កីឡាជាតិ
ជាតិ
ឥទ្ធិពលអ្នកនយោបាយ ឬអ្នកឧបត្ថម្ភ ធ្វើឲ្យវិស័យកីឡាមិនស្អាតស្អំ?
20, Oct 2015 , 8:19 pm
×![]()
កីឡាមួយប្រសិនបើស្ថិតនៅក្រោមឥទ្ធិពលនៃអ្នកនយោបាយ ឬអ្នកឧបត្ថម្ភ (ស្ពន់ស័រ) វានឹងក្លាយទៅជាកីឡាមួយដែលមិនស្អាតស្អំ និងបាត់បង់នូវតម្លៃរបស់ខ្លួន។ នេះជាការលើកឡើងរបស់ លោក វ៉ាត់ ចំរើន អគ្គលេខាធិការគណៈកម្មការជាតិអូឡាំពិកកម្ពុជា កាលពីពេលថ្មីៗកន្លងទៅនេះ។
សូមស្ដាប់សំឡេង៖
លោក វ៉ាត់ ចំរើន បានសង្កត់ធ្ងន់ថា «កីឡាថ្នាក់ជាតិមានតម្លៃទៅបានសំខាន់វាអាស្រ័យទៅលើអ្នករៀបចំ បើអ្នករៀបចំឲ្យតម្លៃខ្លាំង វានឹងខ្លាំង បើកាលណាសហព័ន្ធឱ្យតម្លៃទាបជាងការរៀបចំក្រៅផ្លូវការរបស់សហព័ន្ធវានឹងទាបទៅតាមហ្នឹងដែរ»។
លោក វ៉ាត់ ចំរើន ដែលបានចូលរួមមហាសន្និបាតគណៈកម្មាធិការអូឡាំពិកអន្តរជាតិលើកទី៣៤ នៅទីក្រុង Ashgabat ប្រទេសទួរមេនីស្ថាន កាលពីថ្ងៃទី១៦ ខែកញ្ញា កន្លងទៅ បានបន្ថែមថា «សហព័ន្ធត្រូវធ្វើការកំណត់កម្រិតបច្ចេកទេសកីឡាករ បើសិនជាកីឡាករណាដែលមិនបានចូលរួមប្រកួតថ្នាក់ជាតិ មិនអនុញ្ញាតឱ្យចូលរួមប្រកួតក្រៅផ្លូវការរបស់សហព័ន្ធ នៅពេលសហព័ន្ធឱ្យតម្លៃការប្រកួតក្រៅផ្លូវការរបស់សហព័ន្ធខ្លាំងពេក អាចធ្វើឱ្យកីឡាករខ្លាំងៗមិនមកចូលរួមប្រកួតថ្នាក់ជាតិនោះទេ។ បើសិនជាកីឡាមួយស្ថិតនៅក្រោមឥទ្ធិពលអ្នកនយោបាយ ឬអ្នកស្ពន់ស័រ កីឡានោះនឹងក្លាយទៅជាកីឡាមិនស្អាតស្អំ»។
លោកអគ្គលេខាធិការគណៈកម្មការជាតិអូឡាំពិកកម្ពុជាបានបន្ថែមទៀតថា ការប្រកួតថ្នាក់ជាតិវាមានតម្លៃខ្លាំងណាស់ ព្រោះវាជាកត្តាមួយជួយជំរុញឲ្យកីឡាករ កីឡាការនីខិតខំធ្វើការហ្វឹកហាត់ ហើយវាជាឱកាសជួយពង្រឹងសមត្ថភាពកីឡាករ កីឡាការនី ដើម្បីត្រៀមខ្លួនប្រកួតយកមេដាយមាសលំដាប់អន្តរជាតិ ជាពិសេសក្នុងការប្រកួតស៊ីហ្គេមលើកទី៣២ ឆ្នាំ២០២៣ ដែលកម្ពុជានឹងធ្វើជាម្ចាស់ផ្ទះ៕
Tag:
លោក វ៉ាត់ ចំរើន
NOCC
© រក្សាសិទ្ធិដោយ thmeythmey.com
