ចាប់តាំងពីពាក់កណ្តាលទសវត្សរ៍ឆ្នាំ២០០០ មក ក្រុមហ៊ុនLao Airlines បានផ្អាកជើងហោះហើររវាងឡាវ និងកម្ពុជា ដោយសារតែបញ្ហាទីផ្សារ។ បន្ទាប់ពីមានតម្រូវការខ្ពស់ ក្រុមហ៊ុនមួយនេះ បានសម្រេចជើងហោះហើររវាងក្រុងវៀងចន្ទន៍ និងក្រុងភ្នំពេញឡើងវិញពីថ្ងៃទី១៩ ខែមីនាតទៅ។ 

 

«ការធ្វើដំណើរបានកើនឡើងនៅជុំវិញពិភពលោក ជាពិសេសតាមផ្លូវអាកាស»។ លោក Khamla Phommavanh ប្រធានក្រុមហ៊ុន Lao Airlines បានបញ្ជាក់បែបនេះ នៅថ្ងៃទី៤ ខែមីនា ដោយបន្តថា ជើងហោះហើរ បានក្លាយជាជម្រើសទីមួយរបស់ភ្ញៀវទេសចរក្នុងការធ្វើដំណើរកម្សាន្ត។ នេះបើតាមការចុះផ្សាយរបស់ទីភ្នាក់ងារព័ត៌មានឡាវ។

 

ក្រុមហ៊ុន Lao Airlines នឹងមានជើងហោះហើរចំនួន ៣លើក ក្នុងមួយសប្តាហ៍ ដោយក្នុងនោះមានដូចជា ថ្ងៃអង្គារ៍, ថ្ងៃព្រហស្បតិ៍ និងថ្ងៃសៅរ៍។ ប្រសិនបើតម្រូវការខ្ពស់ ក្រុមហ៊ុននឹងបន្ថែមជើងហោះហើររវាងក្រុងវៀងចន្ទន៍ និងក្រុងភ្នំពេញ។ 

 

ការសម្រេចចាប់ផ្តើមជើងហោះហើរនេះ ធ្វើឡើងក្នុងគោលបំណងជំរុញវិស័យទេសចរណ៍ និងការវិនិយោគនៅឡាវ។ 

 

ការហោះហើរនឹងចំណាយពេលប្រមាណ ១ម៉ោង និង២០នាទី តាមរយៈយន្តហោះប្រភេទ A320៕