ជាតិ
រដ្ឋបាលខេត្តកំពង់ចាម បញ្ជាឱ្យម្ចាស់ដីកាយថ្មដែលចាក់ក្នុងទន្លេចេញឱ្យអស់ ក្នុងពេលយ៉ាងយូរ៧០ថ្ងៃ 22, Feb 2024 , 9:42 pm
រូបភាពចាក់ថ្មចូលផ្ទៃទន្លេ ក្នុងខេត្តកំពង់ចាម។ រូបភាពពីរដ្ឋបាលខេត្តកំពង់ចាម
× ភ្នំពេញ៖ ក្រោយការបង្ហោះរូបភាព ទាក់ទងនឹងសកម្មភាពចាក់ថ្មចូលផ្ទៃទន្លេ ក្នុងភូមិសាស្ត្រស្រុកស្រីសន្ធរ រដ្ឋបាលខេត្តកំពង់ចាម បានចេញចំណាត់ការបន្ទាន់ ដោយបញ្ជាឱ្យបញ្ឈប់សកម្មភាព និងត្រូវកាយថ្មចេញពីទឹកឱ្យអស់។ នេះបើតាមសេចក្ដីប្រកាសព័ត៌មានចេញផ្សាយយប់ថ្ងៃទី២២ កុម្ភៈនេះ។
នៅលើបណ្ដាញសង្គម មានការចែកចាយរូបភាពដែលម្ចាស់ដីមួយកន្លែង ស្ថិតនៅភូមិព្រៃទទឹង ឃុំឫស្សីស្រុក ស្រុកស្រីសន្ធរ បានចាក់ថ្មចូលផ្ទៃទន្លេ។ សកម្មភាពបែបនេះ ធ្វើឱ្យមានការរិះគន់ជាហូរហែ ពីសំណាក់អ្នកប្រើប្រាស់បណ្ដាញសង្គម។ ជុំវិញករណីនេះ រដ្ឋបាលខេត្តកំពង់ចាម បានចេញសេចក្ដីប្រកាសព័ត៌មានភ្លាមៗ ដោយបញ្ជាក់ថា៖«ពិតជា មានសកម្មភាពចាក់ថ្មចូលផ្ទៃទន្លេពិតប្រាកដមែន»។
ករណីចាក់ថ្មចូលផ្ទៃទន្លេនេះ បានចាប់ផ្ដើមតាំងពីថ្ងៃទី២ ខែមករា ឆ្នាំ ២០២៤។ បើតាមរដ្ឋបាលខេត្តកំពង់ចាម ការចាក់ថ្មនេះ គឺចាក់ចូលទៅក្នុងផ្ទៃទន្លេប្រវែង ៥៥ម៉ែត្រ និងគ្រោងចាក់បណ្តោយទន្លេប្រវែង ២៩៤.៦ម៉ែត្រ ដោយបច្ចុប្បន្នចាក់បានប្រវែង ១៣០ម៉ែត្រ។
ក្រោយចុះពិនិត្យដល់ទីតាំងខាងលើ រដ្ឋបាលខេត្តកំពង់ចាម អះអាងថា សកម្មភាពនៃការចាក់ថ្មចូលផ្ទៃទន្លេនេះ គឺពុំមានច្បាប់អនុញ្ញាតឡើយ។ ដើម្បីដោះស្រាយបញ្ហានេះ រដ្ឋបាលខេត្តកំពង់ចាម បានចេញវិធានការបន្ទាន់ ដោយតម្រូវឱ្យភាគីម្ចាស់ដី បញ្ឈប់សកម្មភាពចាក់ថ្មចូលផ្ទៃទន្លេដោយគ្មានច្បាប់អនុញ្ញាត ទោះក្នុងហេតុផលណាមួយក៏ដោយ។
រូបភាពពីរដ្ឋបាលខេត្តកំពង់ចាម
ក្នុងសេចក្ដីប្រកាសព័ត៌មាន រដ្ឋបាលខេត្តកំពង់ចាម បញ្ជាថា៖ «ម្ចាស់ដី ត្រូវកាយ និងយកថ្មដែលបានចាក់រួចចេញឱ្យអស់ ក្នុងរយៈពេលយ៉ាងយូរ ៧០ ថ្ងៃជាកំណត់ និងមិនត្រូវកាយពង្រាយទម្លាក់ចូលក្នុងទឹកទន្លេឡើយ ដើម្បីបញ្ចៀសផលប៉ះពាល់ទៅថ្ងៃក្រោយសម្រាប់ការធ្វើចរាចរណ៍តាមផ្លូវទឹក»។
ជាមួយគ្នានេះ ភាគីម្ចាស់ដីត្រូវរាយការណ៍អំពីវឌ្ឍនភាពនៃការកាយថ្មនេះ មករដ្ឋបាលខេត្តកំពង់ចាម មួយខែម្តង នៅរៀងរាល់ចុងខែនីមួយៗ។ ក្រុមការងាររបស់រដ្ឋបាលខេត្តកំពង់ចាម នឹងបន្តចុះធ្វើការពិនិត្យ តាមដានការអនុវត្តវិធានការនេះ នៅរៀងរាល់មួយសប្តាហ៍ម្តង ឬតាមពេលវេលាជាក់ស្ដែងផងដែរ។
វិធានការខាងលើ ជាវិធានការបឋម។ សម្រាប់វិធានការបន្ទាប់ គឺរដ្ឋបាលខេត្តកំពុងសិក្សាតាមផ្លូវច្បាប់ ដើម្បីស្នើដាក់បន្ទុកទៅលើជនល្មើសបន្ថែមទៀត។ សូមបញ្ជាក់ថា ក្រោយចុះពិនិត្យឃើញពីបញ្ហានេះ រដ្ឋបាលខេត្តកំពង់ចាម បានអរគុណដល់ប្រជាពលរដ្ឋ និងអ្នកសារព័ត៌មាន ដែលបានផ្តល់ ព័ត៌មានពិតប្រាកដ ទាន់ហេតុការណ៍មកកាន់រដ្ឋបាលខេត្ត ដើម្បីមានវិធានទប់ស្កាត់នូវបទល្មើសនានា៕
រូបភាពពីរដ្ឋបាលខេត្តកំពង់ចាម
© រក្សាសិទ្ធិដោយ thmeythmey.com