ក្រោយពេលកូរ៉េខាងត្បូង បានសម្រេចបញ្ចប់តំណែងគ្រូបង្វឹករបស់លោក Jurgen Klinsmann រួចកាលពីសប្តាហ៍មុន គណៈកម្មាធិការបាល់ទាត់ជាតិកូរ៉េខាងត្បូង បានសម្លឹងរកមើលអ្នកមកជំនួសតំណែងបណ្តោះអាសន្ន។ លោក Klinsmann ត្រូវបណ្តេញចេញក្រោមមូលហេតុ ក្រុមធ្លាក់ពី Asian Cup 2023 ត្រឹមវគ្គពាក់កណ្តាលផ្តាច់ព្រ័ត្រ ព្រោះតែជម្លោះក្នុងក្រុម និងគ្មានទំនួសខុសត្រូវ។
 

លោក Hwang គ្រូបង្វឹកក្រុមកូរ៉េខាងត្បូងអាយុក្រោម ២៣ឆ្នាំ បានជួយក្រុមឈ្នះមេដាយមាស​ព្រឹត្តិការណ៍កីឡាអាស៊ីទីក្រុងហាងចូវ កាលឆ្នាំ ២០២២។ 
 

បុរសវ័យ ៥៥ឆ្នាំ ក៏ជាសមាជិកក្រុមជម្រើសជាតិកូរ៉េខាងត្បូង ពេលដែលប្រទេសនេះ ធ្វើសហម្ចាស់ផ្ទះរៀបចំព្រឹត្តិការណ៍ World Cup 2002 ជាមួយប្រទេសជប៉ុន ហើយបានជួយក្រុមឡើងដល់វគ្គពាក់កណ្តាលផ្តាច់ព្រ័ត្រកាលនោះ។
 

Asian Cup 2023 ត្រូវបានក្រុមជម្រើសជាតិកូរ៉េខាងត្បូង ដាក់គោលដៅឈ្នះពានរង្វាន់ជាចាំបាច់បំផុត បន្ទាប់ពីក្រុមនេះ បានរង់ចាំរយៈពេល ៦៤ឆ្នាំ សម្រាប់ជ័យជម្នះពានរង្វាន់ជាលើកទី៣ ក្នុងប្រវត្តិសាស្ត្រ។ តែបញ្ហាមុនការប្រកួតរវាងកីឡាករវ័យក្មេងក្នុងក្រុម និងកីឡាករវ័យចាស់ អំឡុងពិធីទទួលទានអាហាពេលល្ងាច មុនជំនួបសំខាន់មកដល់ បានធ្វើឱ្យប៉ះទង្គិចផ្លូវអារម្មណ៍ក្រុម ហើយប្រែជាប្រកួតចាញ់។ 
 

បញ្ហាបង្កឱ្យក្តីស្រម៉ៃត្រូវរសាត់ឆ្ងាយ លោក Klinsmann ជាគ្រូបង្វឹករងការរិះគន់ខ្លាំងពីសំណាក់ប្រជាជនកូរ៉េខាងត្បូង ព្រមទាំងបាត់បង់ទំនុកចិត្តពីសមាគម KFA។
 

កូរ៉េខាងត្បូង ត្រៀមលក្ខណៈជម្រុះ World Cup 2026 លោក Hwang នឹងដើរតួសំខាន់ក្នុងការផ្សារភ្ជាប់ទំនាក់ទំនងល្អលើទីលានឡើងវិញ រវាងប្រធានក្រុម Heung Min Son របស់ក្លិប Tottenham Hotspur ជាមួយនឹងសិស្សប្អូន Lee Kang-In របស់ក្លិប Paris Saint Germain ផងដែរ៕