ជាតិ
សេដ្ឋកិច្ច
«ប្រាក់រៀល» រហែក ទក់ ចាស់ អាចយកទៅដូរថ្មីបាននៅតាមធនាគារ និងគ្រឹះស្ថានហិរញ្ញវត្ថុ 19, Mar 2024 , 4:59 pm
«ប្រាក់រៀល» រហែក ទក់ ចាស់ អាចយកទៅដូរថ្មីបាននៅតាមធនាគារ និងគ្រឹះស្ថានហិរញ្ញវត្ថុ ទូទាំងប្រទសពីថ្ងៃទី២០ដល់២៩មីនា ឆ្នាំ២០២៤។ រូបថត៖ ពីគណនីហ្វេសហ៊ុក ចំរើន ច័ន្ទលីដា
× សាធារណជនដែលមាន«ប្រាក់រៀល» ចាស់ រហែក និងទក់ គឺអាចទៅដូរយកក្រដាសប្រាក់ថ្មីគ្រប់ប្រភេទបាននៅគ្រប់សាខាធនាគារជាតិនៃកម្ពុជា និងសាខាគ្រឹះស្ថានធនាគារ និងហិរញ្ញវត្ថុទូទាំងប្រទេស ដោយមិនអស់កម្រៃសេវាអ្វីឡើយ។ ការដូរប្រាក់រៀលថ្មីជូនប្រជាពលរដ្ឋនេះ ធ្វើឡើងចាប់ពីម៉ោង៧កន្លះព្រឹកដល់ម៉ោង៣រសៀល ពីថ្ងៃទី២០-២៩មីនា ឆ្នាំ២០២៤ ក្នុងយុទ្ធនាការស្រឡាញ់ប្រាក់រៀល។
«យុទ្ធនាការស្រឡាញ់ប្រាក់រៀលនេះ» ត្រូវបានរៀបចំឡើងដោយធនាគារជាតិនៃកម្ពុជា សហការជាមួយធនាគារ និងគ្រឹះស្ថានហិរញ្ញវត្ថុទទួលបានប្រាក់បញ្ញើរខេត្ត-ក្រុង ដើម្បីអបអរសាទរខួបលើកទី៤៤ នៃការបោះផ្សាយក្រដាសប្រាក់ឡើងវិញ(២០មីនា ឆ្នាំ ១៩៨០ ដល់ ២០មីនា ២០២៤)។ យុទ្ធនាការនេះ ក៏ធ្វើឡើងដើម្បីគាំទ្រគោលនយោបាយលើកកម្ពស់ការប្រើប្រាស់ប្រាក់រៀល ផងដែរ។ នេះបើយោងតាមសេចក្តីជូនដំណឹងរបស់ធនាគារជាតិ។
បន្ទាប់ពីចប់នូវយុទ្ធនាការនេះ ក្នុងនាមជាអាជ្ញាធររូបិយវត្ថុជាតិ ធនាគារជាតិនៃកម្ពុជា ក៏នៅតែទទួលដូរប្រាក់រៀល ចាស់ រហែក និងទប់ ពីសាធារណជន ដោយឥតគិតកម្រៃសេវា នៅតាមគ្រប់សាខាធនាគារជាតិរាជធានី-ខេត្ត រៀងរាល់ថ្ងៃព្រឹកថ្ងៃធ្វើការ ផងដែរ។
ប្រាក់រៀលតំណាងឱ្យអត្តសញ្ញាណជាតិ អធិបតេយ្យភាពជាតិ ឯករាជភាពសេដ្ឋកិច្ច និងពង្រឹងសាមគ្គីភាពសង្គម។ គ្រប់ភាគីពាក់ព័ន្ធ ពិសេសប្រជាជនកម្ពុជា សូមបន្តស្មារតីសហការលើកកម្ពស់ប្រាក់រៀលជាតិ និងចូលរួមចំណែកយ៉ាងសកម្មក្នុងការប្រឆាំងនឹងទង្វើទាំងឡាយដែលប៉ះពាល់ដល់គុណតម្លៃប្រាក់រៀល៕
© រក្សាសិទ្ធិដោយ thmeythmey.com