និងមានសមត្ថភាព

04, Feb 2024 , 9:20 am

រូបភាព

ដោយ: ញឹក ស្រីល័ក្ខ (Nhek Sreyleak)

ភ្នំពេញ៖ វិន័យនាំមកនូវសេចក្ដីថ្លៃថ្នូរ! សាលាភូមិន្ទរដ្ឋបាល ដែលជាទីបណ្ដុះអនាគតមន្រ្តីរាជការនៅកម្ពុជា បានដាក់កម្រិតវិន័យដល់សិស្ស ដើម្បីគោរពតាមទាំងនៅក្នុងថ្នាក់ និងក្នុងសាលា។ កញ្ញា ពៅ បញ្ចពណ៌ សិស្សមន្រ្តីជាន់ខ្ពស់ជំនាន់ទី១២ បានលើកឡើងថា វិន័យល្អនៅសាលាភូមិន្ទរដ្ឋបាល បានធ្វើឱ្យសិស្សក្លាយជាមន្រ្តីពេញលក្ខណៈ និងមានសមត្ថភាព។

ចុចទីនេះដើម្បីទទួលបានព័ត៌មានរហ័ស

កញ្ញា ពៅ បញ្ចពណ៌ ជាសិស្សមន្រ្តីជាន់ខ្ពស់ជំនាន់ទី១២ ជំនាញសេដ្ឋកិច្ច និងហិរញ្ញវត្ថុ នៅសាលាភូមិន្ទរដ្ឋបាល។ បញ្ចពណ៌ បានបញ្ចប់ការសិក្សាថ្នាក់បរិញ្ញាបត្រចំនួន ២ លើជំនាញសេដ្ឋកិច្ចអន្តរជាតិ នៅវិទ្យាស្ថានភាសាបរទេស និងនៅសាកលវិទ្យាល័យសេដ្ឋកិច្ច និងហិរញ្ញវត្ថុ ជំនាញធនាគារ និងហិរញ្ញវត្ថុ។

កញ្ញា ពៅ បញ្ចពណ៌ និងមិត្តរួមថ្នាក់។ រូបភាពពី កញ្ញា ពៅ បញ្ចពណ៌។

យុវតីវ័យ ២៦ឆ្នាំរូបនេះ មានបំណងក្លាយជាមន្រ្តីរាជការ ទើបជំរុញឱ្យនាងដាក់ពាក្យប្រឡងនៅសាលាភូមិន្ទរដ្ឋបាល។ មុនប្រឡងជាប់ជាសិស្សមន្រ្តីជាន់ខ្ពស់នៅឆ្នាំ២០២២ កញ្ញា ពៅ បញ្ចពណ៌ ក៏ធ្លាប់ធ្វើជាមន្រ្តីជាប់កិច្ចសន្យា នៅអគ្គនាយកដ្ឋានពន្ធដារ និងធ្លាប់ជាបុគ្គលិកផ្នែកសវនករផ្ទៃក្នុង នៅធនាគារឯកជនមួយកន្លែងផងដែរ។

ជាកូនច្បងក្នុងគ្រួសារ ដែលមានបងប្អូន ៣នាក់ កញ្ញា ពៅ បញ្ចពណ៌ ចូលចិត្តរៀនសូត្រតាំងពីកុមារភាព។ អង្គុយលើកៅអីពណ៌ខ្មៅ នៅសួនច្បារជិតមាត់ទឹក ក្នុងសាលាភូមិន្ទរដ្ឋបាល កញ្ញា ពៅ បញ្ចពណ៌ បានរៀបរាប់ពីដំណើរដើមទង ដែលនាំនាងមកដល់សាលាបណ្ដុះអនាគតមន្រ្តីរាជការមួយនេះ។

«មូលហេតុដែលខ្ញុំសម្រេចចិត្តដាក់ពាក្យប្រឡងចូលមកសាលាភូមិន្ទរដ្ឋបាល ព្រោះការធ្វើជាមន្រ្តីរាជការ គឺជាក្ដីស្រមៃរបស់ខ្ញុំតាំងពីនៅតូច។ ណាមួយ ការប្រឡងចូលសាលាភូមិន្ទរដ្ឋបាល មានលក្ខណៈសុក្រឹត្យភាព និងតម្លាភាព ដែលអាចជាឱកាសមួយសម្រាប់ខ្ញុំ ដើម្បីក្លាយជាមន្រ្តីពេញលក្ខណៈ និងមានសមត្ថភាពសម្រាប់បម្រើប្រជាជន»។ នេះជាបញ្ជាក់របស់សិស្សមន្រ្តីជាន់ខ្ពស់ជំនាន់ទី១២ ពៅ បញ្ចពណ៌។

រូបភាពពីកញ្ញា ពៅ បញ្ចពណ៌

ក្រៅពីមានចំណេះដឹង និស្សិតត្រូវមានអាកប្បកិរិយាល្អ ទើបអាចប្រឡងជាប់នៅសាលាភូមិន្ទរដ្ឋបាលសាលាភូមិន្ទរដ្ឋបាល

