កីឡាជាតិ
ឡៅ ចន្ទ្រា សន្លប់ក្នុងទឹកទី ២ ឯ បឺត ខាំ និង ពេជ្រ សីហា ឈ្នះថៃដោយលំបាក
28, Sep 2015 , 5:03 pm
×![]()
នាការប្រកួតកីឡាប្រដាល់មិត្តភាពអន្តរជាតិដែលរៀបចំដោយទូរទស្សន៍បាយ័នកាលពីចុងសប្តាហ៍កន្លងមក កីឡាករ ឡៅ ចន្ទ្រា បានសន្លប់ក្នុងកណ្តាប់ដៃ ថៃ ក្នុងទឹកទី ២ នៅលើសង្វៀន បឹងស្នោ រីឯ កីឡាករ បឺត ខាំ និង ពេជ្រ សីហា ឈ្នះថៃ ដោយពិន្ទុទាំងលំបាក នៅលើសង្វៀនស្ទឹងមានជ័យ។ 
កីឡាករជើងខ្លាំងរបស់ ថៃ KAOPHONG CHAIPHUM ដែលមានប្រវត្តិប្រកួតចំនួន ១១៩ដង ឈ្នះ៩៩ដង និងផ្តួលគូរប្រកួតឱ្យសន្លប់ ៣៦ បានផ្តួលឡៅ ចន្ទ្រា មកពីក្លិបកងពលតូចឆ័ត្រយោង ៩១១ ឲ្យសន្លប់ក្នុងទឹកទី ២ ក្នុងការប្រកួតមិត្តភាពអន្តរជាតិ កាលពីល្ងាចថ្ងៃអាទិត្យ នៅលើសង្វៀនបាយ័នបឹងស្នោ។
នៅទឹកទីពីរ កីឡាករថៃ បានប្រើកណ្តាប់ដៃដ៏ធ្ងន់របស់ខ្លួនវាយសម្រុកចូលចំផ្ទៃមុខ ចន្ទ្រា ពេញៗ ឯកីឡាករកម្ពុជាបានព្យាយាមវាយបក និងគេចខ្លួនផងដែរ តែមិនអាចគេចផុតពីកណ្តាប់ដៃរបស់កីឡាករថៃរូបនេះ ដែលជាហេតុធ្វើឲ្យ ចន្ទ្រា ត្រូវបានអាជ្ញាកណ្តាលរាប់ចំនួន ៣ដង និងបញ្ឈប់ការប្រកួត តែម្តង។
ចំណែកនៅលើសង្វៀនស្ទឹងមានជ័យ ក្នុងការប្រកួតវិលជុំសន្សំពិន្ទុវគ្គទី៤ ដណ្តើខ្សែក្រវ៉ាត់អន្តរជាតិខារ៉ាបៅ កាលពីល្ងាចថ្ងៃអាទិត្យនោះវិញ កីឡាករជើងខ្លាំង បឺត ខាំ មកពីក្លិបសាលវ័ន្តកីឡា កម្ពស់ ១.៦៩ម៉ែត្រ បានយកឈ្នះកីឡាករថៃដោយពិន្ទុទាំងលំបាក ដោយសារកីឡាករថៃរូបនេះមានកម្ពស់ខ្ពស់ជាង ជាហេតុធ្វើឲ្យគេពិបាកក្នុងការវាយចូល។
ទោះបីជាយ៉ាងនេះក្តី ក្នុងការប្រកួតយ៉ាងស្វិតស្វាញចំនួន ៥ទឹក ក្នុងទឹកទី២ និងទី៣ បឺត ខាំ បានប្រើកណ្តាប់ដៃ និងកែងវាយចូលមុខកីឡាករថៃពេញៗ ចំណែកកីឡាករថៃ នៅក្នុងទឹកទី៤ បានព្យាយាមសម្រុកវាយបក ដោយប្រើជង្គង់ហោះ និងកណ្តាប់ដៃចូលមកលើកីឡាករ បឺត ខាំ ពេញៗផងដែរ ក៏ប៉ុន្តែកីឡារករថៃ ត្រូវបានអាជ្ញាកណ្តាលពិន័យនៅក្នុងទឹកទី៤ ដោយសារវាយខុសលក្ខន្តិកៈ។ ចុងបញ្ចប់នៃការប្រកួតកីឡាករ បឺត ខាំ ត្រូវបានអាជ្ញាកណ្តាលលើកដៃឱ្យឈ្នះដោយពិន្ទុជាឯកច្ឆន្ទ។
ចំណែកកីឡាករ ពេជ្រ សីហា មកពីសមាគម កីឡាប្រដាល់ក្រសួងការពារជាតិ បានយកឈ្នះកីឡាករថៃ JONGANGFIGHT LUK.CHOMPACHAI ដោយពិន្ទុ។ នៅក្នុងការប្រកួត៥ទឹក ចាប់ពីទឹកទី១ រហូតដល់ទឹកទី៤ កីឡាករ កម្ពុជាបានប្រើកណ្តាប់ដៃ ហើយវាយសម្រុកចូលកីឡាករថៃ ចំណែកកីឡាករថៃ បានព្យាយាមវាយបកប្រើជង្គង់មកលើកីឡាករកម្ពុជាផងដែរ។ ជាលទ្ធផលចុងក្រោយកីឡាករ ពេជ្រ សីហា បានយកឈ្នះកីឡាករថៃ ដោយពិន្ទុ៕
Tag:
បដាល់
© រក្សាសិទ្ធិដោយ thmeythmey.com
