អន្តរជាតិ
យោធាមីយ៉ាន់ម៉ា អនុវត្តកាតព្វកិច្ចចូលបម្រើយោធាសម្រាប់យុវជនទាំងបុរស និងស្ដ្រី
11, Feb 2024 , 7:39 pm
×![]()
ដោយ: ជា ពេជ្រដាឡែន
ប្រព័ន្ធផ្សព្វផ្សាយរដ្ឋនាថ្ងៃទី១០ខែកុម្ភៈបានរាយការណ៍ថា របបយោធាមីយ៉ាន់ម៉ាបានប្រកាស កាតព្វកិច្ចក្នុងការចូលបម្រើផ្នែកយោធាសម្រាប់បុរស និងស្ត្រីទាំងអស់ ខណៈដែលព្យាយាម ទប់ទល់នឹងកងកម្លាំងឧទ្ទាមប្រដាប់អាវុធដែលកំពុងប្រយុទ្ធដើម្បីស្វ័យភាពកាន់តែច្រើននៅក្នុងតំបន់ផ្សេងៗនៃប្រទេស។
បុរសទាំងអស់ មានអាយុចាប់ពី ១៨ ដល់ ៣៥ ឆ្នាំ និងស្ត្រី មានអាយុ ១៨ ដល់ ២៧ឆ្នាំ ត្រូវបម្រើយោធារហូតដល់ ២ ឆ្នាំ ខណៈដែលអ្នកឯកទេសដូចជាវេជ្ជបណ្ឌិតដែលមានអាយុ ដល់ ៤៥ ឆ្នាំត្រូវបម្រើរយៈពេល ៣ ឆ្នាំ។ ប្រព័ន្ធផ្សព្វផ្សាយរដ្ឋសម្គាល់ផងដែរថា ការបម្រើ សេវាកម្មយោធានេះអាចត្រូវបានបន្តរហូតដល់ចំនួនសរុប ៥ ឆ្នាំនៅក្នុងស្ថានភាពអាសន្ន ដែលកំពុងបន្ត។
«កាតព្វកិច្ចការពារ និងការពារជាតិមានលើសពីទាហានរហូតដល់ប្រជាពលរដ្ឋទាំងអស់»។ អ្នកនាំពាក្យរបបយោធាលោក Zaw Min Tun បានប្រាប់ប្រព័ន្ធផ្សព្វផ្សាយរដ្ឋបែបនេះរួច ប្រាប់មនុស្សគ្រប់គ្នាឱ្យគោរពច្បាប់បម្រើយោធានដោយមោទកភាពផងដែរ។
មីយ៉ាន់ម៉ាស្ថិតក្នុងស្ថានភាពវឹកវរចាប់តាំងពីយោធាបានដណ្តើមអំណាចពីរដ្ឋាភិបាលជាប់ឆ្នោតក្នុងរដ្ឋប្រហារឆ្នាំ ២០២១។ ចាប់តាំងពីខែតុលាមក កងទ័ពយោធាមីយ៉ាន់ម៉ា Tatmadaw បានទទួលរងការបាត់បង់កងកម្លាំងខ្លួនក្នុងការប្រយុទ្ធនឹងការវាយលុកដោយសម្ព័ន្ធមិត្តនៃក្រុមបះបោរជនជាតិភាគតិចចំនួនបី ក៏ដូចជាក្រុមយុទ្ធជនគាំទ្រលទ្ធិប្រជាធិបតេយ្យ។
វាគឺជាបញ្ហាប្រឈមដ៏ធំបំផុតដែលយោធាបានជួបប្រទះចាប់តាំងពីការឡើងកាន់អំណាចលើកដំបូងនៅក្នុងអតីតអាណានិគមអង់គ្លេសក្នុងឆ្នាំ ១៩៦២ ។ អ្នកវិភាគសម្គាល់ថា យោធា កំពុងស្វះស្វែងក្នុងការជ្រើសរើសទាហាន ហើយបានចាប់ផ្តើមបង្ខំទាហានមិនប្រយុទ្ធទៅជួរ មុខទៀតផង។
ច្បាប់ដែលតម្រូវឱ្យមានការចុះចូលក្នុងការបម្រើយោធាត្រូវបានដាក់ឱ្យប្រើក្នុងឆ្នាំ ២០១០ ប៉ុន្តែមិនទាន់បានអនុវត្តរហូតមកដល់ពេលនេះទេ។ ច្បាប់នេះសម្គាល់ថា អ្នកដែលមិនគោរព តាមសេចក្តីព្រាងច្បាប់នេះប្រឈមនឹងការជាប់ពន្ធនាគាររហូតដល់៥ឆ្នាំ៕
© រក្សាសិទ្ធិដោយ thmeythmey.com