ជាគ្រឹះស្ថានអប់រំមួយ ដែលមនុស្សជាច្រើន ប្រាថ្នាចង់រៀននៅទីនេះ។ មានបេក្ខជនខ្លះ ចំណាយពេលមកប្រឡង២ ទៅ៣ឆ្នាំ ទើបអាចប្រឡងជាប់។ បើតាមកញ្ញា ពៅ បញ្ចពណ៌ ការប្រឡងចូលរៀននៅទីនេះ មានការលំបាក ដែលតម្រូវឱ្យសិស្សមានចំណេះដឹងគោល រួមទាំងអាកប្បកិរិយាល្អផងដែរ។

បញ្ចពណ៌ លើកឡើងថា៖«ការប្រឡងចូលនេះ មានការលំបាកខ្លាំង។ ពេលនោះ ខ្ញុំមិនបានត្រៀមអ្វីច្រើនទេ ប៉ុន្តែខ្ញុំមានទុនពីសាកលវិទ្យាល័យខ្លះៗ ទាក់ទងនឹងជំនាញសេដ្ឋកិច្ច និងហិរញ្ញវត្ថុ បានជួយខ្ញុំឱ្យប្រឡងជាប់។ មួយទៀត ក៏ត្រូវមានអត្តចរិតល្អ អាកប្បកិរិយា រួមទាំងការស្លៀកពាក់ផងដែរ»។

រូបភាពពីកញ្ញា ពៅ បញ្ចពណ៌

ការប្រឡងចូលជាសិស្សមន្រ្តីជាន់ខ្ពស់នៅសាលានេះ មាន៣ដំណាក់កាល។ សម្រាប់ បញ្ចពណ៌ ដំណាក់កាលទី៣ គឺការសម្ភាស ពិតជាមានការលំបាក។ បើតាម បញ្ចពណ៌ ដំណាក់កាលសម្ភាស ដែលជាដំណាក់កាលចុងក្រោយ គឺគណៈកម្មការចោទជាសំណួរផ្ទាល់មាត់ និងសង្កេតលើអាកប្បកិរិយា រួមទាំងការស្លៀកពាក់ជាដើម។

មានសមត្ថភាពជារឿងមួយ ប៉ុន្តែបើឥរិយាបថមិនសមរម្យ ក៏មិនអាចចូលរៀននៅទីនេះបានដែរ។ ទោះជួបផលលំបាកក្នុងការប្រឡង តែ បញ្ចពណ៌ នៅតែស៊ូឆ្លើយសំណួរគណៈកម្មការ រហូតបានជាប់រៀននៅទីនេះ រយៈពេល២ឆ្នាំផងដែរ។

វិន័យល្អ និងតឹងរឹងរបស់សាលាភូមិន្ទរដ្ឋបាល កែប្រែទម្លាប់ បញ្ចពណ៌...

ចំពោះការសិក្សានៅទីនេះ បញ្ចពណ៌ បានដាក់ពិន្ទុ ១០០លើវិន័យតែម្ដង។ «ខ្ញុំពេញចិត្តនឹងវិន័យ និងការរឹតបន្តឹងនៅសាលានេះ។ ទោះបីដំបូង ខ្ញុំមានផលលំបាកក្នុងការសម្របខ្លួនតាម ប៉ុន្តែខ្ញុំនៅតែព្យាយាម និងបានកែប្រែទម្លាប់ខ្លួនឯង»។ នេះជាការរៀបរាប់របស់ បញ្ចពណ៌ ពីការប្រតិបត្តិវិន័យនៅសាលាមួយនេះ។

វិន័យនាំមកនូវសេចក្ដីថ្លៃថ្នូរ! សាលាភូមិន្ទរដ្ឋបាល មានទម្លាប់គោរពទង់ជាតិ នៅម៉ោង៧នឹង១៥នាទីព្រឹក ជារៀងរាល់ថ្ងៃ។ ទម្លាប់គោរពទង់ជាតិជាប្រចាំនេះ តម្រូវឱ្យសិស្សមន្រ្តីនៅទីនោះ រួមទាំងបញ្ចពណ៌ ត្រូវមកដល់សាលាមុនម៉ោង៧ព្រឹក។ កញ្ញា បញ្ចពណ៌ បន្ថែមដូច្នេះ៖«ការធ្វើឱ្យមានភាពតឹងរឹងនៅក្នុងសាលា បង្រៀនឱ្យសិស្សចេះគោរពពេលវេលា, ឱ្យមានអាកប្បកិរិយាសមរម្យ ដែលស័ក្តិសមជាមន្រ្តី ក្រោយពេលរៀនចប់»។

