អន្តរជាតិ
ទីផ្សារភាគហ៊ុនចិនធ្លាក់ចុះក្នុងពេល៥ឆ្នាំកន្លងមក ខណៈនិយតករសន្យាការពារក្រុមវិនិយោគិនតូចតាច
11, Feb 2024 , 9:29 am
ពលរដ្ឋចិនដើរកាត់តំបន់ពាណិជ្ជកម្មនិងផ្សារទំនើបមួយកន្លែង នៅទីក្រុងប៉េកាំង ប្រទេសចិន កាលពីថ្ងៃទី៨ ខែកុម្ភៈ
×![]()
ដោយ: VOA
កាលពីថ្ងៃទី ៥ ខែកុម្ភៈ ភាគហ៊ុននៅប្រទេសចិននៅតែវិលវល់ក្នុងកម្រិតមួយទាបក្នុងរយៈពេល ៥ ឆ្នាំកន្លងមកនេះ បន្ទាប់ពីនិយតករទីផ្សារបានប្រឹងប្រែងធានាចំពោះវិនិយោគិនដោយសន្យាបង្ក្រាបការក្រឡុកតម្លៃភាគហ៊ុននិងការខ្ចីភាគហ៊ុននិងលក់ភ្លាមៗទៅកាន់ទីផ្សារដើម្បីផលចំណេញ។ នេះបើយោងតាមសេចក្ដីរាយការណ៍របស់ទីភ្នាក់ងារសារព័ត៌មាន AP។
ទីផ្សារភាគហ៊ុននៅក្នុងទីក្រុងសៀងហៃនិងទីផ្សារភាគហ៊ុនតូចៗនៅក្នុងទីក្រុង Shenzhen ជិតទីក្រុងហុងកុងបានឡើងចុះរវាងការខាតបង់ច្រើននិងការចំណេញតិចតួចនៅថ្ងៃនោះ។ ទីផ្សារភាគហ៊ុនចិនបានចុះខ្សោយដោយសារការលក់ភាគហ៊ុនអចលនទ្រព្យខ្លាំងក្លា ដែលករណីនេះធ្វើឱ្យមានការធ្លាក់ចុះនៅក្នុងទីផ្សារអចលនទ្រព្យ។
ប្រព័ន្ធផ្សព្វផ្សាយព័ត៌មានរដ្ឋរបស់ចិនបានរាយការណ៍ថា គណៈកម្មការនិយតកម្មមូលធនប័ត្រនៃប្រទេសចិន (CSRC) បានរៀបចំការប្រជុំមួយកាលពីថ្ងៃទី ៤ ខែកុម្ភៈ ដោយផ្តោតលើការធ្វើឱ្យទីផ្សារភាគហ៊ុនមានស្ថិរភាពឡើងវិញ។
សេចក្តីប្រកាសមួយរបស់គណៈកម្មការនេះដែលផ្សព្វផ្សាយនៅលើវេបសាយរបស់ខ្លួនហាក់ដូចជាធានាចំពោះវិនិយោគិនម្នាក់ៗឱ្យមានទំនុកចិត្ត។ ភាគហ៊ុនរបស់វិនិយោគិនទាំងនោះមានចំនួនជាងពាក់កណ្តាលនៃបរិមាណនៃការជួញដូរភាគហ៊ុន។ គណៈកម្មការនេះបានសន្យាបង្ក្រាបដោយដាក់ទណ្ឌកម្មធ្ងន់ធ្ងរសម្រាប់ការជួញដូរភាគហ៊ុនផ្ទៃក្នុងនិងការរំលោភបំពានផ្សេងទៀត។
ការសន្យាទាំងនេះបានធ្វើឡើងបន្ទាប់ពីមន្ត្រីជាន់ខ្ពស់មួយចំនួនបានលើកឡើងអំពីសេចក្តីត្រូវការនៅក្នុងការស្តារស្ថិរភាពទីផ្សារភាគហ៊ុនឡើងវិញ។
អ្នកតាមដានស្ថានការណ៍ទីផ្សារភាគហ៊ុនបាននិយាយថា មានសញ្ញាកាលពីថ្ងៃទី ៥ ខែកុម្ភៈថា អាជ្ញាធរបានបញ្ជាឱ្យស្ថាប័នវិនិយោគធំៗបង្កើនការទិញភាគហ៊ុនរបស់ធនាគាររដ្ឋនិងក្រុមហ៊ុនធំៗផ្សេងទៀត។ ភាគហ៊ុនជាច្រើនក្នុងបណ្តាភាគហ៊ុនទាំងនោះបានឡើងតម្លៃច្រើន។
ប៉ុន្តែជារួម ភាគហ៊ុននៅតែធ្លាក់តម្លៃភាគច្រើន ហើយភាគហ៊ុនបច្ចេកវិទ្យាឋិតក្នុងចំណោមភាគហ៊ុនដែលធ្លាក់តម្លៃច្រើនជាងគេបំផុត។
