RFI
អន្តរជាតិ
រុស្ស៊ី និងចិនចោទអាមេរិកពីបទប្រើនយោបាយរារាំង និងជ្រៀតជ្រែក 11, Feb 2024 , 9:39 pm
ប្រធានាធិបតីចិនលោកស៊ី ជីន ពីង និងសមភាគីរុស្ស៊ីលោកវ្ល៉ាឌីមៀរ ពូទីន។ AP
×
ដោយ៖កែវ ឆាយា /RFI ខេមរភាសា
ប្រធានាធិបតីចិនលោកស៊ី ជីន ពីង និងសមភាគីរុស្ស៊ីលោកវ្ល៉ាឌីមៀរ ពូទីនបានជួបសន្ទនាគ្នាតាមទូរស័ព្ទក្នុងថ្ងៃព្រហស្បតិ៍ ទី៨ កុម្ភៈ។ លទ្ធផលនៃកិច្ចសន្ទនាត្រូវបានទីប្រឹក្សាការទូតវិមានក្រេមឡាំងលោក Yuri Oushakov ប្រាប់ឲ្យដឹងថា លោកស៊ី និងលោកពូទីនបានសម្តែងជំហរច្រានចោលនយោបាយអាមេរិកដែលជ្រៀតជ្រែកចូលកិច្ចការផ្ទៃក្នុងរបស់រដ្ឋដទៃ។ តាមលោក Yuri Oushakov មេដឹកនាំប្រទេសទាំងពីរយល់ច្បាស់ថា សហរដ្ឋអាមេរិកលើកយកទៅអនុវត្តនូវនយោបាយរារាំងដំណើរទៅមុខរបស់ចិន និងរុស្ស៊ី។
នៅក្នុងកិច្ចសន្ទនារយៈពេល ១ម៉ោងក្នុងស្មារតីមិត្តភាព លោកពូទីន និងលោកស៊ីបានបញ្ជាក់ថា ក្រុងមូស្គូ និងក្រុងប៉េកាំងគាំទ្រគ្នាទៅវិញទៅមកក្នុងបញ្ហាណាដែលជាគន្លឹះនាំឲ្យប៉ះពាល់ដល់ផលប្រយោជន៍ជាតិរៀងៗខ្លួន។ ចំណែកទូរទស្សន៍រដ្ឋចិនឈ្មោះ CCTV ក៏បានផ្សាយពីកិច្ចសន្ទនាតាមទូរស័ព្ទរវាងលោកស៊ី និងលោកពូទីនដែរ។ តាម CCTV មេដឹកនាំទាំងពីរបាននិយាយទៅកាន់គ្នាទៅវិញទៅមកដោយបញ្ជាក់ថា ប្រទេសទាំងពីរត្រូវតែប្រឆាំងនឹងការលូកដៃជ្រៀតជ្រែកពីបរទេសដោយមិននិយាយចំឈ្មោះសហររដ្ឋអាមេរិកទេ។
គួរបញ្ជាក់ថា ចិននិងរុស្ស៊ីតែងបរិហារជារឿយៗនូវការលូកដៃជ្រៀតជ្រែកពីក្រៅដែលខ្លួនជាអ្នករងគ្រោះ ពិសេសពីពួកប្រទេសបស្ចិមលោក ទោះជារឿងកោះតៃវ៉ាន់ ឬរឿងរុស្ស៊ីវាយលុកនៅអ៊ុយក្រែន។
តាមការផ្សព្វផ្សាយរបស់ទូរទស្សន៍រដ្ឋចិន CCTV ដដែរ លោកស៊ី ជីនពីង និងលោក វ៉្លាឌីមៀរ ពូទីនបានប្តេជ្ញាធ្វើការដោយសហការគ្នាយ៉ាងស្អិតរមួតតាមវិធីយុទ្ធសាស្ត្រតែម្តង។ លោកស៊ីបានគូសបញ្ជាក់ប្រាប់លោកពូទីនថា ចិន និងរុស្ស៊ីត្រូវតែការពារអធិបតេយ្យភាព សន្តិសុខ និងផលប្រយោជន៍នៃការអភិវឌ្ឍន៍ប្រទេសរៀងៗខ្លួន និងប្រឆាំងប្តូរប្តេជ្ញទល់នឹងការជ្រៀតជ្រែកពីកម្លាំងខាងក្រៅចូលកិច្ចការផ្ទៃក្នុងរបស់ប្រទេសទាំងពីរ។
ទន្ទឹមគ្នានេះ ការសន្ទនាតាមទូរសព្ទរវាងមេដឹកនាំទាំងពីរក៏មានការជូនពរឲ្យគ្នាទៅវិញទៅមកក្នុងឱកាសបុណ្យចូលឆ្នាំចិនដែលចាប់ផ្តើមនៅថ្ងៃសៅរ៍ ទី ១០ កុម្ភៈ។ គួរបញ្ជាក់ថា រុស្ស៊ីដែលត្រូវបានបស្ចិមលោកកាត់ផ្តាច់ដោយសារសង្រ្គាមអ៊ុយក្រែនកំពុងរំពឹងខ្លាំងលើក្រុមប្រទេសសម្ព័ន្ធមិត្តរបស់ខ្លួន ពិសេសចិនតែម្តង។ ចិន និងរុស្ស៊ីមានមហិច្ឆតាដូចគ្នាក្នុងការឈានទៅកាត់កាត់បន្ថយអនុត្តរភាពអាមេរិកលើកិច្ចការពិភពលោក។ ចិនបានបង្ហាញឲ្យឃើញពីការផ្គាប់ចិត្តរបស់ខ្លួនចំពោះរុស្ស៊ីទាក់ទងនឹងប្រតិបត្តិការវាយលុករបស់រុស្ស៊ីនៅអ៊ុយក្រែន។
ពិតណាស់នៅក្នុងសំណុំរឿងនេះ ចិនធ្លាប់បានអំពាវនាវឲ្យគោរពបូរណភាពដែនដីនៃគ្រប់ប្រទេសទាំងអស់ រួមទាំងប្រទេសអ៊ុយក្រែនផង។ តែចិនមិនដែលបានថ្កោលទោសរុស្ស៊ីជាសាធារណៈនៅក្នុងសង្រ្គាមរុស្ស៊ីឈ្លានពានអ៊ុយក្រែនទេ។ ទោះជាយ៉ាងណា លោក ស៊ីបានសង្កត់ធ្ងន់ប្រាប់លោកពូទីនថា ចិនត្រៀមធ្វើការងារជាមួយរុស្ស៊ីដើម្បីពង្រឹងការសម្របសម្រួលពហុភាគីអន្តរជាតិ អនុវត្តគោលការណ៍ពហុប៉ូលនិយម និងការពារពិភពលោកពហុប៉ូលស្មើភាពគ្នា៕
© រក្សាសិទ្ធិដោយ thmeythmey.com