ជាតិ
នយោបាយជាតិ
១៤មករា១៩៨៥-១៤មករា២០១៥ លោក ហ៊ុន សែន ធ្វើនាយករដ្ឋមន្ត្រីបាន៣០ឆ្នាំ 13, Jan 2015 , 5:38 pm
× នៅថ្ងៃពុធទី១៤ខែមករានេះ លោកនាយករដ្ឋមន្ត្រី ហ៊ុន សែន នឹងសម្ពោធភ្ជាប់ស្ពានអ្នកលឿង ដែលជាជំនួយរបស់ប្រទេសជប៉ុន។ នៅថ្ងៃទី១៤មករាឆ្នាំ២០១៥ វាគឺជាថ្ងៃគម្រប់ឆ្នាំទី៣០ ដែលលោក ហ៊ុន សែន បានកាន់ដំណែងជានាយករដ្ឋមន្ត្រីរបស់ប្រទេសកម្ពុជា។
ក្នុងរយៈពេល៣០ឆ្នាំនេះ លោក ហ៊ុន សែន ដែលគេស្គាល់ថា ជាបុរសខ្លាំងនៅកម្ពុជា បានឆ្លងកាត់ការសរសើរ និងព្យុះរិះគន់មិនតិចឡើយ ទាំងពីប្រជាជនខ្មែរ និងអង្គការជាតិ និងអន្តរជាតិជាច្រើន។
មានចលនានយោបាយជាបន្តបន្ទាប់ដែលព្យាយាមទម្លាក់លោក ហ៊ុន សែន ពីអំណាច។ ប៉ុន្តែការប៉ុនប៉ងទាំងនោះមិនដែលទទួលបានជោគជ័យឡើយ ហើយក៏ត្រូវកម្លាំងរដ្ឋាភិបាលរបស់លោកនាយករដ្ឋមន្ត្រី ហ៊ុន សែន បង្ក្រាបវិញរហូត។
ទន្ទឹមនឹងការរិះគន់ធ្ងន់ៗពីសំណាក់ចលនាប្រឆាំង អង្គការសិទ្ធិមនុស្សអន្តរជាតិអំពីអំពើហិង្សា និទណ្ឌភាព គម្លាតរវាងអ្នកមាន និងអ្នកក្រ អំពើពុររលួយ ជាដើមនោះ លោក ហ៊ុន សែន ក៏ទទួលបានការគាំទ្រពីប្រជាជនកម្ពុជាដែលនៅតែ បោះឆ្នោតគាំទ្រគណបក្សប្រជាជនកម្ពុជា និងទទួលបានការសរសើរថា លោកដឹកនាំដើរលើផ្លូវត្រូវ តាមររយៈការកសាង ហេដ្ឋា រចនាសម្ព័ន្ធជាតិជាច្រើន។
ឆ្លើយតបនឹងការរិះគន់របស់អង្គការក្រៅរដ្ឋាភិបាលនៅក្នុងប្រទេសកម្ពុជា អំពីការកាន់អំណាចយូរ លោក ហ៊ុន សែន ធ្លាប់ប្រតិកម្មវិញថា លោកនឹងដឹកនាំប្រទេសរហូតដល់លោកអាយុ៩០ឆ្នាំ។ នៅឆ្នាំនេះ លោក ហ៊ុន សែន អាយុ៦២ឆ្នាំ។ នៅក្នុងអាណត្តិទី៥នេះ លោក ហ៊ុន សែន កំពុងដឹកនាំប្រទេសកម្ពុជា ក្នុងស្ថានភាពប្រកួតប្រជែងផ្នែកប្រជាប្រិយភាពនយោបាយយ៉ាងខ្លាំង ខណៈគណបក្សប្រឆាំងបានកើនការគាំទ្រ៕
© រក្សាសិទ្ធិដោយ thmeythmey.com