បើតាមលោក សេរីវឌ្ឍន៍ បេសកកម្មរបស់សមាគមអ្នកប្រើប្រាស់​ នឹងជួយការពារអ្នកប្រើប្រាស់ លើសុវត្ថិភាពផ្នែក​ចំណីអាហារ។  ក្នុងពិធីសន្និបាតកំណើតនៃសមាគមអ្នកប្រើប្រាស់កម្ពុជាក្នុងវិស័យសុវត្ថិភាពអាហារ នាថ្ងៃទី២៣មីនា សេរីវឌ្ឍន៍ បានបញ្ជាក់ថា៖ «មិនត្រឹមតែការពារអ្នកប្រើប្រាស់ប៉ុណ្ណោះទេ,​ តែយើងក៏នឹងលើកកម្ពស់ការយល់ដឹងរបស់អ្នកផ្គត់ផ្គង់អាហារ ផងដែរ ដោយធ្វើយ៉ាងណាឱ្យផ្គត់ផ្គង់​ដែលជាអ្នកផលិត ឬកែច្នៃអាហារ មានភាពប្រុងប្រយ័ត្នចំពោះចំណីអាហារ​ដែលខ្លួនបានផលិត»។​

 

អ្នកតំណាងក្រុមការងាររៀបចំបង្កើតសមាគមអ្នកប្រើប្រាស់ ក្នុងវិស័យចំណីអាហាររូបនេះ បានបន្ថែមថា​ អ្នកផលិតត្រូវយល់ពីកាតព្វកិច្ច​ និងការទទួលខុសត្រូវសង្គម ពោលគឺមិនត្រូវផលិតអាហារ ដែល គ្មានសុវត្ថិភាព ធ្វើឱ្យពលរដ្ឋប៉ះពាល់សុខភាព ក្រោយទទួលទានឡើយ។ «អ្នកផលិតត្រូវយល់ថា នៅពេលពលរដ្ឋទទួលទានអាហារទៅប៉ះពាល់សុខភាព នឹងនាំឱ្យសង្គមយើងមានធនធានមិនល្អ។ ធនធានមនុស្សមិនល្អ នឹងក្លាយជាបញ្ហាសង្គមជាតិយើងទាំងមូល»។ នេះជាការមើលឃើញរបស់លោក ប្រាក់ សេរីវឌ្ឍន៍។ 

 

លោក ផាន អូន ប្រតិភូរាជរដ្ឋាភិបាលកម្ពុជា ទទួលបន្ទុកជាអគ្គនាយក នៃអគ្គនាយកដ្ឋានការពារអ្នកប្រើប្រាស់ កិច្ចការប្រកួតប្រជែង និងបង្រ្កាបការក្លែងបន្លំ(ក.ប.ប) បានគាំទ្រ និងមើលឃើញថា សមាគមនេះ នឹងដើរតួនាទីយ៉ាងសំខាន់ក្នុងការការពារផលប្រយោជន៍ និងសិទ្ធិអ្នកប្រើប្រាស់ ឱ្យចៀសពីហានិភ័យ ឬគ្រោះថ្នាក់ ឬផលប៉ះពាល់នៃការពុលពីចំណីអាហារ។​ លើសពីនេះ សមាគម ក៏អាចដើរតួនាទីតំណាងឱ្យអ្នកប្រើប្រាស់ ដែលរងគ្រោះពីការប្រើប្រាស់ចំណីអាហារ នៅចំពោះមុខគណៈកម្មការជាតិការពារអ្នកប្រើប្រាស់ ឬនៅក្នុងក្នុងតុលាការ។ 

 

លោក ផាន អូន បានបញ្ជាក់ថា ៖ « សមាគមនេះ នឹងដើរតួនាទីជាសេនាធិកាកណ្តាលក្នុងការភ្ជាប់ទំនាក់ទំនងពីអ្នកប្រើប្រាស់ទៅកាន់អាជ្ញាធរ ដែលជាអ្នកអនុវត្តច្បាប់ ហើយ​ក៏នឹងជាអ្នកតំណាងមួយសម្រាប់អ្នកប្រើប្រាស់នៅពេលមានបញ្ហាអ្វី ក៏គាត់អាចយកបណ្តឹងពីអ្នកប្រើប្រាស់ទៅគណៈកម្មការ និងទៅតុលាការបាន ផងដែរ»។​

 

ជាមួយគ្នានេះ​ សមាគម ក៏អាចបញ្ចេញទស្សនទាន នៅពេលក្រសួង-ស្ថាប័នតាក់តែងឯកសារគតិយុត្ត ជាពិសេស គឺនៅក្នុងការរៀបចំឯកសារដែលពាក់ព័ន្ធស្តង់ដា​ និងបទប្បញ្ញត្តិចំណីអាហារ។ សមាគមនេះ ក៏អាចបង្កើតជាក្រុមតូចៗ ទៅតាមបណ្តារាជធានី-ខេត្ត ផងដែរ៕