សន្ទស្សន៍ភាគហ៊ុន Shenzhen Component បានខាតបង់ ១,១% បន្ទាប់ពីបានធ្លាក់ចុះរហូតដល់ទៅ ៤,៤%។ សន្ទស្សន៍ភាគហ៊ុន Shanghai Composite បានធ្លាក់ចុះ ១% មកនៅត្រឹម ២.៧០២,១៩ បន្ទាប់ពីបានខាតបង់អស់ ៣,៥% កាលពីមុន។
លោក Stephen Innes នៃក្រុមហ៊ុន SPI Asset Management បានបញ្ជាក់នៅក្នុងរបាយការណ៍មួយថា៖ «ស្ថានភាពនៅក្នុងទីផ្សារភាគហ៊ុនរបស់ចិនហាក់ដូចជាច្របូកច្របល់ ដែលនាំឱ្យមានក្ដីកង្វល់ខ្លាំងអំពីភាពមិនប្រាកដប្រជាផ្នែកនិយតកម្មនិងអន្តរាគមន៍របស់រដ្ឋាភិបាល»។
ក្រុមហ៊ុនចិនបានខាតបង់ភាគហ៊ុនអស់រាប់ពាន់លានដុល្លារ ដោយសារតែវិនិយោគិននានាបានដកខ្លួនចេញពីទីផ្សារភាគហ៊ុននៅហុងកុងនិងចិនដីគោកដើម្បីស្វែងរកទីផ្សារផ្សេងដែលអាចផ្ដល់ផលចំណេញប្រសើរជាងនេះ។
សន្ទស្សន៍ភាគហ៊ុន Nikkei 225 របស់ប្រទេសជប៉ុនបានឡើងថ្លៃនៅក្នុងទីផ្សារជួញដូរភាគហ៊ុនអស់រយៈពេលជិត ៣៥ ឆ្នាំកន្លងមក បើទោះបីជាមួយផ្នែកគឺដោយសារតែការផ្លាស់ប្តូរនៅក្នុងបទបញ្ញត្តិវិនិយោគដែលទាក់ទាញហិរញ្ញវត្ថុឱ្យហូរចូលក្នុងទីផ្សារក៏ដោយ។
ក្រៅពីវិបត្តិក្នុងទីផ្សារអចលនទ្រព្យចិន ដែលក្រុមហ៊ុនអចលនទ្រព្យនានាប្រឹងប្រែងយ៉ាងត្រដាបត្រដួសដើម្បីឱ្យបញ្ជីចំណូលចំណាយរបស់ខ្លួនបានប្រសើរឡើងបន្ទាប់ពីរដ្ឋាភិបាលបានបង្ក្រាបលើការខ្ចីប្រាក់ច្រើនហួសកម្រិតកាលពីប៉ុន្មានឆ្នាំមុនមក ដំណើរយឺតយ៉ាវនៃសេដ្ឋកិច្ចចិនដែលជាសេដ្ឋកិច្ចធំជាងគេបង្អស់ទីពីរនៅលើពិភពលោកបាននាំឱ្យមានផលវិបាកធ្ងន់ធ្ងរ។
ភាពស្រពិចស្រពិលទាក់ទិននឹងភាពតានតឹងរបស់ចិនជាមួយសហរដ្ឋអាមេរិកក៏មិនបានជួយអ្វីដែរ។ អតីតប្រធានាធិបតីអាមេរិកលោក Donald Trump បានគំរាមយកពន្ធ ៦០% លើទំនិញនាំចូលពីចិន នៅចំពេលដែលសហរដ្ឋអាមេរិកកំពុងរារាំងមិនឱ្យចិនមានលទ្ធភាពទទួលបានបន្ទះឈីបកុំព្យូទ័រទំនើបនិងបច្ចេកវិទ្យារសើបផ្នែកយុទ្ធសាស្ត្រផ្សេងទៀត។
កាលពីឆ្នាំ ២០១៨ លោក Trump បានចាប់ផ្តើមសង្គ្រាមពាណិជ្ជកម្មដោយដំឡើងពន្ធខ្លាំងក្លាលើទំនិញនាំចូលពីប្រទេសចិន។ ចិនបានសងសឹកត្រឡប់ទៅវិញដោយការយកពន្ធលើទំនិញដែលនាំចូលមកពីសហរដ្ឋអាមេរិក។ ការយកពន្ធទៅវិញទៅមករវាងប្រទេសទាំងពីរនេះនៅតែបន្តរហូតមកដល់សព្វថ្ងៃនេះ៕
ប្រែសម្រួលដោយលោក ឈឹម សុមេធ
© រក្សាសិទ្ធិដោយ thmeythmey.com
