វៀតណាម ជាប្រទេសនាំចេញអង្ករធំជាងគេទី៣ របស់ពិភពលោកបន្ទាប់ពីឥណ្ឌា និងថៃ។  ថ្មីៗនេះ វៀតណាម បានប្រកាសថានឹងកាត់បន្ថយបរិមាណនាំចេញជាបណ្តើរៗ ដើម្បីផ្តោតលើគុណភាពអង្ករដែលមានតម្លៃខ្ពស់ជាងមុន ស្របពេលត្រៀមទុកអង្ករបម្រុងទៅនឹងការប្រែប្រួលអាកាសធាតុ និងធានាសន្តិសុខស្បៀងក្នុងស្រុក។

 

តាមការចុះផ្សាយរបស់ទីភ្នាក់ងារព័ត៌មាន Reuters ដកស្រង់ទិន្នន័យពីសមាគមស្បៀងអាហារវៀតណាម ចាប់ពីដើមឆ្នាំដល់ពាក់កណ្តាលខែកុម្ភៈការនាំចេញអង្កររបស់ប្រទេសនេះកើនឡើង ១៤,៤ភាគរយធៀបនឹងគ្រាដូចគ្នាឆ្នាំមុន ដែលមានចំនួន ៦៦៣ពាន់តោន។

 

របាយការណ៍ដដែលបានបញ្ជាក់ថា  តម្រូវការអង្ករពីឥណ្ឌូណេស៊ី ហ្វីលីពីន ម៉ាឡេស៊ី ចិន និងអាហ្វ្រិកកំពុងកើនឡើង ខណៈបាតុភូត El Nino ត្រូវបានរំពឹងថានឹងអូសបន្លាយដល់ពាក់កណ្តាលឆ្នាំ ២០២៤។

 

យោងតាមឯកសាររបស់រដ្ឋាភិបាលវៀតណាមដែលរៀបរាប់លម្អិតអំពីយុទ្ធសាស្ត្រនាំចេញអង្ករកាលពីឆ្នាំ២០២៣ ប្រទេសនេះនឹងកាត់បន្ថយការនាំចេញអង្ករប្រចាំឆ្នាំមកត្រឹម៤លានតោននៅឆ្នាំ២០៣០។ ឯកសារនោះបញ្ជាក់ថា វៀតណាមនឹងស្វែងរកការធ្វើពិពិធកម្មទីផ្សារនាំចេញអង្ករ ធានាគុណភាព និងសុវត្ថិភាពចំណីអាហារនៃអង្ករនាំចេញ។ ជាពិសេស កែច្នៃអង្ករវៀតណាមទៅជាផលិតផលផ្សេងៗដើម្បីចែកចាយនៅលើទីផ្សារ។ 

 

បច្ចុប្បន្ន អង្ករវៀតណាមត្រូវបាននាំចេញទៅកាន់ជាង ១៨០ប្រទេស និងដែនដី។ នៅឆ្នាំ២០២៣ ការនាំចេញអង្ករវៀតណាមបាននាំចំណូលដល់ ៤,៧៨ពាន់លានដុល្លារ កើនឡើង ៣៦,៦ភាគរយធៀបនឹងឆ្នាំ២០២២។ នេះបើតាមទិន្នន័យពីក្រសួងពាណិជ្ជកម្ម និងឧស្សាហកម្មវៀតណាម៕