តុលាការកំពូលបង់ក្លាដែសរក្សាទោសប្រហារជីវិតលើមេដឹកនាំកំពូលបក្សប្រឆាំង

អន្តរជាតិ

នយោបាយអន្តរជាតិ

តុលាការកំពូលបង់ក្លាដែសរក្សាទោសប្រហារជីវិតលើមេដឹកនាំកំពូលបក្សប្រឆាំង

06, Jan 2016 , 2:57 pm

រូបភាព

ដោយ: តន ចាន់រិទ្ធារ៉ា

តុលាការកំពូលបង់ក្លាដែស បានសម្រេចរក្សាទោសប្រហារជីវិតមេដឹកនាំកំពូលបក្សប្រឆាំង លោក Motiur Rahman Nizami ដែលរងការចោទប្រកាន់ចំពោះបទឧក្រិដ្ឋ កាលពីសម័យសង្គ្រាមដណ្ដើមឯករាជ្យក្នុងឆ្នាំ១៩៧១។ ជាមួយការសម្រេចនេះ លោក Nizami នឹងត្រូវព្យួរកនៅប៉ុន្មានខែខាងមុខនេះ។

ចុចទីនេះដើម្បីទទួលបានព័ត៌មានរហ័ស

តុលាការកំពូលបង់ក្លាដែស នៅថ្ងៃពុធ ទី៥ ខែមករានេះ បានសម្រេចរក្សាទោសប្រហារជីវិតមេបក្សប្រឆាំងលោក Motiur Rahman Nizami ដែលរកឃើញថាមានកំហុសឧក្រិដ្ឋ ប្រព្រឹត្តិកាលពីសម័យសង្គ្រាមឯករាជ្យនៅឆ្នាំ១៩៧១។ មេដឹកនាំគណបក្ស Jamaat-e-Islami ដែលជាបក្សប្រឆាំងដ៏ធំរបស់ប្រទេសបង់ក្លាដែស អាចនឹងត្រូវប្រហារជីវិតដោយព្យួរកនៅពេលខាងមុខ ។

ក្នុងពេលសវនាការ ប្រធានតុលាការកំពូលលោក S.K. Sinha បានទាត់ចោលការប្ដឹង ប្រឆាំងនឹងការដាក់ទោសរបស់តុលាការថ្នាក់ក្រោម របស់លោក Motiur Rahman Nizami។ លោក Nizami ត្រូវដាក់ទោសប្រហារជីវិត ក្រោមបទរំលោភ ឃាតកម្ម និងរៀបចំការសម្លាប់បុគ្គលល្បីៗ នៅពេលលោកមានតំណែងជាប្រមុខកងកម្លាំងក្នុងសម័យសង្គ្រាម។

ក្នុងពេលនោះដែរ រដ្ឋអាជ្ញាបង់ក្លាដែសលោក Tureen Afroz បានប្រាប់អ្នករាយការណ៍ព័ត៌មានថាតុលាការបានរក្សាបទចោទចំនួនបី ក្នុងចំណោមការកាចោទប្រកាន់ទាំង៤។

លោក Motiur Rahman Nizami មានវ័យ៧២ឆ្នាំ ក្លាយប្រមុខបក្សឥស្លាមធំជាងគេ តាំងពីឆ្នាំ២០០០ ហើយលោកក៏ធ្លាប់ជារដ្ឋមន្ត្រីក្នុងរដ្ឋាភិបាលឥស្លាម ក្នុងឆ្នាំ២០០១ដល់២០០៦ផងដែរ។ យ៉ាងណាក៏ដោយ វាសនារបស់លោកបានប្រែប្រួលខ្លាំង លោកប្រឈមមុខនឹងការប្រហារជីវិតដោយព្យួរក ប្រសិនបើលោកមិនអាចស្វែងរកការលើកលែងទោសណាមួយពីប្រធានាធិបតីបាននោះ។

នេះជាការវាយប្រហារថ្មីមួយទៀតទៅលើគណបក្សប្រឆាំង បន្ទាប់ពីតុលាការកំពូលបង់ក្លាដែស បានដាក់ទោសប្រហារជីវិតលើសមាជិកជាន់ខ្ពស់គណបក្សប្រឆាំង ដោយបទចោទស្រដៀងគ្នានេះផងដែរ។ ក្រុមសិទ្ធិមនុស្សអន្តរជាតិជាច្រើន បានរិះគន់ការសម្រេចចិត្តរបស់តុលាការ ដោយបានលើកឡើងថា ដំណើរការកាត់ក្ដីមិនបានប្រព្រឹត្តិទៅតាមច្បាប់ និងមានការលូកដៃចូលពីសំណាក់រដ្ឋាភិបាល របស់នាយករដ្ឋមន្ត្រី លោកស្រី Sheikh Hasina។ ប៉ុន្តែរដ្ឋាភិបាលបង់ក្លាដែសបានបដិសេធការចោទប្រកាន់នេះ៕

Tag:

បង់ក្លាដែស