រូបភាពពីកញ្ញា ពៅ បញ្ចពណ៌

អ្វីដែលសិស្សមន្រ្តីជាន់ខ្ពស់រូបនេះ ផ្លាស់ប្ដូរខ្លួនឯង គឺទម្លាប់មករៀនទាន់ពេលវេលា ជាពិសេសការជួយដុសខាត់នូវអាកប្បកិរិយា និងឥរិយាបថរបស់នាងផងដែរ។ តាមរយៈការកែប្រែទម្លាប់នេះ បញ្ចពណ៌ គាំទ្រលើការរឹតបន្តឹងវិន័យដ៏ល្អមួយនេះ។

បើតាម បញ្ចពណ៌ វិន័យនេះ ក៏ចូលរួមលើកកម្ពស់ការសិក្សារបស់សិស្សមន្រ្តីជាន់ខ្ពស់នៅទីនេះផងដែរ។ ក្រៅពីវិន័យ បញ្ចពណ៌ ទទួលស្គាល់ថា នាងទទួលបានចំណេះដឹងថ្មីៗបន្ថែមពីលើជំនាញសេដ្ឋកិច្ច និងហិរញ្ញវត្ថុដែលនាងបានរៀន។

សាលាភូមិន្ទរដ្ឋបាល ទីបណ្ដុះបណ្ដាលមន្រ្តីឱ្យមានសមត្ថភាព និងពេញលក្ខណៈ

កញ្ញា ពៅ បញ្ចពណ៌ រំឭកពីសកម្មភាពនៃការប្រឡងចូលរៀននៅសាលាបណ្ដុះអនាគតមន្រ្តីកម្ពុជា គឺសាលាភូមិន្ទរដ្ឋបាល។ ចំពោះដំណើរការប្រឡងវិញ បញ្ចពណ៌ ពេញចិត្តខ្លាំងតែម្ដង។

យុវតីរូបនេះ មើលឃើញថាការប្រឡងពីមួយដំណាក់កាលទៅមួយដំណាក់កាល មានភាពសុក្រឹត្យ។ បញ្ចពណ៌ ប្រាប់ដូច្នេះ៖«ការប្រឡងនៅទីនេះ មានការចូលរួមសង្កេតការណ៍ពីអង្គភាពប្រឆាំងអំពើពុករលួយ ដែលធ្វើឱ្យខ្ញុំមានភាពកក់ក្ដៅក្នុងការប្រឡង ហើយធានាបាននូវតម្លាភាព។ បើការកែវិញ ក៏បង្ហាញជាសាធារណៈដែរ»។

រូបភាពពីកញ្ញា ពៅ បញ្ចពណ៌

ដំណើរការប្រឡង និងការបណ្ដុះបណ្ដាលសិស្សមន្រ្តីក្រមការ សិស្សមន្រ្តីជាន់ខ្ពស់ បានបង្ហាញឱ្យកញ្ញា ពៅ បញ្ចពណ៌ ឃើញពីភាពហ្មត់ចត់របស់ថ្នាក់ដឹកនាំ និងគោលការណ៍របស់សាលាភូមិន្ទរដ្ឋបាល។ «សិស្សមន្រ្តីដែលបានបណ្ដុះបណ្ដាលនៅទីនេះហើយ ចេញទៅវិញ គឺគាត់នឹងទទួលបានចំណេះដឹងមួយដ៏ពិតប្រាកដ។ ព្រោះសាលានេះ បានអញ្ជើញលោកគ្រូអ្នកគ្រូដែលជាឥស្សរជនខ្ពស់ៗមកបង្រៀន»។ នេះជាការរៀបរាប់របស់សិស្សមន្រ្តីជាន់ខ្ពស់ ពៅ បញ្ចពណ៌។

ក្រៅពីបណ្ដុះបណ្ដាលនៅក្នុងសាលា សិស្សក្រមការ និងសិស្សមន្រ្តីជាន់ខ្ពស់ ត្រូវចុះកម្មសិក្សានៅតាមក្រសួងស្ថាប័ន តាមបណ្ដាខេត្តនានាផងដែរ។ ការសិក្សានៅទីនេះ មានរយៈពេល២៤ខែ ដោយ១៨ខែ ផ្ដោតលើទ្រឹស្ដី និង៦ខែ ផ្ដោតលើការចុះកម្មសិក្សា។

បញ្ចពណ៌ បានចែករំលែកសកម្មភាពចុះកម្មសិក្សារបស់នាងនៅខេត្តត្បូងឃ្មុំ មកកាន់អ្នកសារព័ត៌មានថ្មីៗផងដែរ។ កម្មសិក្សារយៈពេល៦ខែ ដែលបញ្ចពណ៌ ចុះទៅខេត្តត្បូងឃ្មុំ បានបង្រៀននាងពីរបៀបធ្វើលិខិតរដ្ឋបាលនានា រួមទាំងការធ្វើរបាយការណ៍ជាដើម។ ការចុះកម្មសិក្សាជាទុនដ៏សំខាន់មួយសម្រាប់ បញ្ចពណ៌ ក្នុងការងារជាមន្រ្តីរាជការនាថ្ងៃខាងមុខ៕

Tag:

សាលាភូមិន្ទរដ្ឋបាល

អប់រំ

ស្រ្តី

ពៅ បញ្ចពណ៌