RFI
អន្តរជាតិ
សម័យប្រជុំក្រុមប្រឹក្សាសិទ្ធិមនុស្សរួមរឹតដោយសង្គ្រាមហ្កាហ្សា និងអ៊ុយក្រែន 27, Feb 2024 , 7:39 pm
លោកអគ្គលេខាធិការអង្គការសហប្រជាជាតិ ក្នុងជំនួបប្រជុំក្រុមប្រឹក្សាសិទ្ធិមនុស្ស ថ្ងៃទី ២៦ កុម្ភៈ២០២៤ AP - Salvatore Di Nolfi
×
ដោយ៖អៀង សុខម៉ិញ/RFI ខេមរភាសា
ក្រុមប្រឹក្សាសិទ្ធិមនុស្សអង្គការសហប្រជាជាតិបានបើកសម័យប្រជុំលើកទី៥៥របស់ខ្លួននៅ នៅថ្ងៃចន្ទទី ២៦កុម្ភៈ នាទីក្រុងហ្សឺណែវ។ សង្គ្រាមរវាងអ៊ីស្រាអែលនិងចលនាហាម៉ាស ព្រមទាំងទុក្ខវេទនារបស់ប្រជាពលរដ្ឋនៅតំបន់ហ្កាហ្សា បានក្លាយជាប្រធានបទស្នូល ក្នុងថ្ងៃបើកប្រជុំដំបូងតែម្តង។
ខុសពីទម្លាប់សព្វមួយដង លោកអង់តូនីញ៉ូ ហ្គូទែរស៍ អគ្គលេខាធិការអង្គការសហប្រជាជាតិបានអញ្ជើញមកធ្វើជាអធិបតីបើកសម័យប្រជុំលើកទី៥៥របស់ក្រុមប្រឹក្សាសិទ្ធិមនុស្សអង្គការសហប្រជាជាតិ ឱ្យកាន់តែមានទម្ងន់ឡើង។ ក្នុងសុន្ទរកថាលោកបានបំពងសំឡេងរំលឹកថា សិទ្ធិមនុស្សមិនអាចកាត់ផ្តាច់ពីសន្តិភាពបានទេ តែសព្វថ្ងៃសិទ្ធិមនុស្សនិងសន្តិភាពកំពុងរងការវាយប្រហារយ៉ាងខ្លាំង។ លោកចង់សំដៅលើជម្លោះនៅហ្កាហ្សានិងនៅអ៊ុយក្រែន។
ពីមួយថ្ងៃទៅមួយថ្ងៃ ពិភពលោកកាន់តែគ្រោះថ្នាក់ឡើងៗ ហើយបញ្ហានៅត្រង់ថាអង្គការសហប្រជាជាតិគ្មានសមត្ថភាពដោះស្រាយទេ។ ក្រុមប្រឹក្សាសន្តិសុខត្រូវគាំងស្តូក។ ឯក្រុមប្រឹក្សាសិទ្ធិមនុស្សលែងយល់ស្របគ្នាចំពោះវិបត្តិធំៗ។ គេបានដឹងតាំងពីយូរមក តែពេលនេះគឺអគ្គលេខាធិការអង្គការសហប្រជាជាតិបាននិយាយចេញពីមាត់លោកផ្ទាល់តែម្តង ទៅកាន់រដ្ឋសមាជិក។ ដូច្នេះច្បាស់ជាលាន់ខ្ទរខ្លាំងហើយ។ លោក ហ្គូទែរស៍ បានថែមទាំងអះអាងថា ភាពប្រេះឆាក្នុងរង្វង់ក្រុមប្រឹក្សាសិទ្ធិមនុស្ស និងសន្តិសុខក្នុងសំណុំរឿងសង្គ្រាមនៅអ៊ុយក្រែន និងហ្កាហ្សា នឹងធ្វើឱ្យស្ថាប័ននេះអស់តម្លៃ។ ដើម្បីដើរចេញពីភាពទ័លច្រក លោកអគ្គលេខាធិការរំពឹងលើជំនួបកំពូលខែកញ្ញានៅទីក្រុងញូវយ៉ក ដែលជាឱកាសជួបជុំមហាសន្និបាតដាស់រំលឹកឱ្យគោរពបទបញ្ជាផ្ទៃក្នុងនិងគោលការណ៍ពហុជាតិ។
ទាក់ទងនឹងស្ថានភាពនៅតំបន់ហ្កាហ្សា លោកអគ្គលេខាធិការអង្គការសហប្រជាជាតិ បានគូសបញ្ជាក់ថា ប្រតិបត្តិការយោធារបស់អ៊ីស្រាអែលលើតំបន់រ៉ាហ្វា គឺជាការបញ្ចប់ជំនួយមនុស្សធម៌ ដែលទោះមិនគ្រប់គ្រាន់ក៏អាចជួយធានាភាពរស់រានរបស់ពលរដ្ឋហ្កាហ្សារាប់សិបរយនាក់។ គ្មានហេតុផលអ្វីជាសំអាងសម្រាប់ឱ្យពួកហាម៉ាសមកធ្វើឃាត ទារុណកម្ម និងចាប់ខ្លួនជនស៊ីវិល ហើយប្រើអំពើហិង្សាផ្លូវភេទ ឬបាញ់រ៉ុកកែតសំដៅអ៊ីស្រាអែលទេ។ ហើយក៏គ្មានអ្វីជាសំអាងសក្តិសមដែលជំរុញឱ្យអ៊ីស្រាអែលដាក់ទណ្ឌកម្មជាសមូហភាពលើប្រជាជនប៉ាឡេស្ទីនដែរ។ នេះជាប្រសាសន៍របស់លោកអង់តូនីញ៉ូ ហ្គូទែរស៍ ដោយអំពាវនាវឱ្យមានបទឈប់បាញ់មនុស្សធម៌ជាបន្ទាន់និងការដោះលែងចំណាប់ខ្មាំងទាំងអស់ភ្លាមដោយគ្មានលក្ខខណ្ឌ។
ប្រតិកម្មរបស់លោកអគ្គលេខាធិការអង្គការសហប្រជាជាតិ ពីវេទិការបស់ក្រុមប្រឹក្សាសិទ្ធិមនុស្ស ធ្វើឡើងក្រោយពីនាយករដ្ឋមន្ត្រីអ៊ីស្រាអែល នេតាន់យ៉ាហ៊ូ បានប្រកាសកាលពីថ្ងៃអាទិត្យ បើកប្រតិបត្តិការទ្រង់ទ្រាយធំ លើតំបន់រ៉ាហ្វា ដើម្បីធានាជោគជ័យទាំងស្រុងលើពួកហាម៉ាស។ សម្រាប់លោកនេតាន់យ៉ាហ៊ូ បទឈប់បាញ់ថ្មីដែលកំពុងស្ថិតនៅលើតុចរចានៅដូហា គ្រាន់តែពន្យឺតពេលធ្វើប្រតិបត្តិការតែបន្តិចតែប៉ុណ្ណោះ៕
© រក្សាសិទ្ធិដោយ thmeythmey.com