ភ្នំពេញក្រោន បាននាំមុខ គិរីវង់សុខសែនជ័យ នៅតង់ទី១ នាទី៤២ ដោយការស៊ុតបញ្ចូលទីរបស់ខ្សែប្រយុទ្ធ លឹម ពិសុទ្ធ បន្ទាប់ពីកីឡករ លឹម វិសាល ដណ្ដើមបាល់បានពីខ្សែការពាររបស់គិរីវង់សុខសែនជ័យ រួចបញ្ជូនចូលក្នុងតំបន់គ្រោះថ្នាក់។ ម្ចាស់ផ្ទះ ភ្នំពេញក្រោន លេងបាល់បានល្អជាង តាមរយៈភាគរយ នៃការគ្រប់គ្រងបាល់ និងឱកាសក្នុងការបញ្ចប់ទី។ ចំណែក ក្រុមភ្ញៀវគិរីវង់សុខសែនជ័យ ធ្វើបានល្អជាងជើងទី១ នៅក្នុងទឹកដីនៃកីឡដ្ឋានគិរីវង់។ បញ្ចប់ការប្រកួតនេះ ភ្នំពេញក្រោន ឈ្នះ គិរីវង់សុខសែនជ័យ ១-០។ គិតគ្រាប់បាល់ទាំង២ជើង ភ្នំពេញក្រោនឈ្នះ គីរីវង់ ៣-០។
 

លោក Oleg Starynskyi គ្រូបង្វឹកភ្នំពេញក្រោន យល់ថាទម្រង់លេងរបស់គិរីវង់សុខសែនជ័យល្អ ព្រោះបានធ្វើឲ្យកូនក្រុមខ្លួន ពិបាកក្នុងការលេងបាល់ពីតំបន់ខាងក្រោម។ គ្រូបង្វឹកសញ្ជាតិអ៊ុយក្រែនរូបនេះ ក៏បានសរសើរកីឡាករក្មេងៗមួយចំនួនរបស់ខ្លួនដែលដាក់ ឲ្យចូលលេងជាមួយកីឡាករ មានបទពិសោធន៍ច្រើន ហើយអ្នកទាំងនោះធ្វើបានយ៉ាងល្អ។
 

«វាមិនមែនជាការប្រកួតងាយស្រួលនោះទេ ដូចដែលយើងបានឃើញហើយ ពួកគេពិតជាលេងខ្លាំងទាំងពីរវគ្គដូច្នេះវាពិបាកសម្រាប់យើងក្នុងការលេងបាល់ពីខាងក្រោម (build-up)។

យើងបានដាក់កីឡាករក្មេងៗលេងច្រើន និងលាយគ្នាជាមួយកីឡាករមានបទពិសោធន៍មួយចំនួន។ ពួកគេបានបង្ហាញការលេងល្អ ហើយក៏មានចំនុចមួយចំនួនដែលតម្រូវឲ្យពួកគេត្រូវកែប្រែផងដែរ។»។
 

៤ក្រុមឡើងទៅវគ្គពាក់កណ្ដាលផ្ដាច់ព្រ័ត្រ គឺភ្នំពេញក្រោន, ព្រះខ័នរាជស្វាយរៀង, វិសាខា និងបឹងកេត។ ព្រះខ័នរាជស្វាយរៀង ទម្លាក់ណាហ្គាវើលដ៍ លទ្ធផលទាំង២ជើង ១០-១ ខណៈវិសាខា ឈ្នះ ព្រៃវែង ១-០។ ចំណែកបឹងកេត យកឈ្នះ អាយ អេស អាយ ដង្កោសែនជ័យ ទាំង២ជើង ៨-៤។
 

គួរបញ្ជាក់ផងដែរថា ក្រុមទាំង៤នេះ ធ្លាប់ជួបគ្នាក្នុងវគ្គពាក់កណ្ដាលផ្ដាច់ព្រ័ត្រ ២លើករួចមកហើយ គឺក្នុងឆ្នាំ២០១៩ និងឆ្នាំ២០២១។ ព្រះខ័នរាជស្វាយរៀង ធ្លាប់ឈ្នះពានសម្ដេច ៤លើក (២០១១, ២០១២, ២០១៥, ២០១៧), វិសាខា ជើងឯក៣រដូវកាលជាប់គ្នា (២០២០, ២០២១, ២០២២), ភ្នំពេញក្រោន ២លើក (២០០៨, ២០០៩) និងបឹងកេត ១លើក ក្នុងឆ្នាំ២០១៩៕