កីឡាជាតិ
ជាតិ
អេ យ៉ានុត ប៉ះគូសងសឹក ថៃ លើសង្វៀន CTN អង្គរ នៅរសៀលថ្ងៃនេះ 04, Nov 2015 , 3:38 pm
× កីឡាករកីឡាការនី អេ យ៉ានុត នឹងប៉ះគូសងសឹកថៃ ផន ស្នេហ៍ និងកីឡាករកម្ពុជា ចំនួន ៣ រូបទៀតនឹងជួបប្រកួតជាមួយ ថៃ នៅលើសង្វៀន CTN អង្គរខេត្តសៀមរាប នៅក្នុងកម្មវិធីប្រដាល់ជើងឯក សង្វៀន CTN អង្គរខេត្តសៀមរាបគុនខ្មែរមួយថៃ វេលាម៉ោង ៣ និង ១៥នាទី នៅថ្ងៃពុធ ទី៤ ខែវិច្ឆិកា នេះ។
កីឡាការនីវ័យក្មេងដែលជាម្ចាស់មេដាយប្រាក់ក្នុងការប្រកួតសកលថ្នាក់ជាតិប្រចាំឆ្នាំ២០១៥ អេ យ៉ានុត មកពីក្លិបអេភូងកីឡា និងជាកូនបង្កើតរបស់កីឡាករ អេ ភូថង ធ្លាប់ឆ្លងកាត់សង្វៀនប្រកួតចំនួន២១ដង ឈ្នះ១៦ដង ចាញ់៥ដង និងផ្តួលគូប្រកួតឱ្យសន្លប់ចំនួន៦ដង នឹងត្រូវជួបប្រកួតជាមួយគូសងសឹកថៃ ផន ស្នេហ៍ (PHORN SNE) ដែលមានប្រវិត្តប្រកួតច្រើងជាងខ្លួនរហូតដល់ទៅ៣២ដង ក្នុងនោះឈ្នះ៣៥ដង ចាញ់១៤ ស្មើ២ដង និងផ្តួលគូប្រកួតឱ្យសន្លប់ចំនួន៥ដង។
គួរបញ្ជាក់ផងដែរថា កីឡាការនី ផន ស្នេហ៍ ធ្លាប់ចាញ់ក្នុងកណ្តាប់កីឡាការនី អេ យ៉ានុត ម្តងមកហើយនៅលើសង្វៀន CTN អង្គរ កាលពីថ្ងៃទី៧ ខែតុលា កន្លងទៅនេះ ដោយសារការមិនអស់ចិត្តរបស់កីឡាការនី ថៃ ម្នាក់នេះ ទើបគណៈកម្មការរៀបចំការប្រកួតបានផ្គូផ្គងឱ្យពួកគេទាំអពីរជួបគ្នាម្តងទៀតនៅថ្ងៃនេះ។ តើកីឡាការនី ថៃ ម្នាក់នេះអាចយកឈ្នះលើកីឡាការនីកម្ពុជាបានឬយ៉ាងណា? តាមដាន និងទស្សនាទាំងអស់គ្នាតាមរយៈទូរទស្សន៍ CTN។
កីឡាករអាយុ១៨ឆ្នាំមានកំពស់១,៧០ម៉ែត្រ ឃីម បូរ៉ា មកពីក្លិបរស្មីភូមិគាប ខេត្តបន្ទាយមានជ័យ មានទម្ងន់៦០គីឡូក្រាមធ្លាប់ឆ្លងកាត់ការប្រកួតចំនួន៥៥ដង ឈ្នះ៤០ដង ចាញ់១៥ដង នឹងផ្តួលគូរប្រកួតឱ្យសន្លប់ចំនួន១៦ដង នឹងជួបប្រកួតជាមួយកីឡាករ ថៃ ឌិន ណាផូ (DIN NAPHO) ដែលមានប្រវត្តិប្រកួតច្រើនជាងខ្លួនចំនួន ២០ដង ក្នុងនោះ ឈ្នះ៦០ដង ចាញ់១៣ដង និងសើ្ម២ដង។
ខណៈកីឡាករ ជ័យ វណ្ណៈ មកពីក្លិបឃ្លាំងមឿងកីឡាខេត្តពោធិ៍សាត់ មានអាយុ២៤ឆ្នាំ កំពស់ ១,៦៤ម៉េត្រ ធ្លាប់ឆ្លងកាត់សង្វៀនប្រកួតចំនួន ៨០ដង ឈ្នះ៤៧ដង ចាញ់៣១ដង និងស្មើ២ដង នឹងជួបប្រកួតជាមួយកីឡាករ អេករៈ ស៊ីតប៉ាធីម (EKARAK SIT PATHIM) ដែលមានប្រវត្តិប្រកួតតិចជាងខ្លួន១៩ដង ក្នុងនោះ ឈ្នះ៤៥ដង ចាញ់១៦ដង និងផ្តួលគូប្រកួតឱ្យសន្លប់ចំនួន ១០ដង។
ចំណែកកីឡាករមកពីក្លិបអេភូថងកីឡាមានកំពស់១,៧០ម៉ែត្រ ចាន់ រក្សា ធ្លាប់ឆ្លងកាត់ការប្រកួតចំនួន៦១ដង ឈ្នះ៤១ដង ចាញ់១៦ដង ស្មើ៤ដង និងផ្តួលគូប្រកួតសន្លប់ចំនួន១០ដង នឹងត្រូវជួបខ្លាចាស់ជើងខ្លាំងថៃ សៃ យោគ (SAI YORK) ដែលមានប្រវត្តិប្រកួតចំនួន១០០ដង ឈ្នះ៤១ដង ចាញ់១៦ដង និងស្មើ៥ដង៕
© រក្សាសិទ្ធិដោយ thmeythmey.com