ក្នុងកិច្ចប្រជុំថ្នាក់ដឹកនាំរួមគ្នារវាងប៉ូលិស និងកងកម្លាំងប្រដាប់អាវុធជាតិនៅថ្ងៃទី២៨ ខែកុម្ភៈ នៅទីស្នាក់ការកណ្តាលយោធាឥណ្ឌូណេស៊ី ប្រធានាធិបតីឥណ្ឌូណេស៊ី លោក ចូកូ វីដូដូ បានបំពាក់ឋានន្តរសក្តិ កិត្តិយសដល់លោកប្រាបូវ៉ូ សីប៊ីយ៉ាន់តូ ជាឧត្តមសេនីយ៍ផ្កាយបួន។ 

 

«ខ្ញុំសូមបំពាក់ឋានន្តរសក្តិពិសេសជាឧត្តមសេនីយ៍កិត្តិយសទៅលោក ប្រាបូវ៉ូ សីប៊ីយ៉ាន់តូ»។ ប្រធានាធិបតីឥណ្ឌូណេស៊ី បានបញ្ជាក់បែបនេះ ក្រោមហេតុផល ស្នាដៃរបស់លោកប្រាបូវ៉ូ បានជួយការពារជាតិ ការអភិវឌ្ឍផ្នែកសន្តិសុខ រួមទាំងមានការប្តេជ្ញាចំពោះប្រជាជន ប្រជាជាតិ និងសម្រាប់ប្រទេសរបស់ខ្លួនផ្ទាស់។ 

 

ស្ថិតក្នុងសំលៀកបំពាក់យោធា លោក ប្រាបូវ៉ូ ត្រូវបានលោកវីដូដូ ដោះផ្កាយបីចេញ និងបំពាក់ផ្កាយ៤ ជំនួសវិញ។ បន្ថែមពីនេះ លោកប្រធានាធិបតីក៏បានផ្តល់សេចក្តីសម្រេចរបស់លោកទៅកាន់លោកប្រាបូវ៉ូ ដែលនឹងគ្រោងបន្តវេនជំនួសលោកនៅពេលអនាគតផង។ 

 

រូបភាពបំពាក់សក្តិបែបនេះ ត្រូវបានមនុស្សមួយចំនួនចាត់ទុកថា ជាផ្នែកមួយនៃលក្ខណៈនយោបាយនៅក្នុងការបោះឆ្នោត។ ជាការឆ្លើយតប លោកវីដូដូ បានអះអាងថា ប្រសិនបើជាលក្ខណៈនយោបាយមែន ការបំពាក់ឋានន្តរសក្តិកិត្តិយសខាងលើ គួរតែធ្វើឡើងមុនការបោះឆ្នោតប្រធានាធិបតីឥណ្ឌូណេស៊ី ដែលបានប្រារព្ធនៅថ្ងៃទី១៤ ខែកុម្ភៈ។ នេះបើតាមការចុះផ្សាយរបស់សារព័ត៌មាន Antara News។ 

 

ក្នុងការបោះឆ្នោតកន្លងមក លោក ប្រាបូវ៉ូ បាននាំមុខបេក្ខជនប្រធានាធិបតីផ្សេងទៀត ក្នុងសំឡេងដ៏ច្រើនលើសលុប ដោយរដ្ឋមន្រ្តីការពារជាតិរូបនេះ ត្រូវបានរំពឹងថា មានភាគរយខ្ពស់ ក្នុងការស្នងតំណែងប្រធានាធិបតីពីលោកវីដូដូ នៅពេលខាងមុខនេះ៕