ចំណោមកីឡាករចូលសញ្ជាតិទាំង៨រូប ដែលត្រូវបានគ្រូបង្វឹកលោក Shin Tae-Yong ជ្រើសចូលក្រុមឥណ្ឌូណេស៊ី មានកីឡាករ Jay Idzes ដែលប្រកបអាជីពនៅក្លិប Venezia ក្របខណ្ឌលីគលំដាប់ទី២ អ៊ីតាលី Serie B ផងដែរ។ ខ្សែការពារកម្ពស់ ១,៩ម៉ែត្រ បានកើតនៅក្នុងប្រទេសហូឡង់ និងមានជីតាជាជនជាតិឥណ្ឌូណេស៊ី ហើយសព្វថ្ងៃរូបគេបានចូលសញ្ជាតិឥណ្ឌូណេស៊ីពេញលេញ នៅចុងខែធ្នូ ឆ្នាំ ២០២៣។

កាលពីពេលថ្មីៗ លោក ​Shin Tae-Yong បានធ្វើដំណើរទៅកាន់ប្រទេសអ៊ីតាលី ដើម្បីទស្សនាការលេងរបស់ Idzes ក្នុងការប្រកួតដែល Venezia ចាញ់ក្រុម Como លទ្ធផល ២-១។ 

ក្រៅពី Idzes គ្រូបង្វឹកសញ្ជាតិកូរ៉េខាងត្បូង ក៏បានកោះហៅកីឡាករមួយចំនួនដែលប្រកបអាជីពនៅអឺរ៉ុប និងជាកូនកាត់ចូលសញ្ជាតិដូចជា Sandy Walsh, Shayne Pattynama, Marselino Ferdinan, Ivar Jenner និង Rafael Struick។
 

នៅក្នុងការប្រកួតពានរង្វាន់ Asian Cup 2023 ក្រុមជម្រើសជាតិឥណ្ឌូណេស៊ី មានកីឡាករចូលសញ្ជាតិចំនួន ៧នាក់ ដែលជាប់ជាកំណត់ត្រាមានកីឡាករចូលសញ្ជាតិដ៏ច្រើនសម្រាប់ឥណ្ឌូណេស៊ី។ ប្រសិនបើគ្មានការផ្លាស់ប្តូរ នោះទេ ក្រុមជម្រើសជាតិឥណ្ឌេណេស៊ី នឹងមានកីឡាករចូលសញ្ជាតិយ៉ាងហោច ៨នាក់ នៅក្នុងការប្រកួតទល់នឹងវៀតណាម ក្នុងការប្រកួតជម្រុះ World Cup។ 
 

ឥណ្ឌូណេស៊ី បានចាប់ផ្តើមគម្រោងការនាំកីឡាករចូលសញ្ជាតិមកលេងឱ្យក្រុមជម្រើសជាតិ ចាប់តាំងពីឆ្នាំ ២០១០ មកម្ល៉េះ ហើយអំឡុងការប្រកួត AFF Cup ពួកគេក៏មានវត្តមានកីឡាករចូលសញ្ជាតិ ៤រូបលើកដំបូងផងដែរ។
 

ចាប់តាំងពីលោក Shin ចូលដឹកនាំក្នុងឆ្នាំ ២០២០ ឥណ្ឌូណេស៊ី មិនដែលឆ្លងផុតវគ្គជម្រុះម្តងឡើយ ហើយការប្រើប្រាស់កីឡាករចូលសញ្ជាតិច្រើន បានក្លាយជាយុទ្ធសាស្ត្រដ៏សំខាន់មួយ ដើម្បីបង្កើនភាពរឹងមាំរបស់ក្រុម។
 

ឆ្លងកាត់ការប្រកួត២លើកក្នុងពូល F វគ្គជម្រុះជុំទី២ ​World Cup 2026 ឥណ្ឌូណេស៊ី រកបាន១ពិន្ទុ ស្ថិតនៅបាតតារាង ស្មើក្រុមលេខ៣ហ្វីលីពីន តាមពីក្រោយក្រុមកំពូលតារាងអ៊ីរ៉ាក់ ៥ពិន្ទុ និងក្រោមវៀតណាម ដែលនៅលេខពីរ ចំនួន ២ពិន្ទុ។ 
 

ការប្រកួតរវាងក្រុមខ្លាំងតំបន់អាស៊ីអាគ្នេយ៍ ឥណ្ឌូណេស៊ី និងវៀតណាម នឹងត្រូវធ្វើឡើងជើងទីមួយ នាថ្ងៃទី២១ ខែមីនា ក្នុងកីឡដ្ឋាន Gelora Bung Karno ប្រទេសឥណ្ឌូណេស៊ី មុនពេលវិលទៅប្រកួតនៅដីវៀតណាម ក្នុងកីឡដ្ឋាន Hanoi My Dinh នៅ៤ថ្ងៃបន្ទាប់៕