ជាតិ
សេដ្ឋកិច្ច
មានបុរីសរុប៧០គម្រោង ក្នុងរាជធានីភ្នំពេញ 11, Jan 2015 , 3:03 pm
ពិធីសម្ពោធគម្រោងបុរី The Royal ដោយលោកអភិបាល ប៉ា សុជាតិវង្ស លោក គង់ វិបុល អគ្កនាយកពន្ធដារ និងលោកស្រី ហ៊ុន ម៉ាណា កូនស្រីលោកនាយករដ្ឋមន្ត្រី ហ៊ុន សែន
× អភិបាលរាជធានីភ្នំពេញលោក ប៉ា សុជាតិវង្ស បានសរសេរលើគណនីហ្វេសប៊ុករបស់លោកថា រហូតដល់ពេលនេះមានគម្រោងបុរីសរុបចំនួន៧០ នៅក្នុងរាជធានីភ្នំពេញ ដែលក្នុងចំណោមនោះ ២០គម្រោងស្ថិតនៅក្នុងខណ្ឌសែនសុខ។
លោកអភិបាលរាជធានីបាននិយាយអំពីចំនួនគម្រោងបុរីនៅក្នុងរាជធានី បន្ទាប់ពីលោកចូលរួមសម្ពោធបុរី The Royal របស់ក្រុមហ៊ុន អ័រគីដេ វីឡា នៅព្រឹកថ្ងៃអាទិត្យទី១១ខែមករានេះ។ សម្រាប់លោកអភិបាល តម្រូវការលំនៅដ្ឋានបានក្លាយជាបញ្ហាចាំបាច់មួយនៅក្នុងរាជធានីភ្នំពេញដែលមានកំណើនប្រជាជនដល់ជាង២លាននាក់ហើយ។ លោក ប៉ា សុជាតិវង្ស បានសរសេរយ៉ាងនៅលើគណនីហ្វេសប៊ុករបស់លោកយ៉ាងដូច្នេះថា៖«ការរីកស្គុសស្គាយនៃកំណើនលំនៅដ្ឋាននាពេលបច្ចុប្បន្នគឺសបញ្ជាក់ឲ្យឃើញពីកំណើននៃការអភិវឌ្ឍន៍ កំណើនសេដ្ឋកិច្ច ជាពិសេសកំណើនជីវភាពរបស់ប្រជាពលរដ្ឋ។ ខ្ញុំសង្ឃឹមថា បុរីថ្មីសន្លាងរបស់ក្រុមហ៊ុន អ័រគីដេ វីឡា ដែលនឹងដំណើរការសាងសង់នាពេលនេះ ពិតជាបានចូលរួមអភិវឌ្ឃន៍រាជធានីភ្នំពេញយ៉ាងពិតប្រាកដ»។
សំណង់បុរីលំនៅដ្ឋានកំពុងពេញនិយមនៅកម្ពុជាសព្វថ្ងៃ ជាពិសេសនៅក្នុងរាជធានីភ្នំពេញ។ ប៉ុន្តែកន្លងមក គេឃើញមានបញ្ហាសំខាន់ៗមួយចំនួនក៏កើតឡើងដែរ។ ម្ចាស់បុរីខ្លះបានផ្តើមការដ្ឋានសាងសង់ លក់ផ្ទះអស់ជាច្រើនហើយ តែក្រោយមក ត្រូវក្រសួងពាក់ព័ន្ធប្រកាសមិនទទួលស្គាល់ថាជាគម្រោងស្របច្បាប់។ សំណង់នៃបុរីខ្លះទៀត គ្មានគុណភាពដែលអាចបង្កគ្រោះថ្នាក់ និងបង្កការខាតបង់ថវិការបស់ពលរដ្ឋកាន់តែច្រើន។ មន្ត្រីជំនាញពាក់ព័ន្ធមិនបានគិតគូរពីផលប្រយោជន៍របស់ពលរដ្ឋឡើយ៕
© រក្សាសិទ្ធិដោយ thmeythmey.com