អន្តរជាតិ
តុលាការបង្គាប់ហូឡង់បញ្ឈប់ចែកចាយគ្រឿងបរិក្ខារយន្តហោះF-35 ដល់អុីស្រាអែល 13, Feb 2024 , 9:59 am
យន្តហោះចម្បាំង F-35។ រូបភាព AFP
× ហូឡង់ត្រូវតែបញ្ឈប់ការផ្តល់គ្រឿងបរិក្ខារនៃយន្តហោះចម្បាំង F-35 ដែលអុីស្រាអែល ប្រើប្រាស់នៅតំបន់កាហ្សា។ តុលាការឧទ្ធរណ៍ហូឡង់ បានចេញសាលដីកាបែបនេះ នៅថ្ងៃទី១២ ខែកុម្ភៈ ក្រោមហេតុផល ការលក់គ្រឿងបង្គុំទាំងនោះ ធ្វើឡើងដោយសារវាអាច ព័ន្ធនឹងការបំពានច្បាប់មនុស្សធម៌អន្តរជាតិ។ យ៉ាងណាមិញ រដ្ឋាភិបាលជំទាស់សេចក្តីសម្រេចមួយនេះ។
បើតាមសាលាឧទ្ធរណ៍ក្នុងទីក្រុងឡាអេ គ្រឿងបន្លាស់ដែលនាំចេញពីហូឡង់ទៅអុីស្រាអែលបានរួមចំណែករំលោភច្បាប់ដោយអុីស្រាអែលក្នុងសង្រ្គាមប្រឆាំងក្រុមហាម៉ាស។
«តុលាការបញ្ជាឱ្យរដ្ឋាភិបាលបញ្ឈប់ការនាំចេញគ្រឿងបរិក្ខារF-35 បន្ថែមទៀតទៅកាន់អុីស្រាអែល ក្នុងរយៈពេល ៧ ថ្ងៃ»។ សាលដីការបស់តុលាលើកឡើងបែបនេះ រួចបន្តថា វាមានហានិភ័យច្បាស់លាស់ដែលការបំពានច្បាប់មនុស្សធម៌ធ្ងន់ធ្ងរត្រូវបានប្រព្រឹត្តនៅក្នុងតំបន់កាហ្សាជាមួយនឹងយន្តហោះចម្បាំង F-35 របស់អុីស្រាអែល។
តាមពិតទៅ គ្រឿងបង្គុំ F-35 ក្នុងរឿងនេះ ជាកម្មសិទ្ធិរបស់អាម៉េរិក ដែលត្រូវបានរក្សាទុកនៅឃ្លាំងនៅហូឡង់ ហើយបន្ទាប់មកត្រូវបានដឹកជញ្ជូនទៅកាន់ដៃគូជាច្រើន រួមទាំងអុីស្រាអែល តាមរយៈកិច្ចព្រមព្រៀងនាំចេញដែលមានស្រាប់។ អាជ្ញាប័ណ្ណនាំចេញត្រូវបានផ្តល់នៅឆ្នាំ ២០១៦ ក្នុងរយៈពេលមិនកំណត់ ប៉ុន្តែតុលាការបានសម្រេចថាស្ថានភាពបានផ្លាស់ប្តូរយ៉ាងខ្លាំងចាប់តាំងពីពេលនោះមក។
តុលាការសម្គាល់ផងដែរថា ទោះបីអាជ្ញាបណ្ណត្រូវបានបញ្ចប់ក្នុងរយៈពេលមិនកំណត់រយៈពេលក្ដី ក៏មិន មានន័យថារដ្ឋអាចបិទភ្នែកចំពោះអ្វីដែលអាចកើតឡើងនៅពេលក្រោយនោះទេ។
កាលពីខែធ្នូ តុលាការថ្នាក់ក្រោមនៅទីក្រុងឡាអេបានបញ្ជាក់ថា ការផ្គត់ផ្គង់គ្រឿងបន្លាស់ ជាការសម្រេចចិត្តផ្នែកនយោបាយដែលចៅក្រមមិនគួរជ្រៀតជ្រែកឡើយ។ ប៉ុន្តែ តុលាការឧទ្ធរណ៍បានបដិសេធការសម្រេចនេះ ដោយសង្កត់ធ្ងន់ថា ហូឡង់ត្រូវតែហាមឃាត់ការនាំចេញទំនិញយោធា ប្រសិនបើមានហានិភ័យច្បាស់លាស់នៃការរំលោភច្បាប់មនុស្សធម៌ធ្ងន់ធ្ងរក្នុងសង្គ្រាម។
ក្រោយសេចក្តីសេចក្តីសម្រេចខាងលើ រដ្ឋាភិបាលក្រុងអាំស្ទែដាំ បានជំទាស់ និងដាក់បណ្តឹងតវ៉ាទៅកាន់តុលាការកំពូល ក្រោមហេតុផលថាគ្រឿងបន្លាស់ទាំងនោះ ជាផ្នែកនៃអាវុធដ៏សំខាន់សម្រាប់អុីស្រាអែល ក្នុងការការពារខ្លួន។
គិតត្រឹមថ្ងៃទី១២ ខែកុម្ភៈ ក្រសួងសុខាភិបាលដែលគ្រប់គ្រងដោយក្រុមហាម៉ាសអះអាង ថា ការវាយប្រហាររបស់អុីស្រាអែលបានសម្លាប់មនុស្សយ៉ាងហោចណាស់ ២៨៣៤០នាក់ដែលភាគច្រើនជាស្ត្រី និងកុមារ៕
Tag:
ហូឡង់
អុីស្រាអែល
ប៉ាឡេស្ទីន
© រក្សាសិទ្ធិដោយ thmeythmey.com