នាបុណ្យចូលឆ្នាំថ្មីប្រពៃណីជាតិនេះ កម្មករនិយោជិត ម្ចាស់អាជីវកម្ម និងប្រជាពលរដ្ឋ
 

នៅទូទាំងប្រទេសភាគច្រើន ធ្វើដំណើរទៅស្រុកកំណើត ដើម្បីជួបជុំក្រុមគ្រួសារ និងប្រារព្ធពិធីផ្សេងៗតាមទំនៀមទម្លាប់ ប្រពៃណី រួមទាំងធ្វើដំណើរកម្សាន្តទៅកាន់រមណីយដ្ឋាននានា។ ទន្ទឹមនឹងនេះ បុគ្គលិកឬកម្មករនិយោជិតមួយចំនួន ដែលបម្រើការងារនៅតាមរមណីយដ្ឋាន មណ្ឌលកម្សាន្ត ភោជនីយដ្ឋាន សណ្ឋាគារ និងផ្ទះសំណាក់នានា ក៏មានភាពមមាញឹកទ្វេដង ក្នុងការផ្តល់សេវាកម្ម ភ្ញៀវទេសចរជាតិ និងអន្តរជាតិ។

 

«ក្នុងន័យនេះ ក្រសួងការងារ និងបណ្ដុះបណ្ដាលវិជ្ជាជីវៈ សូមអំពាវនាវដល់បងប្អូនប្រជាពលរដ្ឋ កម្មករនិយោជិត និងសាធារណជន ដែលបានឈប់សម្រាក និងធ្វើដំណើរកម្សាន្ត ឬទៅទទួលសេវានៅតាមរមណីយដ្ឋាន មណ្ឌលកម្សាន្ត ភោជនីយដ្ឋាន សណ្ឋាគារ និងផ្ទះសំណាក់នានា សូមមានការយោគយល់អធ្យាស្រ័យដល់បងប្អូនកម្មករនិយោជិត អ្នកផ្តល់សេវា និងម្ចាស់អាជីវកម្ម ប្រសិនមានករណីយឺតយ៉ាវ ឬខ្វះខាតដោយប្រការណាមួយក្នុងអំឡុងពេលនេះ»។ លោក ហេង សួរ បានលើកឡើងបែបនេះ ។

 

លោក ហេង សួរ ក៏បានកោតសរសើរ ចំពោះស្មារតីមនសិការវិជ្ជាជីវៈ របស់អ្នកបំពេញការងារផ្នែកសេវាសារវន្តទាំងអស់ ដែលបានលះបង់ពេលវេលាផ្ទាល់ខ្លួន បំពេញនូវភារកិច្ចអំឡុងពេលនេះ។ 

 

ក្រសួងក៏បានអំពាវនាវដល់សាធារជនទាំងអស់ផងដែរ ឱ្យពិនិត្យបណ្តាញអគ្គិសនី ភ្លើងចង្ក្រាន ធូប និងទៀន ឱ្យបានល្អមុនពេលចាកចេញពីលំនៅដ្ឋាន ទៅដើរកម្សាន្ត ឬត្រឡប់ទៅស្រុកកំណើត ឬបិទទ្វារទីតាំងអាជីវកម្មរបស់ខ្លួន៕