ការបដិសេធនេះ បានធ្វើឡើងបន្ទាប់ពីក្រសួងពាណិជ្ជកម្ម បានទទួលពាក្យបណ្ដឹងពីសាធារណជន លើករណីបោកប្រាស់ពីអាជីវកម្មកម្ចីអនឡាញ ដែលមានទំព័រហ្វេសប៊ុក ឈ្មោះ «កម្ពុជា កម្ចីរហ័ស»។ បើតាមសេចក្តីប្រកាសព័ត៌មានរបស់ក្រសួងពាណិជ្ជកម្ម នាថ្ងៃទី២២មីនា​ អាជីវកម្មអនឡាញមួយនេះ បានផ្សព្វផ្សាយនូវរូបភាពបោកប្រាស់ពលរដ្ឋ​ ដោយថា ខ្លួនបានចុះបញ្ជីពាណិជ្ជកម្មត្រឹមត្រូវ និងមានការទទួលស្គាល់ពីក្រសួងពាណិជ្ជកម្ម។ លើសពីនេះ «កម្ពុជា កម្ចីរហ័ស» បានប្រើប្រាស់រូបសញ្ញា (Logo) របស់ក្រសួងពាណិជ្ជកម្ម មកផ្សព្វផ្សាយពាណិជ្ជកម្ម ដើម្បីភូតកុហកធ្វើឱ្យសាធារណជនមានការភាន់ច្រឡំ ដើម្បីទាញយកផល ប្រយោជន៍ដល់អាជីវកម្មរបស់ខ្លួន។ 

 

ដើម្បីបង្ការពលរដ្ឋកុំឱ្យចាញ់បោក និងខាតបង់ទ្រព្យសម្បត្តិណាមួយ,​ ក្រសួងពាណិជ្ជកម្ម បានអះអាងថា «កម្ពុជា កម្ចីរហ័ស គឺជាអាជីវកម្មកម្ចីអនឡាញបោកប្រាស់»។  ជាមួយគ្នានេះ ក្រសួងពាណិជ្ជកម្ម  បានព្រមានដល់ម្ចាស់អាជីវកម្មកម្ចីអនឡាញមួយនេះ ឱ្យបញ្ឈប់ជាបន្ទាន់នូវការប្រើប្រាស់ រូបសញ្ញា (Logo) និងអំណះអំណាងពាក់ព័ន្ធក្រសួងពាណិជ្ជកម្ម។ 

 

« ក្រសួងពាណិជ្ជកម្ម នឹងអនុវត្តវិធានការតាមនីតិវិធីជាធរមាន ចំពោះការផ្សព្វផ្សាយបោកប្រាស់ដែលនាំឱ្យសាធារណជនមានការភាន់ច្រឡំ និងប៉ះពាល់ ធ្ងន់ធ្ងរដល់កិត្តិយសរបស់ក្រសួងពាណិជ្ជកម្ម»។ នេះជាការព្រមានរបស់ក្រសួងពាណិជ្ជកម្ម ដែលបានអំពាវដល់សាធារណជនឱ្យជួយសហការផ្តល់ ព័ត៌មានមកកាន់ក្រសួងពាណិជ្ជកម្មតាមរយៈប្រព័ន្ធទូរសព្ទ១២៦៦ ប្រសិនបើមាន ជនខិលខូចប៉ុនប៉ង ឬមានការបោកប្រាស់ដូចករណីខាងលើ ដើម្បីក្រសួងពាណិជ្ជកម្មចាត់វិធានការឱ្យបានទាន់ ពេលវេលា។ 

 

ក្រៅពីក្រសួងពាណិជ្ជកម្ម, ធនាគារជាតិនៃកម្ពុជា (NBC) ក៏កំពុងសហការជាមួយអាជ្ញាធរពាក់ព័ន្ធ ដើម្បីចាត់វិធានការតាមច្បាប់ចំពោះក្រុមហ៊ុន និងបុគ្គលណាដែលផ្តល់កម្ចីខុសច្បាប់ដល់ពលរដ្ឋ ផងដែរ ។ វិធានរបស់អាជ្ញាធរពាក់ព័ន្ធ គឺត្រូវឡើងក្នុងគោលដៅ ដើម្បីជួយពលរដ្ឋឱ្យគេចផុតពីការជាប់បំណុល«វ័ណ្ឌក» និងជួយពង្រឹងការប្រើប្រាស់កម្ចីផ្លូវការឱ្យកាន់តែមានប្រសិទ្ធភាព តាមរយៈប្រព័ន្ធធនាគារ និងហិរញ្ញវត្ថុ។

 

