នៅថ្ងៃទី១ ខែមីនា ថៃ និងចិន បានចាប់ផ្តើមអនុវត្តជាផ្លូវការលើការលុបចោលទិដ្ឋាការរយៈពេលវែង សម្រាប់ភ្ញៀវទេសចរប្រទេសទាំងពីរ។ គោលនយោបាយបែបនេះ នឹងធ្វើឱ្យថៃ អាចទាក់ទាញភ្ញៀវទេសចរចិនមកលេងប្រទេសខ្លួន កាន់តែច្រើនបន្ថែមទៀត។ 

 

នៅក្នុងកិច្ចសម្ភាសន៍មួយជាមួយសារព័ត៌មានចិន ចេញផ្សាយនៅថ្ងៃទី២ ខែមីនា លោកសេដ្ឋា ថាវីស៊ីន នាយករដ្ឋមន្រ្តីថៃ ត្រូវបានសួរសំណួរពាក់ព័ន្ធនឹងមូលហេតុនៃការលុបចោលទិដ្ឋាការទៅវិញទៅមករយៈពេលវែង។ 

 

«ប្រជាជនថៃភាគច្រើនមានកេរ្តិ៍តំណែលចិន ហើយបុព្វជនរបស់យើងក៏មកពីចិនផងដែរ»។ នាយករដ្ឋមន្រ្តីថៃ បានតបនឹងសំណួររបស់អ្នកសារព័ត៌មានជាភាសាអង់គ្លេសបែបនេះ ដោយបន្តក្នុងទឹកមុខញញឹមថា ទំនាក់ទំនងប្រជាជនទាំងពីរ ក៏មានភាពល្អជាមួយគ្នាផងដែរ។ 

 

បន្ថែមពីនេះ មេដឹកនាំថៃ បានបន្តថា មូលហេតុដែលថៃអនុវត្តគោលនយោបាយលុបចោលទិដ្ឋាការរយៈពេលវែងជាមួយចិន គឺដោយសារប្រជាជនថៃ ចូលចិត្តធ្វើដំណើរទៅចិន ក្នុងនោះមានដូចជាក្រុងប៉េកាំង សៀងហៃ និងទីក្រុងផ្សេងទៀត។ បន្ថែមពីនេះ ប្រមុខរដ្ឋាភិបាលរូបនេះ បានកត់សម្គាល់ផងដែរថា ចិនជាភ្ញៀវទេសចរលំដាប់ទីមួយរបស់ថៃ ក្នុងរយៈពេល ១០ឆ្នាំចុងក្រោយ។ ត្រង់ចំណុចនេះ លោកសេដ្ឋា បានចាត់ទុកការលុបចោលការផ្តល់ទិដ្ឋាការ នឹងជួយសេដ្ឋកិច្ចក្នុងស្រុក។ 

 

កន្លងមក ថៃ បានដាក់គោលដៅទាក់ទាញភ្ញៀវចិនឱ្យបាន ៨លាននាក់ នៅដំណាច់ឆ្នាំ២០២៤៕