អន្តរជាតិ
កូរ៉េខាងជើង អះអាងថាបានបាញ់គ្រាប់បែកអ៊ីដ្រូសែនដ៏មានឥទ្ធិពលដោយជោគជ័យ 06, Jan 2016 , 12:13 pm
× រដ្ឋាភិបាលក្រុងព្យុងយ៉ាង អះអាងថា បានបាញ់សាកល្បងគ្រាប់បែកអ៊ីដ្រូសែនដោយជោគជ័យ។ ការបាញ់សាកល្បងនេះ ក៏បានបង្កឲ្យមានគ្រោះរញ្ជូយដីនៅក្បែររោងចក្រផលិតគ្រាប់បែកបរមាណូ ផងដែរ។ នេះបើយោងតាមសារព័ត៌មាន South China Morning Post។
នៅព្រឹកថ្ងៃពុធ ទី០៦ មករានេះ រដ្ឋាភិបាលកូរ៉េខាងជើង បានប្រកាសថាបានបាញ់គ្រាប់បែកអ៊ីដ្រូសែន ដែលជាប្រភេទគ្រាប់បែកថ្មីរបស់ក្រុងព្យុងយ៉ាងដោយជោគជ័យ។ ការប្រកាសនេះធ្វើឡើងក្រោយពីមានគ្រោះរញ្ជួយដីមួយដែលមានរង្វាស់ប្រមាណ៥.១ វិចទ័រ ដែលអ្នកជំនាញជាច្រើនបានចាត់ថា កើតឡើងដោយសារតែការបាញ់គ្រាប់បែកអ៊ីដ្រូសែននោះឯង។
បើសិនជាការបាញ់គ្រាប់បែកអ៊ីដ្រូសែនរបស់កូរ៉េខាងជើង ពិតជាបានកើតឡើងដូចទៅនឹងការចុះ ផ្សាយរបស់ព័ត៌មានមែន នោះការបាញ់នេះ នឹងក្លាយជាការបាញ់សាកល្បងលើកទីបួនហើយនៃការ បាញ់គ្រាប់បែកលក្ខណៈទ្រង់ទ្រាយធំរបស់កូរ៉េខាងជើង។ យោងតាមសារព័ត៌មាន BBC កូរ៉េខាងជើង ធ្លាប់បានបាញ់មីស៊ីលដ៏មានឥទ្ធិពលបីលើកហើយ។ ក្នុងនោះ វាកើតឡើងនៅឆ្នាំ២០០៦ ២០០៩ និងចុងក្រោយនៅឆ្នាំ២០១៣។
សូមរមឹ្លកផងដែរថា កាលពីថ្ងៃទី១០ ធ្នូ ២០១៥ កន្លងទៅ មេដឹកនាំកំពូលកូរ៉េខាងជើង លោក គីម ជុងអ៊ុន បានប្រកាសជាផ្លូវការថា ប្រទេសកូរ៉េខាងជើងបានសម្រេចជោគជ័យក្នុងការផលិតគ្រាប់បែកអ៊ីដ្រូសែន។ ហើយលោក ក៏បានសង្កត់ធ្ងន់ថា កូរ៉េខាងជើង ក៏អាចប្រើប្រាស់គ្រាប់បែកនេះបំពាក់ជាមួយក្បាលគ្រាប់នុយក្លេអ៊ែរ ដើម្បីការពារអធិបតេយ្យខ្លួន ប្រឆាំងរាល់ការឈ្លានពានពីបរទេស។ កូរ៉េខាងជើងចាត់ទុកថា ជោគជ័យនេះជួយឲ្យខ្លួនក្លាយជាមហាអំណាចនុយក្លេអ៊ែរដ៏ខ្លាំងក្លាមួយលើលោក។
អ្វីគួរកត់សម្គាល់នោះ ការបាញ់គ្រាប់បែកអ៊ីដ្រូសែនរបស់កូរ៉េខាងជើង ធ្វើឡើងតែប៉ុន្មានថ្ងៃប៉ុណ្ណោះ មុនថ្ងៃខួបកំណើតរបស់លោកប្រធានាធិបតីកូរ៉េខាងជើងគីម ជុងអ៊ុន។ អ្នកវិភាគមួយចំនួនចាត់ទុក ការបាញ់នេះ គឺជាការសាទរចំពោះលោក គីម ជុងអ៊ុន ដ្បិតជាទម្លាប់ កូរ៉េខាងជើង តែងតែសាកល្បង អាវុធទ្រង់ទ្រាយធំនៅក្នុងឱកាសពិសេស ឬបុណ្យជាតិរបស់ប្រទេសខ្លួន៕
© រក្សាសិទ្ធិដោយ thmeythmey.com