សុខភាព
អន្តរជាតិ
ម្តាយកើតអុតស្វាយ ចុះទារកក្នុងផ្ទៃទៅជាយ៉ាងណា? 11, Oct 2014 , 9:15 am
× ប្រសិនបើអ្នកកំពុងមានផ្ទៃពោះ ហើយស្រាប់តែកើតជំងឺអុតស្វាយ នោះអ្នក និងកូនតូចរបស់អ្នក ប្រាកដណាស់ថានឹងមានការប្រឈមជាមួយបញ្ហាសុខភាពយ៉ាងធ្ងន់ធ្ងរ។ ការកើតជំងឺអុតស្វាយក្នុងអំឡុងពេលមានផ្ទៃពោះ ស្ត្រីជាម្តាយងាយនឹងមានការវិវត្តជាជំងឺរលាកសួត ខណៈដែលទារកក្នុងផ្ទៃអាចមានហានិភ័យខ្ពស់ ដែលអាស្រ័យលើអាយុនៃគភ៌។
ប្រសិនបើអុតស្វាយកើតមាននៅក្នុង ២០ សប្តាហ៍ដំបូងនៃការមានផ្ទៃពោះ ជាពិសេស នៅរវាងសប្តាហ៍ ៨ និងទី ២០ ទារកអាចនឹងមានហានិភ័យតិចតួចនៃបញ្ហាពិការភាពពីកំណើត។ ទារកទាំងនោះអាចមានបញ្ហាដូចជា ៖
• មានស្លាកស្នាមនៅលើស្បែក
• មានទម្ងន់តិចពេកពេលកើត
• បញ្ហាប៉ះពាល់ដល់ដៃ ជើង ខួរក្បាល និងភ្នែក។
ប្រសិនបើអុតស្វាយបានកើតនៅប៉ុន្មានថ្ងៃមុនពេលសម្រាល ទារកអាចកើតមកជាមួយនឹងការឆ្លងមេរោគ ដែលគម្រាមកំហែងដល់អាយុជីវិត។ ប្រសិនបើអ្នកប្រឈមនឹងជំងឺអុតស្វាយអំឡុងពេលមានផ្ទៃពោះ ហើយអ្នកមិនបានចាក់ថ្នាំបង្ការជាមុន សូមទាក់ទងទៅគ្រូពេទ្យរបស់អ្នកភ្លាមៗ។ គ្រូពេទ្យនឹងចាក់សេរ៉ូមដែលមានអង់ទីករប្រឆាំងទៅនឹងមេរោគអុតស្វាយ ដល់អ្នក៕
ផ្តល់សិទ្ធិផ្សាយដោយគេហទំព័រ www.health.com.kh
© រក្សាសិទ្ធិដោយ thmeythmey.com