អន្តរជាតិ
លោកស្រីស៊ូជី៖ បើប្រទេសគ្មានសន្តិភាពនោះទេ រដ្ឋាភិបាល ក៏មិនអាចធ្វើអ្វីបានដែរ 06, Jan 2016 , 10:16 am
× ទោះបីជា មីយ៉ាន់ម៉ា បានទទួលឯករាជ្យពីអង់គ្លេសរយៈពេលជាង៦ទសវត្សរ៍ក៏ដោយ សន្តិសុខ និងសន្តិ ភាព នៅតែជាបញ្ហាដែលរដ្ឋាភិបាលមីយ៉ាន់ម៉ាត្រូវដោះស្រាយ។ ជាមួយគ្នានោះ លោកប្រធានាធិបតីជិត ផុតអាណត្តិ ថេន សេន ក៏បានព្យាយាមចរចាស្វែងរកកិច្ចព្រមព្រៀងសន្តិភាព តែបញ្ហានៅតែមិនទាន់ត្រូវ បានបញ្ចប់។ ហើយ បន្ទុកនេះ នឹងត្រូវធ្លាក់មកលើរដ្ឋាភិបាលថ្មីនៃបក្សលោកស្រីអ៊ុងសាន ស៊ូជី ដែលនឹង ឡើងកាន់អំណាចនៅខែកុម្ភៈខាងមុខនេះ។
មេបក្សឈ្នះឆ្នោតសម្ព័ន្ធជាតិដើម្បីប្រជាធិបតេយ្យ លោកស្រីអ៊ុងសាន ស៊ូជី បានប្រកាសថាការកសាង សន្តិភាព គឺជាវិស័យអាទិភាពមួយដែលរដ្ឋាភិបាលថ្មីនៃបក្សលោកស្រីត្រូវតែធ្វើ។ លោកស្រី ថា សន្តិភាព ពិតជាសំខាន់ណាស់ក្នុងការអភិវឌ្ឍប្រទេស។ នេះ គឺជាសុន្ទរកថា ដំបូងហើយដែលលោកស្រី លើកឡើងទាក់ទងនឹងបញ្ហាការកសាងសន្តិភាព ក្រោយពីបក្សលោកស្រី បានទទួលសំឡេងគាំទ្រលើសលប់ក្នុងការបោះឆ្នោតថ្ងៃទី០៨ ខែវិច្ឆិកា ២០១៥កន្លងទៅ។
គឺរយៈពេល៦៨ឆ្នាំហើយដែលមីយ៉ាន់ម៉ា បានប្រកាសឯករាជ្យពីម្ចាស់អាណានិគមអង់គ្លេស តែមីយ៉ាន់ម៉ា នៅមិនទាន់ស្វែងរកសន្តិភាពពេញលេញនៅទូទាំងប្រទេសបានឡើយ ដ្បិត មានក្រុមឧទ្ទាមជនជាតិភាគតិចជាច្រើន នៅតែប្រយុទ្ធទាមទារយកស្វ័យភាពគ្រប់គ្រងដែនដី។ រដ្ឋាភិបាលជាច្រើនអាណត្តិហើយ បានព្យាយាមចរចាស្វែងរកកិច្ចព្រមព្រៀងសន្តិភាព តែនៅតែមិនអាចទាញយកគ្រប់ភាគគីនៃជម្លោះបាន។
ជាមួយគ្នានេះ លោកប្រធានាធិបតីថេន សេន ដែលបានឡើងកាន់អំណាចតាំងពីឆ្នាំ២០១១ បានព្យាយាមចរចាជាមួយនឹងក្រុមឧទ្ទាមស្ទើរតែពេញមួយអាណត្តិប្រធានាធិបតីរបស់លោក។ ជាលទ្ធផល នៅខែតុលា ឆ្នាំ ២០១៥ រដ្ឋាភិបាលលោក ថេន សេន បានចុះហត្ថលេខាលើកិច្ចព្រមព្រៀងសន្តិភាពស្តីពីបទបាញ់ជាមួយនឹងក្រុមជនជាតិភាគតិចចំនួន៨ក្រុម។
យ៉ាងណាក៏ដោយ នៅមានក្រុមឧទ្ទាមជនជាតិភាគតិចប្រដាប់អាវុធជាច្រើនក្រុមផ្សេងទៀត មិនទាន់បានចុះកិច្ចព្រមព្រៀងជាមួយរដ្ឋាភិបាលនៅឡើយនោះទេ។ ហើយថ្មីៗនេះ កងកម្លាំងរដ្ឋាភិបាលមីយ៉ាន់ម៉ា ទើបតែប៉ះទង្គិចគ្នាជាមួយនឹងក្រុមឧទ្ទាមនៅក្នុងខេត្តសាន ដែលបានបណ្តាលឲ្យទាំងក្រុមឧទ្ទាម និងកងកម្លាំងរងរបួសទាំងសងខាង។
ជុំវិញបញ្ហានេះ លោកស្រីអ៊ុងសាន ស៊ូជី បានសន្យានៅថ្ងៃទី០៤ ខែមករា ក្នុងឱកាសបុណ្យឯករាជ្យថា កិច្ចការចម្បងដែលរដ្ឋាភិបាលបក្សលោកស្រី នឹងត្រូវធ្វើដំបូងគេគឺការកសាងសន្តិភាព។ លោកស្រី បានសង្កត់ថា « បើប្រទេសគ្មានសន្តិភាពនោះទេ រដ្ឋាភិបាល ក៏មិនអាចធ្វើអ្វីបានដែរ» ។
យ៉ាងណាក៏ដោយ វាមិនមែនជារឿងដែលងាយស្រួលនោះទេ សម្រាប់រដ្ឋាភិបាលបក្សលោកស្រីស៊ូជី ក្នុងការដឹកនាំរដ្ឋាភិបាលជាលើកដំបូង និងព្រមទាំងមានបទពិសោធន៍តិចតួចក្នុងការដឹកនាំក្នុងការ ចរចានោះ។ ជាពិសេសនោះ ការចរចា ក៏ទាមទារជាមួយនឹងយុទ្ធសាស្ត្រយោធាទៀតផង។ បញ្ហានេះ ហើយដែលក្រុមយោធាយកលេស ដើម្បីបន្តកាន់អំណាចនៅក្នុងកិច្ចការនយោបាយមីយ៉ាន់ម៉ា៕
Tag:
មីយ៉ាន់ម៉ា
អ៊ុងសាន ស៊ូជី
© រក្សាសិទ្ធិដោយ thmeythmey.com