ជាតិ
ក្រសួងយុត្តិធម៌ បង្កើតក្រុមការងារត្រួតពិនិត្យលើការដោះស្រាយភាពមិនប្រក្រតីនៅតុលាការ 04, Feb 2024 , 7:00 pm
លោក កើត រិទ្ធ រដ្ឋមន្រ្តីក្រសួង យុត្តិធម៌។ រូបភាពពីក្រសួងយុត្តិធម៌
× ភ្នំពេញ៖ ក្រសួងយុត្តិធម៌ បាន សម្រេចបង្កើតក្រុមការងារត្រួតពិនិត្យរួមនូវសំណើសុំអន្តរាគមន៍ក្នុងក្របខណ្ឌ នៃយុទ្ធនាការត្រួតពិនិត្យ និងដោះស្រាយភាពមិនប្រក្រតីនៅតាមតុលាការ។ សមាសភាព ក្រុមការងារនេះ មាន១១នាក់ ដោយរដ្ឋលេខាធិការក្រសួងយុត្តិធម៌ លោក តាន់ហ៊ាង ដាវ័ណ្ណ គឺជាប្រធាន។
បើតាមសេចក្ដីសម្រេចដែលចុះហត្ថលេខានៅថ្ងៃទី២ កុម្ភៈដោយលោក កើត រិទ្ធ រដ្ឋមន្រ្តីក្រសួងយុត្តិធម៌ ក្រុមការងារនេះ មានតួនាទីពិនិត្យ វិភាគ និងធ្វើចំណាត់ថ្នាក់អាទិភាពនៃសំណើសុំអន្តរាគមន៍ដែលទទួលបានពីលេខាធិការដ្ឋាន នៃគណៈបញ្ជាការដឹកនាំយុទ្ធនាការក្នុងក្របខណ្ឌការងាររបស់គណៈកម្មការដឹកនាំ និងអនុវត្តន៍យុទ្ធនាការ។ ក្រុមការងារនេះ ក៏ត្រូវចាត់ចែង និងបញ្ជូនសំណើសុំអន្តរាគមន៍ដែលចាត់ថ្នាក់អាទិភាពរួច ទៅគណៈកម្មការដឹកនាំ និងអនុវត្តយុទ្ធនាការដែរ។
រូបភាពពីក្រសួងយុត្តិធម៌
សេចក្ដីសម្រេចដដែល បានបញ្ជាក់បន្ថែមថា ដើម្បីធានាប្រសិទ្ធភាពនៃការអនុវត្តភារកិច្ច ក្រុមការងារត្រូវរៀបចំគោលការណ៍ណែនាំនានាក្ រុមការងារនេះត្រូវស្នើសុំទៅគណៈកម្មការដឹកនាំ និងអនុវត្តយុទ្ធនាការត្រួតពិនិត្យ តាមការចាំបាច់ ដើម្បីស្វែងរក និងផ្តល់ព័ត៌មាន រួមឯកសារបន្ថែម ពាក់ព័ន្ធនឹងសំណើសុំអន្តរាគមន៍មកក្រុមការងារ។
គួរដឹងដែរថា ថ្មីៗនេះ ក្រសួងយុត្តិធម៌ ក៏បានរៀបចំមេធាវីស្ម័គ្រចិត្តចំនួន ២០៩នាក់ សម្រាប់ផ្ដល់សេវាការពារក្ដីដល់ពលរដ្ឋដោយឥតគិតថ្លៃនៅទូទាំងប្រទេស៕
© រក្សាសិទ្ធិដោយ thmeythmey.com