ប្រធានាធិបតីណាមីប៊ី លោក Hage Geingob ដែលមានវ័យ ៨២ឆ្នាំ មានជំងឺមហារីក ដោយព័ត៌មាននេះ ត្រូវបានបញ្ចេញជាសាធារណៈ នៅខែមុន។ ពេលនេះ ប្រធានាធិបតីណាមីប៊ី បានទទួលមរណភាពហើយ។ ណាមីប៊ី ស្ថិតនៅតំបន់អាហ្វ្រិកខាងត្បូង។ 

 

«សូមចូលរួមរំលែកទុក្ខជាមួយភរិយារបស់គាត់ Madame Monica Geingos និងកូនៗរបស់គាត់»។ អនុប្រធានាធិបតីណាមីប៊ី បានប្រកាសបែបនេះ នៅក្នុងសេចក្តីថ្លែងការណ៍មួយចេញនៅថ្ងៃទី៤ ខែកុម្ភៈ។ 

 

លោក Geingob បានក្លាយជាប្រធានាធិបតីនៅក្នុងឆ្នាំ២០១៥ ហើយកាន់តំណែងនៅអាណត្តិទីពីរដែលជាអាណត្តិចុងក្រោយក្នុងពេលបច្ចុប្បន្ន។ កន្លងមក មេដឹកនាំរូបនេះ ក៏ធ្លាប់កាន់តំណែងជានាយករដ្ឋមន្រ្តីផងដែរ។ 

 

គួររម្លឹកថា នៅក្នុងឆ្នាំ២០២៣ មេដឹកនាំរូបនេះ ធ្លាប់វះកាត់ពាក់ព័ន្ធនឹងសរសៃឈាម ហើយនៅក្នុងឆ្នាំ២០១៤ លោកបានប្រកាសថា លោកត្រូវបានជួយសង្រ្គោះពីជំងឺមហារីកប្រូស្តាត៕