កីឡាជាតិ
សហព័ន្ធកីឡាយានយន្តកម្ពុជា នឹងរៀបចំការប្រណាំងឡានហ្គោខាតលក្ខណៈអន្តរជាតិធំម្តងទៀត 30, Sep 2015 , 8:19 am
×
តាមរយៈលទ្ធផលនៃព្រឹត្តិការណ៍ប្រណាំងឡានហ្គោខាត (Go Kart) ពេលយប់លើកទី១ ឆ្នាំ២០១៥ ទំហំការចូលរួមគាំទ្រ និងអ្នកឧបត្ថម្ភ ប្រធានសហព័ន្ធកីឡាយានយន្តកម្ពុជា នឹងរៀបចំព្រឹត្តិការណ៍ប្រណាំងឡានហ្គោខាតពេលយប់(Go Kart) ជាលក្ខណៈអន្តរជាតិធំម្តងទៀត នៅចុងឆ្នាំ២០១៥នេះ។
«តាមរយៈលទ្ធផលប្រកួត ការចូលរួមពីគ្រប់មជ្ឈដ្ឋានទាំងកីឡាករជាតិ និងអន្ដរជាតិ អ្នកគាំទ្រ អ្នកឧបត្ថម្ភនឹងដោយមានកិច្ចសហការល្អជាមួយក្រុមហ៊ុន AP Cart Racing សហព័ន្ធ អាចវាយតម្លៃថា យើងមានសមត្ថភាពអាចរៀបចំព្រឹត្តិការណ៍នេះជាលក្ខណៈអន្តរជាតិធំបាននៅចុងឆ្នាំ២០១៥នេះ»។ នេះជាការលើកឡើងរបស់លោក មៀច សុផាន់ណា អនុរដ្ឋលេខាធិការក្រសួងមហាផ្ទៃ និងជាប្រធានសហព័ន្ធកីឡាយានយន្តកម្ពុជា នាពិធីបិទការប្រកួត កាលពីរាត្រីថ្ងៃអាទិត្យ ទី២៧ ខែកញ្ញា។
ការប្រណាំងឡានហ្គោខាត (Go Kart) ពេលយប់ លើកទី១ដែល មានកីឡាករ កីឡាការិនីចម្រុះជាតិសាសន៍ចំនួន៣០នាក់ មកពីប្រទេសបារាំង សហរដ្ឋអាមេរិក ហូឡង់ អាល្លឺម៉ង់ ស្កុតឡែន សិង្ហបុរី ហ្វីលីពីន និងកម្ពុជាជាម្ចាស់ផ្ទះ ដោយប្រកួតទៅតាមកម្រិតទាំង៣ ដោយក្នុងកម្រិតនីមួយៗមានកីឡាករប្រកួតប្រជែងជាង ១០នាក់ បានបញ្ចប់ហើយ ខណៈម្ចាស់ជើងឯកទាំង៣កម្រិត ធ្លាក់ទៅលើកីឡាករបរទេសទាំងអស់។
សម្រាប់ការប្រកួតអ្នកជំនាញ (កម្រិតA) ម្ចាស់ជើងឯកបានទៅកីឡាករ David មកពីប្រទេសស្កុតឡែន លេខ២បានទៅ កីឡាករសិង្ហបុរី យ៉ារ៉ូ និងលេខ៣បានទៅកីឡាករកម្ពុជា ពីលី។ រីឯកម្រិតB សម្រាប់អ្នកពាក់កណ្ដាលអាជីព កីឡាករ Max មកពីបារាំង ទទួលបានបានចំណាត់ថ្នាក់លេខ១ លេខ២ កីឡាករ Tavis របស់សិង្ហបុរី និងលេខ៣បានទៅ Glenn មកពីហ្វីលីពីន ហើយកម្រិតC សម្រាប់អ្នកទាន់អាជីពវិញ លេខ១បានទៅ Alex ដែលជាកីឡាករវ័យក្មេងជាងគេជនជាតិហូឡង់ លេខ២ កីឡាករកម្ពុជា សុភារៈ និងលេខ៣ បានទៅ Elton មកពីសិង្ហបុរី៕
© រក្សាសិទ្ធិដោយ thmeythmey.com