អន្តរជាតិ
អារ៉ាប៊ីសាអូឌីត ផ្អាកការហោះហើរ និងពាណិជ្ជកម្មជាមួយអ៊ីរ៉ង់ 05, Jan 2016 , 3:48 pm
× អារ៉ាប៊ីសាអូឌីត ប្រកាសផ្អាករាល់ជើងហោះហើរទាំងអស់ដែលមានទិសដៅទៅកាន់អ៊ីរ៉ង់និងសកម្មភាពពាណិជ្ជកម្មទ្វេភាគី។ វិធានការនេះត្រូវបានដាក់ចេញមួយថ្ងៃក្រោយប្រទេសនេះប្រកាសផ្ដាច់ទំនាក់ទំនងការទូតជាមួយអ៊ីរ៉ង់ នៅថ្ងៃទី៣ ខែមករា កន្លងមក ។ នេះបើយោងតាមទីភ្នាក់ងារព័ត៌មាន Reuters ។
ទំនាក់ទំនងរវាងអារ៉ាប៊ីសាអូឌីតនិងអ៊ីរ៉ង់ កាន់តែធ្លាក់ដុនដាបទៅហើយ បន្ទាប់ពីរដ្ឋមន្ត្រីការបរទេសរបស់អារ៉ាប៊ីសាអូឌីត បន្តដាក់ចេញវិធានការថ្មីដោយប្រកាសផ្អាកទំនាក់ទំនងទាំងឡាយជាមួយអ៊ីរ៉ង់ ។
នោះគឺអារ៉ាប៊ីសាអូឌីតសម្រេចកាត់ផ្ដាច់ចរាចរណ៍ផ្លូវអាកាស ក៏ដូចជារាល់ទំនាក់ទំនងពាណិជ្ជកម្មជាមួយអ៊ីរ៉ង់ ។ ហើយអារ៉ាប៊ីសាអូឌីតក៏បានដាក់លក្ខខណ្ឌដល់អ៊ីរ៉ង់ដោយត្រូវធ្វើខ្លួនឲ្យដូចគេដូចឯង ប្រសិនបើចង់ស្ដារទំនាក់ទំនងជាមួយខ្លួនឡើងវិញនោះ ។
ក្នុងកិច្ចសម្ភាសន៍ជាមួយទីភ្នាក់ងារព័ត៌មាន Reuter រដ្ឋមន្ត្រីការបរទេស អារ៉ាប៊ីសាអូឌីត លោក Adel al-Jubeir បញ្ជាក់ថា៖ « យើងនឹងផ្អាកជើងយន្តហោះ ដែលមានទិសដៅ ទៅនឹងមកអ៊ីរ៉ង់ ក៏ដូចជាសកម្មភាពពាណិជ្ជកម្មផងដែរ ។ ហើយអារ៉ាប៊ីសាអូឌីតក៏ដាក់បម្រាមដល់អ្នកណាដែលធ្វើដំណើរទៅកាន់អ៊ីរ៉ង់ដែរ»។
យ៉ាងណាមិញ អាជ្ញាធរអារ៉ាប៊ីសាអូឌីតក៏នៅតែស្វាគមន៍ប្រជាជនអ៊ីរ៉ង់ដែលមានបំណងធ្វើដំណើរមកកាន់ទឹកដីរបស់ខ្លួន ដើម្បីទៅកាន់ទឹកដីពិសិដ្ឋរបស់ឥស្លាមនៅទីក្រុង Mecca និងទីក្រុង Medina ។ ពួកគេនៅតែអាចធ្វើធម្មយាត្រាប្រចាំឆ្នាំ Haj ឬក៏ចូលរួមក្នុងធម្មយាត្រា Umrah បានដដែល ។
លើសពីនេះ រដ្ឋមន្ត្រីការបរទេសអារ៉ាប៊ីសាអូឌីតលោក Adel al-Jubeir ក៏បានទាមទារឲ្យអ៊ីរ៉ង់ទទួលខុសត្រូវលើទំនាក់ទំនងដែលកំពុងតែធ្លាក់ចុះរវាងប្រទេសទាំងពីរ ។ លោក al-Jubeir ក៏បានបន្តចោទប្រកាន់ថា អ៊ីរ៉ង់បានបញ្ជូនអ្នកប្រយុទ្ធទៅកាន់ប្រទេសអារ៉ាប់នានានិងបានរៀបចំផែនការវាយប្រហារក្នុងទឹកដីអារ៉ាប៊ីសាអូឌីត ព្រមទាំងប្រទេសជិតខាងរបស់ខ្លួន ។
ឆ្លៀតពេលនោះដែរ រដ្ឋមន្ត្រីការបរទេសរូបនេះ ក៏បានថ្លែងការពារការសម្រេចចិត្តរបស់អាជ្ញាធរអារ៉ាប៊ីសាអូឌីតដែលបានដាក់ទោសប្រហារជីវិតមេដឹកនាំនិកាយស៊ីអ៊ីតលោក Nimir al-Nimir ។ លោក al-Nimir ត្រូវបានចោទប្រកាន់ពីបទរៀបចំបណ្ដាញក្រុមបះបោរ និងផ្ដល់លុយកាក់ក៏ដូចជាអាវុធដល់ពួកគេ ។ ក្រោយប្រហារជីវិតហើយ លោក Adel al-Jubeir បាននិយាយថា៖« យើងគួរអបអរចំពោះរឿងនេះ មិនមែនរិះគន់នោះទេ»៕
Tag:
អារ៉ាប៊ីសាអូឌីត
អ៊ីរ៉ង់
© រក្សាសិទ្ធិដោយ thmeythmey.com