កន្លងមក លោកស្រី ជា សិរី ទេសាភិបាលធនាគារជាតិនៃកម្ពុជា បានបញ្ជាក់ថា ពលរដ្ឋដែលប្រើប្រាស់កម្ចីក្រៅផ្លូវការ គឺប្រឈមមុខនឹងអត្រាប្រាក់ខ្ពស់ ហើយគ្មានយន្តការច្បាស់លាស់ក្នុងការពារអតិថិជនឡើយ​។ នេះជាផលប៉ះពាល់ធំជាងគេ ទៅលើប្រជាពលរដ្ឋខ្មែរមួយចំនួនបានជួបប្រទះ។ អ្នកស្រីបានពន្យល់ថា៖« នៅពេលក្រុមហ៊ុនឬបុគ្គលផ្តល់កម្ចីក្រៅផ្លូវការទាំងនោះយកការប្រាក់ថ្លៃពេក ហើយអតិថិជនគ្មានលទ្ធភាពបង់ការប្រាក់ឱ្យពួកគេវិញ នោះវានឹងកើតជាការប្តឹងផ្តល់គ្នា ការគំរាមកំហែង ការរឹបអូស ការប្រើប្រាស់អំពើហិង្សា ជាដើម។ យើងឃើញមានច្រើន! រហូតមានករណីខ្លះអតិថិជនមិនមានលទ្ធភាពសង់ប្រាក់ ក៏ត្រូវបានគេបង្ហោះហ្វេសប៊ុក​ និងបិទរូបអតិថិជន នៅតាមទីសាធារណដែលបង្កភាពរញ៉េរញ៉ៃជាច្រើនដល់សង្គមជាតិ» ។

 

ដើម្បីចៀសវាងពីការបោកប្រាស់ក្រោមរូបភាពណាមួយ ឬផលវិបាកផ្សេងៗពីការទទួលបានកម្ចីក្រៅផ្លូវការ ទាំងធនាគារជាតិនៃកម្ពុជា​ រួមទាំងភាគីពាក់ព័ន្ធផ្សេងៗទៀត បានលើកទឹកចិត្តពលរដ្ឋឱ្យប្រើប្រាស់តែសេវារបស់គ្រឹះស្ថានហិរញ្ញវត្ថុផ្លូវការតែប៉ុណ្ណោះ។​ ធនាគារជាតិនៃកម្ពុជា នឹងបន្តអភិវឌ្ឍហេដ្ឋារចនាសម្ព័ន្ធហិរញ្ញវត្ថុអំណោយផល ដើម្បីឱ្យពលរដ្ឋទូទៅមានលទ្ធភាពទទួលបាន និងប្រើប្រាស់សេវាហិរញ្ញវត្ថុផ្លូវការទាន់ពេលវេលា មានតម្លៃសមរម្យ និងមានកិច្ចការពារតាមផ្លូវច្បាប់ ស្របតាមយុទ្ធសាស្ត្រជាតិស្តីពី«បរិយាបន្នហិរញ្ញវត្ថុ ឆ្នាំ២០១៩-២០២៥»។

 

របាយការណ៍ប្រចាំឆ្នាំ២០២៣ របស់ធនាគារជាតិនៃកម្ពុជា​ បានបង្ហាញថា ប្រព័ន្ធធនាគារនៅកម្ពុជា គឺមានធនាគារពាណិជ្ជ៥៨, ធនាគារឯកទេស៩,  គ្រឹះស្ថានមីក្រូហិរញ្ញវត្ថុ ទទួលប្រាក់បញ្ញើ ៤,  គ្រឹះស្ថានមីក្រូហិរញ្ញវត្ថុមិនទទួលប្រាក់បញ្ញើ ៨៣, គ្រឹះស្ថានឥណទានជនបទ ១១៤, គ្រឹះស្ថានភតិសន្យាហិរញ្ញវត្ថុ ១៦, អ្នកដំណើរការតតិយភាគី៦,  គ្រឹះស្ថានផ្តល់សេវាទូទាត់សង ប្រាក់ ៣៣ គ្រឹះស្ថានផ្តល់សេវាប្រព័ន្ធចែករំលែកព័ត៌មានឥណទាន ១ ការិយាល័យតំណាងធនាគារ បរទេស ៥ និងអាជីវកម្មប្តូរប្រាក់ ២ ៩១៥។ ទាំងនេះ គឺជាគ្រឹះស្ថានស្របច្បាប់ និង​ផ្លូវ​ការ​ដែល​​ផ្ដល់​ឥណទាន និង​/​ឬ សេវា​ហិរញ្ញវត្ថុ​ផ្សេង​ទៀត​ដល់​ក្រុមហ៊ុន សហគ្រាស និង​ឯកត្តជន។ 

 

គ្រឹះស្ថាន​ទាំងនេះ គឺ​ស្ថិត​នៅ​ក្រោម​ការ​ត្រួតពិនិត្យ​របស់​ធនាគារ​ជាតិ​នៃ​កម្ពុជា ហើយ​អតិថិជន​របស់​គ្រឹះស្ថាន​ទាំងនេះ​ក៏ត្រូវ​បាន​ការពារ​ដោយ​ច្បាប់​ ផងដែរ៕