អតីតប្រធានាធិបតីអាម៉េរិក លោក ដូណាល់ ត្រាំ ត្រូវបានសេតវិមានរិះគន់បន្ទាប់ពីបានលាតត្រដាងថា លោកបានគំរាមបោះបង់សមាជិកណាតូដែលមិនបានរួមចំណែកថវិកាគ្រប់គ្រាន់ក្នុងករណីដែលពួកគេត្រូវបានវាយប្រហារដោយរុស្ស៊ី។
ការលើកឡើងរបស់លោក ត្រាំ ពាក់ព័ន្ធនឹងការគំរាមមិនការពារសម្ព័ន្ធមិត្តណាតូ ត្រូវបានធ្វើឡើងក្នុងអំឡុងពេលយុទ្ធនាការឃោសនាបោះឆ្នោតនៅរដ្ឋ South Carolina នៅថ្ងៃទី ១០ ខែកុម្ភៈ នៅពេលដែលអតីតប្រធានាធិបតីអាម៉េរិករូបនេះបានរម្លឹកឡើងវិញអំពីជំនួបជាមួយមេដឹកនាំណាតូ។
«ប្រសិនបើយើងមិនចូលរួមចំណែកពេញលេញ ហើយរុស្ស៊ីវាយប្រហារយើង តើអាម៉េរិកនឹងការពារយើងដែរឬទេ?» មេដឹកនាំណាតូម្នាក់បានសួរលោក ត្រាំ បែបនេះ។
លោក ត្រាំ បានឆ្លើយតបដែលមើលទៅដូចកំពុងលើកទឹកចិត្តរុស្ស៊ីឱ្យវាយប្រហារសម្ព័ន្ធមិត្តណាតូ។ លោកអះអាងថា ៖« អ្នកមិនបានរួមចំណែកគ្រប់គ្រាន់ទេ? អ្នកកំពុងធ្វើការងាររបស់អ្នកមិនបានត្រឹមត្រូវ។ ប្រសិនបើរឿងនោះកើតឡើង យើងនឹងមិនការពារអ្នកទេ»។ លោកត្រាំ បានព្រមានបែបនេះ ដោយជំរុញឱ្យសមាជិកអង្គការណាតូ បង់វិភាគទានឱ្យបានត្រឹមត្រូវ។
សេចក្តីថ្លែងការណ៍របស់លោក ត្រាំ ត្រូវបានរងការរិះគន់យ៉ាងខ្លាំងពីសេតវិមាន។ អ្នកនាំពាក្យសេតវិមានលោក Andrew Bates បាននិយាយថា ការលើកទឹកចិត្តប្រទេសផ្សេងទៀតឱ្យវាយប្រហារសម្ព័ន្ធមិត្តជិតស្និទ្ធបំផុតរបស់អាម៉េរិក ជាទង្វើដ៏គួរឱ្យភ័យខ្លាច និងល្ងង់ខ្លៅ ដែលបង្កគ្រោះថ្នាក់ដល់សន្តិសុខជាតិ និងសេដ្ឋកិច្ចរបស់អាម៉េរិក ក៏ដូចជាស្ថិរភាពពិភពលោក។
ទន្ទឹមនេះ ការថ្លែងរបស់លោក ត្រាំ ក៏បានធ្វើឱ្យលោក Jens Stoltenberg អគ្គលេខាធិការអង្គការណាតូខឹងសម្បារដែរ។ លោក Stoltenberg បាននិយាយថា ការវាយប្រហារណាមួយលើអង្គការណាតូ នឹងត្រូវបានឆ្លើយតបដោយរួបរួមគ្នា និងខ្លាំងក្លា។
ប្រមុខណាតូរូបនេះបញ្ជាក់ថា រាល់ការលើកឡើងដោយសមាជិកនៃប្លុកនេះដែលមិនបានការពារគ្នា នឹងធ្វើឱ្យកម្លាំងនៃសម្ព័ន្ធភាពយោធានេះចុះខ្សោយ ច្បាស់ណាស់នឹងធ្វើឱ្យពលទាហានស្ថិតក្នុងស្ថានភាពគ្រោះថ្នាក់។
បន្ថែមពីនេះ ប្រធានាធិបតីអាម៉េរិក ចូ បៃឌិន ក៏បាននិយាយប្រឆាំងនឹងការថ្លែងរបស់លោក ត្រាំ ដែរ។ លោកបានព្រមានថា ប្រសិនបើលោក ត្រាំ ត្រឡប់ទៅកាន់សេតវិមានវិញ អាម៉េរិកនឹង អនុញ្ញាតឱ្យរុស្ស៊ីធ្វើអ្វីគ្រប់យ៉ាង។
«បើដៃគូប្រជែងរបស់ខ្ញុំ (ដូណាល់ ត្រាំ) ត្រលប់មកកាន់អំណាចវិញ លោកនឹងធ្វើវាច្បាស់ណាស់ថា នឹងបោះបង់សម្ព័ន្ធមិត្តណាតូ ប្រសិនបើរុស្ស៊ីវាយប្រហារ»។ លោកបៃឌិន បានថ្លែងបែបនេះ នៅថ្ងៃទី១១ ខែកុម្ភៈ។
ចំណែក គូប្រជែងខាងគណបក្សសាធារណរដ្ឋដែលនៅសេសសល់របស់លោក ត្រាំ គឺលោកស្រី Nikki Haley ក៏បានវាយប្រហារលោក ត្រាំ ចំពោះការលើកឡើងបែបនេះដែរដោយបញ្ជាក់ថា លោកស្រីនឹងចូលរួមជាមួយអង្គការណាតូ ប្រសិនបើលោកស្រីជាប់ឆ្នោតជាប្រធានាធិបតី។
គួរបញ្ជាក់ថា សន្ធិសញ្ញាអង្គការណាតូមានបទបញ្ញត្តិដែលធានាការការពារទៅវិញទៅមកនៃរដ្ឋជាសមាជិក ប្រសិនបើប្រទេសណាមួយត្រូវបានវាយប្រហារ។ បច្ចុប្បន្នសមាជិកណាតូមាន ៣១ប្រទេសក្នុងនោះ ២៩ប្រទេសមកពីតំបន់អឺរ៉ុប និង ២ប្រទេសទៀតគឺអាម៉េរិក និងកាណាដា៕