បើទោះជារដ្ឋតូចនៅក្នុងតំបន់អាស៊ីអាគ្នេយ៍ សិង្ហបុរី តែងគិតគូរពីបញ្ហាសន្តិសុខជាអាទិភាពរបស់ខ្លួន។ ជាប្រទេសតែមួយគត់នៅក្នុងតំបន់មួយនេះ សិង្ហបុរី បានបញ្ជាទិញយន្តហោះចម្បាំង F-35B ដែលជាជំនាន់ចុងក្រោយ រហូតដល់ ១២គ្រឿងនៅពេលកន្លងមក។ ទន្ទឹមនេះ សិង្ហបុរី បានបញ្ជាទិញយន្តហោះចម្បាំង F-35A ចំនួន ៨ គ្រឿងបន្ថែម។ 

 

«យន្តហោះចម្បាំងទាំងនេះ នឹងត្រូវដឹកជញ្ជូនឱ្យក្នុងអំឡុងឆ្នាំ២០៣០»។ ប្រមុខការពារជាតិសិង្ហបុរី លោក Ng Eng Hen បានសង្កត់ធ្ងន់បែបនេះ នៅចំពោះមុខសមាជិកសភា ក្នុងថ្ងៃទី២៨ ខែកុម្ភៈ ដោយបន្តថា យន្តហោះចម្បាំងជំនាន់ទី៥នោះ នឹងត្រូវបានប្រើប្រាស់ ដើម្បីការពារសន្តិសុខជាតិ។ ជាការពិត F-35 ជាប្រភេទយន្តហោះ អាចកំបាំងខ្លួនពីរ៉ាដារបស់សត្រូវ និងត្រូវបានបំពាក់បច្ចេកវិទ្យាយ៉ាងទំនើបសម្រាប់ការប្រតិបត្តិការ។ 

 

ការបន្ថែមចំនួនយន្តហោះ F-35A ៨គ្រឿងបន្ថែម នឹងធ្វើឱ្យសិង្ហបុរីមានយន្តហោះប្រភេទ F-35 រហូតដល់ ២០គ្រឿងនៅពេលខាងមុខ។ លោក Ng Eng Hen មិនបានបញ្ជាក់ពីតម្លៃនៃការទិញយន្តហោះដ៏ទំនើបនោះឡើយ។ 

 

ទន្ទឹមនេះ រដ្ឋមន្រ្តីការពារជាតិ បានបន្ថែមទៀតថា នៅក្នុងឆ្នាំ២០២៤ សិង្ហបុរី នឹងចំណាយថវិកាលើវិស័យការពារជាតិរហូតដល់ ១៥ពាន់លានដុល្លារ ពោលគឺកើនឡើង ២,៥ភាគរយ បើធៀបនឹងឆ្នាំ២០២៣។ ក្នុងទំហំនេះ វាស្មើនឹង ៣ភាគរយនៃផលិតផលក្នុងស្រុកសរុបរបស់ដែនកោះមួយនេះ។ 

 

បើទោះស្ថិតក្នុងត្រកូល F-35 មែន ប៉ុន្តែយន្តហោះF-35A មានសមត្ថភាពខ្លាំងជាង F-35B។ យន្តហោះ F-35A អាចហោះបានចម្ងាយប្រមាណ ២២០០គីឡូម៉ែត្រ និងផ្ទុកទម្ងន់បាន៨១៦០គីឡូក្រាម។ យ៉ាងណាមិញF-35B អាចហោះបានក្នុងចម្ងាយប្រមាណ ១៦៦៧គីឡូម៉ែត្រប៉ុណ្ណោះ និងផ្ទុកទម្ងន់បាន ៦៨០០គីឡូក្រាម។ ចំណែកបច្ចេកវិទ្យាផ្សេងទៀត យន្តហោះទាំងពីរប្រភេទមានលក្ខណៈស្រដៀងគ្នាដែរដូចជា ការកំបាំងខ្លួនពីរ៉ាដា និងការបំពាក់អាវុធជាដើម៕